ރާއްޖޭގައި މިހާތަނަށް 76 މީހަކަށް އެޗްއައިވީ ޖެހިފައިވޭ؛ ދުނިޔޭގައި ތިބީ 52 މީހުން: ޤީލާ
ލިޔުންތެރިޔާ
ޚަދީޖާ އަރުފާ
ރާއްޖެއިން މިހާތަނަށް އެޗްއައިވީގެ 76 ވޭދަނައެއް ރެކޯޑުކޮށްފައިވާ ކަމަށާއި އޭގެ ތެރެއިން މިހާރު ދުނިޔޭގައި ތިބީ 52 މީހުން ކަމަށް ހެލްތް މިނިސްޓަރު ގީލާ ޢަލީ ވިދާޅުވެއްޖެއެވެ.
ދިވެހިރާއްޖޭގެ އަޑުން މިދިޔަ އާދީއްތަ ދުވަހު ގެނެސްދިން "އަހަށޭ ބުނާށޭ" ޕްރޮގްރާމުގައި ފިޖީ ފަދަ ކުޑަ ޤައުމެއްގައި އެޗްއައިވީ ހައްދުން ނެއްޓި ކުއްލި ހާލަތު އިޢުލާނުކޮށްފައިވާ ދަނޑިވަޅެއްގައި ރާއްޖޭގެ ހާލަތާ ގުޅޭ ގޮތުން ޕްރެޒެންޓަރު ކުރެއްވި ސުވާލަށް ޖަވާބު ދެއްވަމުން ގީލާ ވިދާޅުވީ 1991 ވަނަ އަހަރު ރާއްޖެއިން ފުރަތަމަ ފަހަރަށް އެޗްއައިވީ ފެނުނު ކަމަށެވެ.
އެ ދުވަސްވަރު އޭނާ މަސައްކަތްކުރައްވަމުން ގެންދެވީ ފަންނީ މަސައްކަތްތެރިއެއްގެ ގޮތުގައި ކަމަށާއި ފުރަތަމަ ވޭދަނައާ ގުޅިގެން ރައްޔިތުންގެ ހިތްތަކުގައި ބިރުވެރިކަމާއި ކަންބޮޑުވުން އުފެދިގެން ދިޔަ ކަން ފާހަގަކުރެއްވިއެވެ.
ނަމަވެސް މިހާތަނަށް އައިއިރު ބަލިފެތުރޭ ގޮތްތަކާއި، ފަރުވާއާއި ގުޅިގެން ލިބިފައިވާ ކުރިއެރުންތަކާ ގުޅޭގޮތުން ރައްޔިތުންގެ ހޭލުންތެރިކަން ވަރަށް ބޮޑަށް އިތުރުވެފައިވާކަމަށް ގީލާ ވިދާޅުވުއެވެ.
މިހާތަނަށް އަޅުގަނޑުމެންގެ ރެކޯޑްތަކުން ދައްކަނީ 76 މީހަކަށް ރާއްޖޭގައި އެޗްއައިވީ ޖެހިގެން ރިޕޯޓް ކުރެވިގެންދިޔަ ކަމަށް. މިވަގުތު ދުނިޔޭގައި ތިބީ 52 މީހުން.
ވަޒީރު ޤީލާ ޢަލީ
ގީލާ ވިދާޅުވީ އެޗްއައިވީ ޖެހޭ މީހުންގެ ފަރުވާ ފޯރުކޮށްދިނުމާއި އާއިލާއަށް ބޭނުންވާ ކައުންސެލިން ދިނުމުގެ ކަންކަން ކުރިއަށް ގެންދަނީ ދައުލަތުން ގެންދާ ޚާއްސަ ޕްރޮގްރާމެއްގެ ތެރެއިން ކަމަށެވެ. އަަދި އެކަން ކުރަނީ ވަރަށް ރޭވުންތެރިކަމާއެކު ކަމަށާ، އަދި އެ އާއިލާއާއި މީހުންވެސް ސިއްރު ކުރެވިގެބް ކުރިއަށްދާ ކަމަށް ވިދާޅުވިއެވެ.
އެހެން ގައުމުތަކުގައި މި ބަލި ފެތުރިގެންދާގޮތަށް ރާއްޖޭގައި ފެތުރިގެން ނުދޭ. އަޅުގަނޑުމެންނަށް މިހާރު އެނގޭ ކޮންމެ ބަލިމީހަކަށްވެސް އެ ބަލި ވާސިލް ވުމަށް މެދުވެރިވީ ކޮން ސަބަބެއްކަން. އެހެންވީމާ އެވަރަށް މައުލޫމާތު ނެގިގެން ދަނީ.
ވަޒީރު ޤީލާ ޢަލީ
ރާއްޖެއިން އެންމެ ފުރަތަމަ އެޗްއައިވީ ފެނުނީ 1991 ވަނަ އަހަރުއެވެ. މި ބައްޔަށް މިހާތަނަށް ފަރުވާއެއް ހޯދިފައެއް ނުވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
