ފިރިހެނުންނަށް އަމިއްލަ ފައިސާގެ މިނިވަންކަން އޮންނަ ވަރަށް އަންހެނުންނަކަށް ނޯވޭ: ރޮޒައިނާ

ދިވެހިރާއްޖޭގައި، ފިރިހެނުންނަށް އަމިއްލަ ފައިސާގެ މިނިވަންކަން އޮންނަ މިންވަރަށް އެ މިނިވަންކަން އަންހެނުންނަށް ނޯންނަ ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ރައްޔިތުންގެ މަޖިލީހުގައި އަންހެނުންގެ ހިއްސާ ކަށަވަރު ކުރުމަށާއި، ރައްޔިތުންގެ މަސްލަހަތާއި ގައުމީ މަސްލަހަތު ހިމާޔަތް ކުރުމުގައި އަންހެނުންގެ ދައުރު އިތުރުކޮށް ގައުމުގެ މުހިންމު ނިންމުންތައް ނިންމުމުގައި އަންހެނުންގެ ބަސް ހިމަނައި އެއީ އެންމެ ރަނގަޅު ނިންމުންކަން ކަށަވަރު ކުރުމަށް އޭނާ މިއަދު މަޖިލީހަށް ހުށަހެޅުއްވި ބިލަށް ބަހުސް ކުރައްވަމުންނެވެ.

އެގޮތުން ރޮޒައިނާ ވިދާޅުވީ އިންތިޚާބުތަކާއި އެނޫންވެސް ކަންކަމުގައި ބައިވެރި ވުމުގެ ފުރުސަތު އަންހެނުންނަށްވެސް ހުޅުވާލެވުފައި އޮތް ނަމަވެސް ހަމަހަމަކަން ގާއިމް ނުކުރެވޭ ކަމަށެވެ. އެގޮތުން މަޖިލީހަށް ބަލާލާއިރު، މަޖިލީހުގައި 93 ދާއިރާ ހިމެނޭ އިރު އެންމެ ތިން އަންހެނުން މަޖިލީހަށް އިންތިޚާބު ވުމަކީ ހަމަހަމަކަން ތޯ އޭނާ ސުވާލު ކުރެއްވިއެވެ.

މިއާއެކު ރޮޒައިނާ ވިދާޅުވީ މަޖިލީހަށް ކުރިމަތިލުމުގެ ފުރުސަތު އަންހެނުންނަށް އޮތް ނަމަވެސް، އެފަދަ މަގާމަކަށް ކުރިމަތިލާ ފިރިހެނަކަށްވުރެ އަންހެން މީހާއަށް ކުރިމަތިވާ ގޮންޖެހުންތައް ގިނަކަމަށެވެ.

“އެވްރެޖް ގޮތެއްގައި ފިރިހެނުންނަށް ހުންނަ ފުރުސަތު ތަކަށްވުރެ އަންހެނުންނަށް މި މަސައްކަތް ކުރަން ނުކުންނަ އިރު ދިމާވާ ގޮންޖެހުންތަކާ ލިބޭ ފުރުސަތުތައް ކުޑަ ވާހަކަ.” ރޮޒައިނާ ވިދާޅުވިއެވެ.

ފުރަތަމަ ކަމަކަށް ބަލާއިރު ފައިސާ. ހަމަ، އަޅުގަނޑުމެން އެންމެނަށް ވެސް އެނގޭ، ފިރިހެނުންގެ އަމިއްލަ ފައިސާގެ މިނިވަންކަން އޮންނަ ވަރަށް އަންހެނުންގެ ނޯންނަކަން. މިސާލަކަށް ރާއްޖޭގައިވެސް، 1000 ފިރިހެނުންގެ ތެރެއިން އެމީހުންނާ އެއްވަރަށް ފައިސާ ލިބޭ ހުންނާނީ އެންމެ އަންހެނެއް ކަންނޭނގެ މިފަދަ ކަމަކަށް ބޭނުންވާ ފައިސާގެ އަދަދަށް ބަލާއިރު. އެވަރުވެސް ހިޔެއް ނުވޭ ވާނެ ހެން. ގިބަ ފަހަރަށް އެކި އެހެން ބޭފުޅުންގެ އެހީތެރި ކަމާއެކީގައި މިކަންކަން ކޮށްފައި އޮންނަނީ. އަމިއްލަ އަށްވުރެ ބޮޑަށް

ރޮޒައިނާ އާދަމް

މީގެ އިތުރުން ރޮޒައިނާ ވަނީ ސިޔާސީ ޕާޓީތަކުގެ އިސް ސަފުން އަންހެނުން ފެންނަ މިންވަރު މަދުއިރު، ސިޔާސީ ދާއިރާގެ އިސް ސަފުން ފެންނަ އަންހެނުންނަށް މީސްމީޑިއާގައި ކުރާ ފުރައްސާރަވެސް އިންތުހާއަށް ގިނަ ކަމަށެވެ. އެ ސަބަބާއި ހުރެ “ރޭސް ފަށާއިރުވެސް އަންހެނުން ތިބެނީ މާ ފަހަތުގައި” ކަމަށް އޭނާ ވިދާޅުވިއެވެ.

ރޮޒައިނާ ވިދާޅުވި ގޮތުގައި އަންހެނުންނަށް ފުރުސަތު ހޯދައިދޭ ވާހަކަ ދައްކަވަނީ މަޖިލީހުގައި ފިރިހެނުންނާއި އެއްވަރަށް އަންހެނުން ތިބުމަކީ މުޅި ގައުމަށްވެސް ފައުދާ ވާނެ ކަމަކަށްވާތީ ކަމަށެވެ. އެހެނީ ދެޖިންސު އެއްވަރަށް ތިބެގެން މަސައްކަތް ކުރާ ނަމަ، މާ މޮޅެތި ބިނާކުރަނިވި ޚިޔާލުތައް އަންނަކަން ދިރާސާ ތަކުން ދައްކާ ކަމަށް އޭނާ ވިދާޅުވިއެވެ.

އެހެންކަމުން މަޖިލީހުގައި އަދި މަޖިލީހުގެ ކޮމިޓީ ތަކުގައި އަންހެނުން ނެތުމުން ވަރަށް ބޮޑު އެއްޗެއް ގެއްލިގެންދާ ކަމަށް ރޮޒައިނާ ވިދާޅުވިއެވެ. އަދި އެ ސަބަބަށްޓަކައި މަޖިލީހުގެ 30 އިންސައްތަ އަކީ އަންހެނުން ކަން ކަނޑައަޅަން ޖެހޭ ކަމަށްވެސް ބުންޏެވެ.