އިލެކްޓްރޯނިކް މޮނިޓަރިންގްޓެގްގެ ނިޒާމް ޤާއިމް ކުރީ އަޅުގަނޑުމެން: ޢިމްރާން

އިލެކްޓްރޯނިކް މޮނިޓަރިންގްޓެގްގެ ނިޒާމަކީ ރައީސް އިބްރާހިމް މުޙަންމަދު ޞާލިޙްގެ ވެރިކަމުގައި, ޤާއިމް ކުރި ނިޒާމެއް ކަމަށް، އޭރުގެ ދާޚިލީ ވަޒީރު ޢިމްރާން ޢަބްދުالله ވިދާޅުވެއްޖެއެވެ.

ޝަރީޢަތް ނިމެންދެން ބަންދުގައި ތިބި މީހުންގެ މައްސަލަތަކަށް ޙައްލެއް ހޯދުމަށްޓަކާ ދައުލަތުގެ އިދާރާތަކުން ގުޅިގެން ކުރަންފަށާފައިވާ މަސައްކަތްތަކުގެ ތެރެއިން ކޯޓުން ކަނޑައަޅާފައިވާ ޝަރުތުތަކާއެކު އިލެކްޓްރޯނިކް މޮނިޓަރިންގ ނިޒާމެއްގެ ތެރެއިން ބަންދަށް ލުއި ދިނުމުގެ ކަންކަން އިއްޔެ ވަނީ ފަށާފައެވެ.

އެގޮތުން، ދެމީހަކު އިއްޔެ ދޫކޮށްލާފައިވާއިރު، މިއަދު 5 މީހުން ދޫކޮށްލުމާ ގުޅޭގޮތުން ގޮތެއް ނިންމަން ކޯޓަށް ހާޒިރު ކުރާނެ ކަމަށް ޕީޖީ އޮފީހުން ވަނީ ބުނެފައެވެ.

‏އެކަމާއި ގުޅިގެން ޢިމްރާން އެކްސްގައި ކުރެއްވި ޕޯސްޓެއްގައި ވަނީ، މިސަރުކާރުން އެކަން ކުރަން އުޅެނީ، ބޮޑެތި ކުށްކުރާމީހުންގެ ތެރޭގައި ހިމެނޭ، ރައީސުލް ޖުމްހޫރިއްޔާގެ ތިމާގެ ބޭފުޅުންނާއި ރައްޓެހިންނާއި ހިއްޕުޅާވާ ބޭފުޅުން މަގުމައްޗަށް ދޫކޮށްލަން ކަމަށް ތުހުމަތު ކުރައްވާފައެވެ.

‏ތިޔަ ހައްދަނީ ވަރަށްބޮޑު ގޯހެއް. ހުރިހާ ރައްޔިތުން ތިޔަ ވައްޓަވާލައްވަނީ ވަރަށްބޮޑު ނުރައްކަލެއްގެ ތެރެއަށް. ތިޔަ އުޅުއްވަނީ ކޮންބައެއް ދޫކޮށްލައްވަން ކަން އަޅުގަނޑުމެނަށް އެނގޭ.

ޢިމްރާން ޢަބްދުالله

ކުށްވެރިންގެ ޓެގު އެޅުވުމުގެ ނިޒާމަކީ ރައީސް ޞާލިޙް ފެއްޓެވި ކަމެއް ކަމުގައި ޢިމްރާން ވިދާޅުވިއިރު، ފުލުހުންނާއި ހޯމް މިނިސްޓްރީ އަދި ކަރެކްޝަންސް ސާވިސް ގުޅިގެން ކުށްވެރިންގެ ފައިގައި ޓެގު އެޅުވުމުގެ މަސައްކަތް ފެށީ 2015 ވަނަ އަހަރުގެ ނޮވެމްބަރު މަހުގެ ފަސް ވަނަ ދުވަހުގަ އެވެ.

އެދުވަހު އަމިއްލަ ކުންފުންޏަކާއެކު ވެވުނު އެއްބަސްވުމެއްގެ ދަށުން ޓެގް ރާއްޖެ ގެނެސްފައިވާއިރު، އޭރުގެ ހޯމް މިނިސްޓަރ ޢުމަރު ނަޞީރުގެ މިނިސްޓަރު ކަމުގައި ނުރައްކާތެރި ކުށްވެރިންގެ ޓެގް އަޅުވައި މޮނީޓާ ކުރުމުގެ ކަންކަން ވަނީ ކުރިއަށް ގެންގޮސްފައެވެ.

ނަމަވެސް ފަހުން އެކަން ހުއްޓާލާފައި އޮއްވާ އަލުން ފެށީ ޞާލިޙްގެ ވެރިކަމުގައެވެ.