މިއަހަރު ތެރޭ ތިން ސަރަހައްދެއްގައި ރިހެބިލިޓޭޝަން ސެންޓަރުތައް ހެދިގެންދާނެ: އިހުސާން

މިއަހަރު ތެރޭ ތިން ސަރަހައްދެއްގައި ރިހެބިލިޓޭޝަން ސެންޓަރުތައް ހެދިގެންދާނެ ކަމަށް ދާހިލީ ވަޒީރު ޢަލީ އިޙްސާން ވިދާޅުވެއްޖެއެވެ.

ވަޒީރު މިފަދައިން ވިދާޅުވީ ރިޔާސީ ބަޔާން 2025 ފޯރަމް"ގައި ވާހަކަ ދައްކަވަމުންނެވެ.

މި ފޯރަމްގައި ވާހަކަ ދައްކަވަަމުން ވަޒީރު ވަނީ މި ސަރުކާރާ ހަވާލުވިއިރު ފަރުވާ ނުފެށި 700 މީހުން ތިބި ކަމަށާއި އޭގެ ތެރެއިން 85 ޕަސެންޓް މީހުންނަށް ފަރުވާދޭން ފަށައި އޭގެ ތެރެއިން ގިނަ ބަޔަކު ފަރުވާ ފުރިހަމަކޮށްފައިވާކަމަށެވެ.

ވަޒީރު ވިދާޅުވީ މާލޭގެ މަގުމަތީގައި ސަލާންޖެހުމާއި ޑްރަގް ބޭނުންކޮށްގެން މަގުމައްޗަށް ވެއްޓި ތިބޭ މަންޒަރު މިހާރު މަދުވާނެ ކަމަށާއި އެ މީހުންނަށް ފަރުވާ ދެމުން އަންނަނީ ރިމާންޑް ސެންޓަރުން ކަމަށެވެ. ވަޒީރު ވަނީ ކާމިޔާބު ރިހެބިލިޓޭޝަން ފަރުވާގެ މިސާލެއްވެސް ދައްކަވާފައެވެ.

އާންމު ގޮތެއްގައި މަޖީދީމަގުގަ ހުންނަ އޭޓީއެމް މެޝިން ހުންނަ ސަރަހައްދުން ފެންނަ ފަރާތް މިހާރު ޑްރަގުގެ ވަބާއިން ދުރުވެ އެ ފަރާތް މިހާރު ރާއްޖޭގައި މަރުކަޒީ ގޮތެއްގައި ހިންގާ އިލެކްޓްރިކަލް އިންޖިނިއަރިންގ ކޯހެއްގައި ދަނީ ކިޔަވަމުން. އަދި އޭނާއަކީ އާދަޔާ ޚިލާފަށް ކުރެހުމުގެ ހުނަރު ލިބިފައިވާ ފަރާތެއް. އަޅުގަނޑުމެން އެ ވަސީލަތްތައް ހޯދައިދީ މިހާރު އެ އާޓު ތަންތަނުގައި ޑިސްޕްލޭ ކުރެވި ވިއްކޭނޭ މަގު ވަނީ ހޯދައިދީފަ

ދާހިލީ ވަޒީރު ޢަލީ އިހުސާން

ވަޒީރު ވިދާޅުވީ ޑްރަގް ޑިމާންޑް ދަށްކުރުމަށް ކުރަމުންދާ މަސައްކަތް މިއަހަރުގެ ތެރޭގައި ފެނިގެންދާނެ ކަމަށާއި މަސްތުވާތަކެތި ބޭނުންކުރާ ފަރާތްތަކަށް ކޮމިއުނިޓީ ބޭސްޑް ރީހެބިލިޓޭޝަން ޕްރޮގްރާމް ހިންގުމަށްޓަކައި، ވަޢުދު ވެފައިވާ ގޮތަށް، ލ. ގަން، ނ. ވެލިދޫ އަދި ކ. ކާށިދޫގައި ގާއިމްކުރާ މަރުކަޒުތައް މިއަހަރުގެ ތެރޭގައި ހެދިގެންދާނެ ކަމަށެވެ.

މާލެ ސަރަހައްދު ފިޔަވާ މިވަގުތު ރިހެބިލިޓޭޝަން ފަރުވާ ލިބެނީ އަތޮޅުތެރޭގެ ތިން ސަރަހައްދަކުންނެވެ. އެއީ ކ. ހިންމަފުށި، ގދ. ތިނަދޫ، ހދ. ހަނިމާދޫ އެވެ. މާލެ ސަރަހައްދުން ޑްރަގް ރިހެބިލިޓޭޝަން ފަރުވާ ލިބެނީ ގުޅީފަޅު ޑްރަގް ރިމާންޑް ސެންޓަރ، ހުޅުމާލެ ހާފްވޭ ހައުސް އަދި ކޮމިއުނިޓީ ސާވިސް ސެންޓަރ ހިމެނެއެވެ.