ޓެކްސް ރޭޓް ބޮޑުކޮށްގެން ދައުލަތުގެ އާމްދަނީ އިތުރުކުރުމުގެ މާނައެއްނެތް: ނަޝީދު

ޓެކްސްރޭޓް އިތުރުކޮށްގެން ދައުލަތަށް ލިބޭ އާމްދަނީ އިތުރުކުރުމަކީ އެއްވެސް މާނައެއްހުރި ކަމެއްނޫންކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

މާފުއްޓަށް މިއަދު ވަޑައިގެން އެރަށުގެ އައު ޑެސްޓިނޭޝަން ބްރޭންޑް ކަމަށްވާ "ހާރޓް އޮފް މޯލްޑިވްސް" ރަސްމީކޮށް ތަޢާރަފުކުރެއްވުމަށް ބޭއްވި ހަފްލާގައި ވާހަކަދައްކަވަމުން ރައީސް ނަޝީދު ވިދާޅުވީ، ދައުލަތުގެ އާމްދަނީ އިތުރުކުރުމަށް ހަދަންޖެހޭ ގޮތަކީ ޓެކްސް އިތުރުކުރުން ނޫންކަމަށާއި، ޓެކުހުން އާމްދަނީ އިތުރުކުރަން އޮތް އެންމެރަނގަޅު ގޮތަކީ ޓެކްސް ބޭސް ނުވަތަ ޓެކްސް ދައްކާ މީހުންގެ އަދަދަު އިތުރުކުރުން ކަމަށެވެ.

ހަމައެކަނި މާފުއްޓަށް ބެލިނަމަވެސް މިއީ ކުރެވިދާނެކަމެއްކަން ފާހަގަކުރައްވަމުން ރައީސް ނަޝީދު ވަނީ ބައެއް މިސާލުތައް ދައްކަވާފައެވެ. އެގޮތުން މާފުށި ބޭރުގައި ހިއްކާފައި ބިމެއް ފަޅަށް އޮންނަތާ ގިނަދުވަސްވެއްޖެ ކަމަށާއި، އެންމެކުޑަމިނުން އެތަނުގައި ގަހެއްހާ ހިސާބުވެސް އިންދާފައިނުވާކަމަށެވެ. ނަޝީދު ވިދާޅުވީ ޓެކްސް ނަގަމުން އަންނަ ރޭޓް މައްޗަށްޖެއްސުމުގެ ބަދަލުގައި އެތަނަށް ކަރަންޓާއި ފެން ގުޅައި އެތަނުން ޓެކުހުގެ ނަފާ ނެރެވިދާނެކަމަށެވެ.

މިރަށުގައި ސަރުކާރުން ހިންގާ ކޮންމެ ކަމަކުންވެސް ސަރުކާރަށް ވެގެންދާނީ ފައިދާ، ސަރުކާރުގެ ނަފާ އަދި ސަރުކާރުގެ އާމްދަނީ އިތުރުކުރުމަށް ހަދާންވި ގޮތަކީ ޓެކްސް މަތިކުރުމެއްނޫން އިނގޭތޯ. މިހާރު މި ނަގާ ޖީއެސްޓީ އަނެއްކާވެސް ދެ ޕަސަންޓުން އިތުރުކުރާން އުޅުމެއްނޫން

ރައީސް މުހައްމަދު ނަޝީދު

ރާއްޖޭގެ އެކި ހިސާބުތަކުގައި މިފަދަ އެތައް ބިންތަކެއް ހުރިކަން ފާހަގަކުރައްވަމުން ނަޝީދު ވިދާޅުވީ، އޮތީ ހަމައެކަނި ޓޫރިޒަމް ނޫންކަމަށާއި އެނޫން ދާއިރާތަކުންވެސް ނަފާނެރެވިދާނެކަމަށެވެ. ނަޝީދު ވިދާޅުވީ އުފެއްދުންތެރިކަން އިތުރުކުރުމަށް ކުރަންވީ ކަންކަން ފާހަގަކުރެވޭއިރު، އެކަންކަން ކުރުމަށް ދސަރުކާރުގެ ސިޔާސަތުތައް ފަހިވާން ޖެހޭނޭކަމަށެވެ.

މި ހަފްލާގައި ރައީސް ނަޝީދު ވަނީ 2008 ވަނަ އަހަރަށްފަހު މާފުއްޓަށް މިއަދު އިގްތިސާދީ ގޮތުން އައިސްފައިވާ ކުރިއެރުންތަކުގެ މައްޗަށް އަޅިއަޅުވާލައި ވާހަކަފުޅު ދައްކަވާފައެވެ. އެގޮތުން މީގެ ކުރިން އެމަނިކްފާނުގެ ވެރިކަމުގެ ފުރަތަމަ ދުަވސްކޮޅު އެރަށަސް ވަޑައިގެން ބެއްލެވިއިރު ފިހާރައިގެ ވިކުރާ 3،000 ހާހުގައި ހުރިނަމަވެސް މިހާރު އެއަދަދު ރެއެއްގެ މައްޗަށް ލައްކައިން ފަހަނަ އަޅައި ގޮސްފައިވާކަން ވަނީ ފާހަގަކުރައްވާފައެވެ.