އޮގަސްޓް މަހުން ފެށިގެން ފަންނާނުންނަށް ހިލޭ އެހީ ދޫކުރަނީ
އަންނަ އޮގަސްޓް މަހުން ފެށިގެން ފަންނާނުންނަށް ހާއްސަކޮށް ހިލޭ އެހީއެއް ދޭން ނިންމާފައިވާކަމަށާއި، އެކަމާއި ގުޅިގެން ކުރަންޖެހޭ މަސައްކަތްތަށް ކުރަމުން އަންނަކަމަށް ޔޫތު މިނިސްޓަރު އިބްރާހީމް ވަހީދު ވިދާޅުވެއްޖެއެވެ.
ޕީއެސްއެމް އިން ކުރިއަށް ގެންދާ އަހާ ފޯރަމްގައި ވާހަކަދައްކަވަމުން މިނިސްޓަރު ވިދާޅުވީ، މިކަމާއި ގުޅިގެން ކުރަންޖެހޭ މަސައްކަތްތައް، ބިޒްނަސް ސެންޓަރ ކޯޕަރޭޝަނާ ގުޅިގެން ކުރިއަށްގެންދާ ކަމަށެވެ. އަދި މި ފެށޭ އޮގަސްޓް މަހުން ފެށިގެން ފަންނާނުންނަށް އެ އެހީ ދިނުމަކީ އަމާޒެއްކަމަށާ، މި އެހީއަށް އެދޭ ޕޯޓަލް މެދުވެރިކޮށް، އެހީއަށް އެދެވޭނެ ކަމަށް މިނިސްޓަރު އިތުރަށް ވިދާޅުވިއެވެ.
"ހިލޭ އެހީގެ ގޮތުގައި ދޭ ފައިސާގެ ފުރަތަމަ ބެޗު ފަށަން އުންމީދުކުރަނީ އޮގަސްޓުގައި. އެކަމަށް އުސޫލުތައް ތައްޔާރު ކުރެވިއްޖެ. އެކަން މިކުރަނީ ޕޯޓަލްއެއް މެދުވެރިކޮށް. ޕޯޓަލް ހެދުމަށް ވަގުތުކޮޅެއް ނަގާނެ. އޭގަ ހުންނަ ބަގްސް އަޅުގަނޑުމެން ފިލުވަން ޖެހޭނެ. ޓެސްޓު ކުރަން ޖެހޭނެ."
މިނިސްޓަރު ވިދާޅުވިއެވެ.
މިނިސްޓަރު ވިދާޅުވި ގޮތުގައި މިއަހަރުގެ ތެރޭގައި ޕްރޮޑަކްޝަން ހައުސް ހުޅުވާލައި، ފަންނާނުންނަށް އެތަނުގެ ބޭނުން ހިފޭނެ ގޮތަށް އެތަން ތަރައްގީކުރުމުގެ މަސައްކަތް ކުރިއަށްގެންދިއުމަށް ނިންމާފައިވާކަމަށާއި ކުރިއަށް އޮތްތަނުގައި ފަންނާނުންނަށް އެކި އެކި ގޮތްގޮތުން އެހީތެރިކަން ފޯރުކޮށްދޭނަ ނިންމާފައިވާ ކަމަށް މިނިސްޓަރު ވިދާޅުވިއެވެ.
ފަންނާނުންނަށް އެހީތެރިވުމުގެ ގޮތުން، ދައުލަތުގެ ބަޖެޓުން 25 މިލިއަން ރުފިޔާގެ ހިލޭ އެހީއެއް ދިނުމަށް ސަރުކާރުން ނިންމާފައިވާކަން ފާހަގަކޮށްލަންޖެހެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
