ރާއްޖެ އިސްލާމްވި ދުވަސް ފާހަގަކުރުމަށް ޒުވާން ޚަޠީބުންގެ މަހާސިންތާއެއް؛ ޙަރަމްފުޅުގެ އިމާމަށް ދަޢުވަތު ދީފި

ދިވެހިރާއްޖެ އިސްލާމްވީތާ 900 އަހަރު ފުރުމުގެ މުނާސަބަތާ ގުޅުވައިގެން، ޒުވާން ޚަޠީބުންގެ ޤައުމީ މަހާސިންތާއެއް ބޭއްވުމަށް އިސްލާމީ ކަންތައްތަކާ ބެހޭ މިނިސްޓްރީން ނިންމައިފިއެވެ.

މި މަހާސިންތާ ބޭއްވުމަށް ހަމަޖެހިފައިވަނީ ރާއްޖެ އިސްލާމްވި ދުވަހުގެ ގޮތުގައި ފާހަގަކުރާ 13 ސެޕްޓެމްބަރު 2026 ވަނަ ދުވަހުއެވެ.

އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ހާމަކުރެއްވި ގޮތުގައި، މި މަހާސިންތާއަށް މައްކާގެ މަސްޖިދުލް ޙަރަމްގެ އިމާމު، ފަޟީލަތުއްޝައިޚު ޑރ. ޔާސިރް އައްދައުސަރީއަށް މިހާރު ވަނީ ދަޢުވަތު ފޮނުއްވާފައެވެ.

މިއީ ރާއްޖޭގެ ކުރިއަށް އޮތް އިސްލާމީ ޤަރުނުގައި، އިސްލާމީ ޝިޢާރު ފާޅުކުރުމުގެ އިސްދައުރު އަދާކުރާނެ ޒުވާން ޚަޠީބުންނާއި ޙާފިޒުންނަށް ބާއްވާ ވަރަށް މުހިންމު ބައްދަލުވުމެއް ކަމަށް ވަޒީރު ފާހަގަކުރެއްވިއެވެ.

މިނިސްޓަރު ވިދާޅުވިގޮތިގައި، މިނިސްޓްރީން ތަމްރީންކުރާ 1000 ޒުވާން އިމާމުންނާއި ޚަޠީބުންގެ އިތުރުން ރާއްޖޭގެ ޒުވާން ޙާފިޒުންނަށް މި މަހާސިންތާގައި ބައިވެރިވުމުގެ ފުރުޞަތު ހަމަޖެހިގެންދާނެއެވެ.

މިވަގުތު ރާއްޖޭގެ ޙާފިޒުންގެ ދަފްތަރުގައި 307 ޙާފިޒުން ތިއްބެވިއިރު، ޒުވާން ޚަޠީބުންގެ އަދަދަކީ 532 އެވެ. ނަމަވެސް، އިސްލާމީ ކަންތައްތަކާ ބެހޭ މިނިސްޓްރީގެ އަމާޒަކީ މިއަހަރުގެ ސެޕްޓެމްބަރު މަހުގެ ކުރިން 1000 ޒުވާން ޚަޠީބުން ތަމްރީންކޮށް ނިންމުން ކަމަށް ޝަހީމް ވިދާޅުވިއެވެ.

ވަޒީރު ޝަހީމް ވަނީ މި މަހާސިންތާއަށް މިހާރުން ފެށިގެން ތައްޔާރުވުމަށް ޒުވާން ޚަޠީބުންނަށް އިލްތިމާސްކުރައްވާފައެވެ. އެގޮތުން އިމާމުކަމުގެ ހެދުންކޮޅާއި ތާކިހާކޮޅު ތައްޔާރުކުރެއްވުމަށް ވަނީ އެދިވަޑައިގެންފައެވެ.

މި މަހާސިންތާގައި ބައިވެރިވާން ބޭނުންވާ ފަރާތްތަކުން ފޯމް ހުށަހެޅުމުގެ ފުރުޞަތު މި މަހުގެ ތެރޭގައި މިނިސްޓްރީން ރަސްމީކޮށް އިޢުލާންކުރާނެ ކަމަށް ޝަހީމް ވިދާޅުވިއެވެ.