ގުރައިދޫގައި ނިޔާވި ތުއްތު ކުއްޖާގެ ހަށިގަނޑު، ޕޯސްޓްމޯޓަމް ހެދުމަށް ބޭރަށް ފޮނުވައިފި

ކ.ގުރައިދޫގައި މިދިޔަ ހުކުރުދުވަހުގެ ރޭ ނިޔާވި އުމުރުން 4 މަހުގެ ކުއްޖާގެ ހަށިގަނޑު ޕޯސްޓްމޯޓަމް ހެދުމަށް ރާއްޖެއިން ބޭރަށް ފޮނުވައިފިއެވެ.

ކުއްޖާގެ ހަށިގަނޑު ޕޯސްޓްމޯޓަމް ހެދުމަށް އިންޑިއާއަށް މިއަދު ފޮނުވާފައިވާއިރު، ފުލުހުން ބުނެފައިވަނީ، ކުއްޖާގެ މަރުގެ މައްސަލަ ތަހުގީގުކުރަން ޖެހުނީ ޝައްކުކުރެވޭ ކަންތައްތަކެއް ހުރުމުން ކަމަށެވެ. ތުއްތު ކުއްޖާ މަރުގެ މައްސަލަ ފުލުހުންގެ ސަމާލުކަމަށް އައިސްފައިވަނީ، ހުކުރުދުވަހުގެ ދަންވަރުގެ ވަގުތެއްގައި އެކުއްޖާ ހޮސްޕިޓަލަށް ގެނައި ހިސާބުންނެވެ.

ވޮއިސްއަށް މައުލޫމާތު ލިބިފައިވާ ގޮތުގައި އެކުއްޖާގެ މަރުގައި ފާހަގަކުރެވޭ ކަންތައްތަކެއް ހުރުމުން ފުލުހުންގެ ސަމާލުކަމަށް ގެނެސްފައިވަނީ ކުއްޖާ ބެއްލެވި ޑޮކްޓަރެވެ. އެ ކުއްޖާ ހޮސްޕިޓަލަށް ގެނައި އިރުވެސް އޮތީ ނިޔާވެފައެވެ.

ނުޖެހުމަށް ޝަރުތުކޮށް ވޮއިސްއާ ވާހަކަދައްކަމުން އެރަށު މީހަކު ބުނީ ކުއްޖާގެ ނޭފަތުންވެސް ލޭ އައިސްފައި ހުރިކަމަށެވެ. ކުއްޖާ ހިނެވުމުގެ މަސައްކަތް ކުރިއަށްގެންދަން އުޅުނު ނަމަވެސް އެކަން ނުވީ، ކުއްޖާ މަރުގެ މައްސަލަ ބަލުމަށް ހަށިގަނޑު މާލެގެންދަންޖެހޭކަމަށް ފުލުހުން ބުނުމުންކަމަށްވެސް އޭނާ ބުންޏެވެ.

ބޭރަށް ފޮނުވެންދެން ކުއްޖާގެ ހަށިގަނޑު ބައްވާފައި އޮތީ ގަލޮޅު މޯޗަރީގައެވެ.