ކުޑަކުދިންގެ އޮރިޔާންކާޑު ގެންގުޅުނު ކަމަށް ތުހުމަތުވާ މީހާގެ ދައުވާތައް ނެގި ސަބަބު ޕީޖީން ސާފުކޮށްދީފި

ކުޑަކުދިންގެ އޮރިޔާން ކާޑު ގެންގުޅުނު ކަމަށް ތުހުމަތުކުރެވުނު ތ. ވިލުފުށި، މޫނިމާގެ، އާދަމް ޢަދްލާން ލަޠީފްގެ މައްޗަށް ކުރި ދަޢުވާތައް އަނބުރާ ގެނައި ސަބަބު ޕީޖީން ސާފުކޮށްދީފިއެވެ.

ޕީޖީ އޮފީހުން ބުނީ ޢަދްލާން ލަޠީފްގެ މައްޗަށް ތުހުމަތުކުރެވުނު މައްސަލައިގެ ތަހުގީގު ނިންމައި ފުލުހުން 5 މެއި 2026 ގައި އެ މައްސަލަ ޕީޖީ އޮފީހަށް ހުށަހެޅި ކަމަށެވެ. ލިޔެކިޔުންތައް ދިރާސާކުރުމުން ދައުވާކުރެވޭ މިންވަރަށް ހެކި ޤަރީނާ ނެތް ކަމަށް ފެނިގެން އެ އޮފީހުން ފުރަތަމަ ނިންމީ ދައުވާ ނުކޮށް މައްސަލަ ފުލުހުންނަށް އަނބުރާ ފޮނުވައިލުމަށް ކަމަށެވެ. ނަމަވެސް ފުލުހުންގެ ފަރާތުން އެ ނިންމުން މުރާޖައާކޮށްދޭން އެދުމާ ގުޅިގެން މުރާޖައާ ހިނގާ މުއްދަތުގައި ދައުވާކުރުމުގެ ޤާނޫނީ މުއްދަތު ހަމަވެދާނެތީ 19 މެއި 2026 ގައި ދެ ދައުވާއެއް ކްރިމިނަލް ކޯޓަށް ހުށަހެޅީ ކަމަށް އެ އޮފީހުން ބުނެފައިވެއެވެ.

ކޯޓަށް ހުށަހެޅީ ޤާނޫނުލްޢުޤޫބާތުގެ 246 ވަނަ މާއްދާގެ ދަށުން ކޮމްޕިއުޓަރ ސިސްޓަމެއްގައި ކުޑަކުދިންގެ އޮރިޔާންކާޑު ބެހެއްޓުމުގެ ދައުވާއާއި 622 ވަނަ މާއްދާގެ ދަށުން އޮރިޔާންކާޑު ގެންގުޅުމުގެ ދައުވާއެވެ. ޕީޖީ އޮފީހުން ބުނީ ދައުވާ ހުށަހެޅީ އެ ވަގުތު ފިޔަވަޅު ނޭޅިއްޖެ ނަމަ ފަހުން ދައުވާކުރުމުގެ ފުރުސަތު ޤާނޫނީ ގޮތުން މުޅިން ބަންދުވާނެތީ ކަމަށެވެ.

ކޯޓަށް ދައުވާ ހުށަހެޅުމަށްފަހު އެ ދައުވާތައް އިތުރަށް މުރާޖައާކޮށް ހަތަރު ސަބަބެއް ފާހަގަކޮށް ދައުވާތައް އަނބުރާ ގެނައި ކަމަށް ޕީޖީ އޮފީހުން ބުނެފައިވެއެވެ. އެ ގޮތުން ބުނީ؛

- އާދަމް ޢަދްލާން ލަޠީފް ކުޑަކުދިންގެ އޮރިޔާންކާޑު ވިއްކައި ވިޔަފާރިކުރިކަމެއް އެހެން ފަރާތަކަށް ފޮނުވިކަމެއް ނުވަތަ އެ ބާވަތުގެ ނެޓްވޯކަކާ ގުޅުމެއް އޮތްކަމެއް ދައްކައިދޭ ހެއްކެއް ހޯދިފައި ނުވާ ކަމަށް

- ގިނަ ޑިޖިޓަލް ޑިވައިސްތަކެއް ފުލުހުން ނެގި ނަމަވެސް އޭގެ ގިނަ ޑިވައިސްތައް އޭނާއާ ގުޅުވައިލެވޭ ވަރަށް ހެކި ލިބިފައި ނުވާ ކަމަށް

- އޭނާއާ ގުޅުވެން ހުރި ޑިވައިސްތަކުން ފެނުނު އޮރިޔާންކާޑަކީ ކުޑަކުދިންގެ އެއްޗެއްކަން ސާބިތުކުރެވޭ ވަރަށް ވެސް ހެކި ނެތް ކަމަށް

- ޕީޖީ އޮފީހުން އިތުރަށް ބުނީ ހެކިތަކަށް ބެލުމުން ކުރިއަށް ގެންދެވެން އޮތީ ހަމައެކަނި އޮރިޔާންކާޑު ގެންގުޅުމުގެ ދައުވާ ކަމަށާ، އެ ކުށުގެ އަސާސީ އަދަބަކީ އެއް މަހާއި ހަ ދުވަހުގެ ޖަލު ހުކުމެއް ކަމަށާއި އެންމެ ލުއި އަދަބަކީ ނުވަ ދުވަހުގެ ޖަލު ހުކުމެއް ކަމަށް.

ޕީޖީން ބުނީ އާދަމް ޢަދްލާން ލަޠީފް ތަހުގީގު މަރުހަލާގައި 28 ދުވަސް ބަންދުގައި ހޭދަކޮށްފައިވާތީ ދައުވާ ސާބިތުވިޔަސް ކުށުގެ އަދަބުން ބަންދުގެ މުއްދަތު އުނިކުރުމުން އިތުރަށް ތަންފީޒުކުރާނެ އަދަބެއް ނޯންނާނެ ކަމުން ދައުވާ ކުރިއަށް ގެންދިއުމުގެ މަސްލަހަތެއް ނެތް ކަމަށެވެ.

މި ނިންމުމާ އެކު އާދަމް ޢަދްލާން ލަޠީފްގެ މައްޗަށް ހުށަހެޅި ދެ ދައުވާ ވެސް ކޯޓުން އަނބުރާ ގެނެސް މައްސަލައިގެ ޕީޖީ އޮފީހުގެ މަރުހަލާ ނިމިފައިވެއެވެ.