ސްކޫލްތަކުގެ ނަން ބޭނުން ކޮށްގެން ޔޫނިއަން ހެދުމަކީ ހުއްދަކަމެއް ނޫން: ވަޒީރު

ސުކޫލުތަކުގެ ނަންނަމުގައި ޔޫނިއަންތައް އުފެއްދުމަކީ ޔޫނިއަންތައް އުފެއްދުމުގެ ޤަވާއުދާ ޚިލާފް ކަމެއް ކަމަށް އެޑިއުކޭޝަން މިނިސްޓަރު ޑރ. އިސްމާޢީލް ޝަފީޢު މިއަދު ވިދާޅުވެއްޖެއެވެ.

މިއަދު މަޖިލީހުގެ ޖަލްސާގައި ކެންދޫ ދާއިރާގެ އެމްޑީޕީ މެންބަރު މަޢުރޫފް ޛާކިރުގެ ސުވާލަކަށް ޖަވާބުދެއްވަމުން ޝަފީޢު ވިދާޅުވީ، ޔޫނިއަން ރަޖިސްޓްރީކުރުމާބެހޭ ގަވައިދުގައިވާ ގޮތުން ޔޫނިއަންގެ ނަމުގައި ބައެއް ކަހަލަ ނަންނަން ބޭނުމެއް ނުކުރެވޭނެއެވެ.

އޭގެ ތެރޭގައި ދިވެހި ދައުލަތުގެ ނުވަތަ ސަރުކާރުގެ މުއައްސަސާއެއްގެ ނަމެއް، ނުވަތަ އެފަދަ ނަމަކާ އޮޅުންއަރާފާނެ ފަދަ ނަމެއް ޔޫނިއަކަށް ނުކިޔޭނެ ކަމަށް ބަޔާންކޮށްފައިވާ ކަން ވަޒީރު ފާހަގަކުރެއްވިއެވެ.

އާއްމު ކުންފުނިތަކާ އިދާރާތަކާ ޚިލާފަށް ސުކޫލު މަދަރުސާތަކަކީ ޚާއްސަ ސިފަތަކެއް ލިބިގެންވާތަނެއް. ޚާއްސަ ހިފެހެއްޓުންތަކެއް ހުންނަތަނެއް. ސުކޫލުތަކަކީ ވަރަށް ގިނަ ބައެއްގެ އިހްސާސްތަކާ ހިތާއި ގުޅިފައިވާތަނެއް.

ވަޒީރު ޝަފީޢު

ވަޒީރު އިތުރަށް ވިދާޅުވީ މުދައްރިސުންގެ ހައްގުތައް ހިމާޔަތްކުރުމަށް ބޭރު ގައުމުތަކުގައިވެސް ޔޫނިއަންތައް އުފައްދައިފައިވާ ކަމަށާ، އެ ޔޫނިއަންތައް އުފައްދާފައި ހުންނަނީ ގައުމީ ފެންވަރުގައި، ނުވަތަ އެ ސަރަހައްދަކަށް ނިސްބަތްކޮށް ކަމަށެވެ.

އަދި ޔޫނިއަން ތަކުގެ ޤަވާއިދަށް ބަލާއިރު ސްކޫލުތަކުގެ ނަންތައް ބޭނުންކޮށްގެން ޔޫނިއަންތައް އުފެއްދިދާނެ ކަމަށް ގަބޫލުނުކުރައްވާ ކަމަށްވެސް ވިދާޅުވިއެވެ.

"އެ ރަޖިސްޓްރީކުރެވިފައި އޮތީ އެންމެ ރަނގަޅު ގޮތަކަށް ކަމަށް އަޅުގަނޑުމެން ނުދެކެން، އެ މައްސަލަ މިހާރު އަޅުގަނޑުމެން ވާނީ ޔޫނިއަންގެ ރަޖިސްޓްރާއަށް ހުށަހެޅުމަށްޓަކައި ތައްޔާރުވަމުން، ސްކޫލުގެ ޕްރިންސިޕަލް އަމަލުކޮށްފައިވަނީ މިނިސްޓްރީ އޮފް އެޑިއުކޭޝަން ދެއްވައިފައިވާ އިރުޝާދާ އެއްގޮތަށް،"

ވަޒީރު ޝަފީޢު

ވަޒީރު ވިދާޅުވީ ޓީޗަރުންގެ ހައްގުތައް ހިމާޔަތް ކުރުމަށް ރާއްޖޭގައިވެސް ޓީޗާސް އެސޯސިއޭޝަން ނަމުގައި ޖަމިއްޔާއެއް އޮންނަ ކަމަށާ، އެ އެސޯސިއޭޝަނުގެ ކަންބޮޑުވުންތައް އަހައި، އަމިއްލަ އިސްނެންގެވުމަށްވެސް ގުޅުއްވައި ޚިޔާލު ހޯއްދަވާ ކަމަށެވެ.