ތުލުސްދޫގައި މިފަހަރު ބާއްވާ އޭޝިއަން ސާފިން ޗެމްޕިއަންޝިޕް ވެގެންދާނީ ތާރީހީ އިވެންޓަކަށް

އޭޝިއަން ސާފިން ޗެމްޕިއަންޝިޕް ތުލުސްދޫގައި ފެށުމަށް ތައްޔާރުވަމުންދާއިރު، މިފަހަރުގެ އިވެންޓް ވެގެންދާނީ ތާރީހީ އިވެންޓަކަށެވެ. ސަބަބަކީ މިފަހަރުގެ މި އިވެންޓަކީ 2026 ވަނަ އަހަރު ބޭއްވުމަށް ހަމަޖެހިފައިވާ އޭޝިއަން ގޭމްސް މުބާރާތުގެވެސް ކޮލިފައިން އިވެންޓަކަށް ވުމެވެ.

މިމަހުގެ 17 އިން ފެށިގެން 24 ނިޔަލަށް ތުލުސްދޫގައި ބޭއްވުމަށް ހަމަޖެހިފައިވާ އޭޝިއަން ސާފިން ޗެމްޕިއަންޝިފް މި އިވެންޓް ވެފައިވަނީ މިހާތަނަށް ބައިނަލްއަޤްވާމީ ސާފިން ކޮލިފައިން އިވެންޓެއް ރާއްޖޭގައި ބާއްވާ ފުރަތަމަ ފަހަރަށެވެ. ވޮއިސް ސްޕޯޓްސް އާ ވާހަކަދައްކަވަމުން މޯލްޑިވްސް ސާފިން އެސޯސިއޭޝަންގެ ރައީސް، މުހައްމަދު ސޮބާހު ވިދާޅުވީ މިފަހަރު ބާއްވާ އޭޝިއަން ސާފިން ޗެމްޕއަންޝިޕް ވެގެންދާނީ ވަރަށް ހާއްސަ މުބާރާތަކަށް ކަމަށެވެ.

"މިފަހަރުގެ އިވެންޓް ވަރަށް ހާއްސަ. އެޝިއަން ގޭމްސްގައި މިފަހަރު ފުރަތަމަ ފަހަރަށްސާފިން ހިމެނޭއިރު، މި މުބާރާތުގެ ފުރަތަމަ ކޮލިވައިން އިވެންޓް ރާއްޖޭގައި ބެއްވޭކަމީ ވަރަށް ތާރީހީކަމެއް" ސޮބާހް ވިދާޅުވިއެވެ.

މިފަހަރުގެ އޭސިއަން ސާފިން އިވެންޓް ހާއްސަ ވެގެންދާ އަނެއް ކަމަކީ ގިނަ އަދަދެއްގެ އެތްލީޓުން ވާދަކުރާ މުބާރާތަކަށް ވުމެވެ. އެގޮތުން 20 ޤައުމަކުން މުބާރާތުގައި ބައިވެރިވުމަށް ރާއްޖެއަށް 120 އަށްވުރެ ގިނަ އެތްލީޓުން އައުމަށް ވަނީ ހަމަޖެހިފައެވެ. މީގެ އިތުރުން ޓީމްތަކުގެ ޓެކްނިކަލް އޮފިޝަލުންނާއި އެނޫންވެސް އޮފިޝަލުންނާއެކު 200 އަށްވުރެ ގިނަ މީހުން މުބާރާތަށް ރާއްޖެ އަންނާނެއެވެ.

މުބާރާތުގައި ވާދަކުރާ ޑިވިޝަންތައް:

·      ފިރިހެނުންގެ ޝޯޓްބޯޑް

·      އަންހެނުންގެ ޝޯޓްބޯޑް

·      ފިރިހެން 18 އަހަރުންދަށް

·      އަންހެން 18 އަހަރުންދަށް

·      އަލޯހާ ކަޕް ޓީމް އިވެންޓް

އޭޝިއާގެ ސާފިން އެންމެ ބޮޑު މުބާރާތް، އޭޝިއަން ސާފިން ޗެމްޕިއަންޝިޕްގެ މިދިޔަ އަހަރުގެ މި މުބާރާތްވެސް ބާއްވާފައިވަނީ ތުލުސްދޫގައެވެ. މި މުބާރާތް ރާއްޖޭގައި ދެވަނަ ފަހަރަށް ބޭއްވިގެން މިދަނީ ރާއްޖޭގެ ސާފިން އެސޯސިއޭޝަނާއި ތުލުސްދޫގެ ސާފިން އެސޯސިއޭޝަނާއި އެރަށުގެ ކައުންސިލްގެ މަސައްކަތުންނެވެ. އޭޝިއަން ސާފިން ފެޑަރޭޝަނުން އިންތިޒާމް ކުރާ އޭޝިއަން ސާފިން ޗެމްޕިއަންޝިޕް ރާއްޖޭގައި ބެއްވިގެންދާކަމީ ރާއްޖޭގެ ސާފިން އެތްލީޓުންނަށް ލިބިގެންދާނޭ ވަރަށް ރަނގަޅު ފުރުސަތަކަށް ވާނޭކަމަށް މޯލްޑިވްސް ސާފިން އެސޯސިއޭޝަނުން ދެކެއެވެ. ސަބަބަކީ މި އިވެންޓްގައި ވާދަކުރާ ތުލުސްދޫއަށް ނިސްބަތްވާ އެތްލީޓުންވެސް ތިބުމެވެ.

އޭޝިއަން ޗެމްޕިއަންޝިޕް މިދިޔަ އަހަރުގެ މުބާރާތަށް ބަލާއިރު، މުބާރާތުގައި ރާއްޖޭންވެސް ވަނީ މެޑަލެއް ހޯދާފައެވެ. މިގޮތުން މުބާރާތުގެ ފިރިހެނުންގެ ޝޯޓްބޯޑް އިވެންޓަށް ބަލާއިރު، ގޯލްޑް މެޑަލް ހޯދީ އިންޑޮނޭޝިއާއެވެ. ސިލްވަރ މެޑަލް ޖަޕާން ހޯދިއިރު، ބްރޯންޒް މެޑަލް ހޯދީ ރަސްމާދޫއަށް ނިސްބަތްވާ ދިވެހިރާއްޖޭގެ ސާފިން ލެޖެންޑް ހުސައިން އަރީފެވެ.

އޭޝިއާ ޤައުމުތަކުގެ ރޭންކިންއަށް ބަލާއިރު، ފިރިހެނުންގެ ބައިގެ ރިހިމެޑަލް ހޯދާފައިވަނީ ދިވެހިރާއްޖެއެވެ. މުޅި މުބާރާތަށް ބަލާއިރު، ރާއްޖޭގެ ހުސެއިން އަރީފް ވަނީ ފިރިހެނުންގެ ސޯޓްބޯޑްގެ ބައިން ބްރޯންޒް މެޑަލާއި، ފިރިހެނުންގެ އިވެންޓުން ސިލްވަރމެޑަލުގެ އިތުރުން އަލޯހާ ކަޕް އިވެންޓުން ބްރޯންޒް މެޑަލް ހޯދާފައެވެ.