ކޮންގްރެސްގައި 986 އަށްވުރެ ގިނަ ކޮންގްރެސްމަނުން ބައިވެރިވާނެ: އެމްޑީޕީ

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ކުރިއަށް އޮތް ކޮންގްރެސްގައި ބައިވެރިވުމަށް 986 އަށް ވުރެ ގިނަ މަންދޫބުން މިހާތަނަށް ރަޖިސްޓްރީވެފައިވާ ކަމަށް އެ ޕާޓީން ހާމަކޮށްފިއެވެ.

މިކަމާ ގުޅޭގޮތުން މައުލޫމާތު ދެއްވަމުން މިއަދު ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ޗެއަރޕާސަންގެ ނައިބު މުހައްމަދު ޝިފާޒު (ޝިއްޕެ) ވިދާޅުވީ، ކޮންގްރެސްގައި ބައިވެރިވުމަށް އޮންލައިންކޮށް ރަޖިސްޓްރީވުމުގެ ފުރުސަތު މި މަހުގެ 20 އިން 25 ގެ ނިޔަލަށް ހުޅުވާލާފައިވާ ކަމަށެވެ.

އަދި ރަޖިސްޓްރޭޝަނަށް ހުޅުވާލި ފުރަތަމަ ދުވަހު ވެސް ޝަރުތުހަމަވާ ކޮންގްރެސްމަނުންގެ ދެބައިކުޅަ އެއްބައި މީހުން ރަޖިސްޓްރީވެފައިވާ ކަމަށާއި، މިއަދުގެ ނިޔަލަށް ހުރިހާ މަންދޫބުން ރަޖިސްޓްރީވެ ނިމޭނެ ކަމަށް ލަފާކުރެވޭ ކަމަށް ވެސް ބުނެފައިވެއެވެ.

ރެޖިސްޓްރޭޝަނަށް ހުޅުވާލި ފުރަތަމަ 24 ގަޑިއިރު ނުނެނީސް ދެބައިކުޅަ އެއްބަޔަށްވުރެ މާގިނަ، 500 އަށްވުރެ ގިނަ ބޭފުޅުން އެއްދުވަސްތެރޭގައި ވަނީ ރެޖިސްޓާކޮށްފައި. އަޅުގަނޑު މި ބަލަނީ މިއަދު ނިމެންވާއިރަށް މި އަދަދު ޑަބަލްވާނެ ކަމަށް. ހަމަ ފުލް ކޮންގްރެސްމަނުން ބައިވެރިވާނެ ކޮންގްރެސް އަކަށް މި ކޮންގްރެސް ވާނެ.

ޝިފާޒު ވިދާޅުވިއެވެ

މީގެއިތުރުން، ކޮންގްރެސްއަށް ހާއްސަކޮށް ތައްޔާރުކޮށްފައިވާ ވެބްސައިޓް މެދުވެރިކޮށް ރަޖިސްޓްރީވުމުގެ އިތުރުން، މަންދޫބެއްގެ ގޮތުގައި ހިމެނޭތޯ ޗެކްކުރުމާއި، ކޮންގްރެސްއާ ގުޅޭ މައުލޫމާތުތައް ވެސް ލިބެން ހުންނާނެ ކަމަށް އޭނާ ވިދާޅުވިއެވެ. އަދި މަންދޫބުންގެ ގޮތުގައި ރަޖިސްޓްރީވާ ފަރާތްތަކަށް ކޮންގްރެސްގެ ކިޓު ހަވާލުކުރުން އޮންނާނީ މި މަހުގެ 29 އަދި 30 ވަނަ ދުވަހުއެވެ.

އެމްޑީޕީން ހާމަކޮށްފައިވާ ގޮތުގައި ކޮންގްރެސްގެ ހަރަކާތްތައް ތާވަލުކުރެވިފައިވާ ގޮތަކީ:

އޮކްޓޯބަރު 1 (ރޭގަނޑު): ކޮންގްރެސް ރަސްމީކޮށް ހުޅުވުމުގެ ރަސްމިއްޔާތު.

އޮކްޓޯބަރު 2 (މެންދުރުފަސް): ހާއްސަ އިންވެސްޓްމެންޓް ފޯރަމް.

އޮކްޓޯބަރު 3 (މެންދުރުފަސް): ރަސްމީ ކޮންގްރެސްގެ ޖަލްސާތައް ފެށުން.

އޮކްޓޯބަރު 3 (ރޭގަނޑު): ޕާޓީގެ އަސާސީ ގަވައިދަށް ހުށަހަޅާ އިސްލާހުތައް ފާސްކުރުން.

މިފަހަރުގެ ކޮންގްރެސްގެ ޝިއާރެއްގެ ގޮތުގައި އެމްޑީޕީން ކަނޑައަޅާފައިވަނީ ”ރަށްވެހި އުފެއްދުން“ މި ޝިއާރެވެ. މި ޝިއާރުގެ ދަށުން، އެ ޕާޓީގެ މެޖޯރިޓީ އޮންނަ ރަށު ކައުންސިލްތަކުން ރަށްރަށުގައި ހިންގަން ބޭނުންވާ ތަރައްގީގެ މަޝްރޫއުތައް ދެނެގަނެ، އެ މަޝްރޫއުތަކަށް ބޭނުންވާ އިންވެސްޓަރުން ހޯދައި، ޕާޓީގެ އެހީތެރިކަމާއެކު އެ މަސައްކަތްތައް ކުރިއަށް ގެންދެވޭނެ އިންތިޒާމުތައް ހަމަޖެއްސުމަށް ވަނީ ރޭވިފައެވެ.