މާލޭ ރައްޔިތުންނަށް ގޯތި ދިނުމަށް ހިންގި މަޝްރޫޢުއަކީ ރާއްޖޭގައި މިހާތަނަށް ހިންގި އެންމެބޮޑު ހިޔާނާތް: ފަލާހު

ކުރީގެ ސަރުކާރުން މާލޭ ރައްޔިތުންނަށް ގޯތި ދިނުމަށް ހިންގި މަޝްރޫޢުއަކީ ރާއްޖޭގައި މިހާތަނަށް ހިންގި އެންމެބޮޑު ހިޔާނާތްކަމަށް ޕީއެންސީ ޕީޖީ ގްރޫޕްގެ ލީޑަރު އިބްރާހިމް ފަލާހް ވިދާޅުވެއްޖެއެވެ.

އެމްޑީޕީއަށް ނިސްބަތްވާ މެމްބަރުން މިއަދު ރައްޔިތުންގެ މަޖިލީހަށް ހައުސިން މިނިސްޓަރު އަލީ ހައިދަރު ހާޒިރުކުރުމާއި ގުޅޭގޮތުން ޕީއެންސީ ޕީޖީ ގްރޫޕުން މިހާރު ކުރިއަށްގެންދާ ނޫސްވެރިންގެ ބައްދަލުވުމުގައި ވާހަކަދައްކަވަމުން ޕީޖީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެމްބަރު އިބްރާހިމް ފަލާހު ވިދާޅުވީ، މާލޭ ރައްޔިތުންނަށް ގޯތި ދޫކުރުމުގެ ނަމުގައި މިދިޔަ ސަރުކާރުން ގެންދިޔައީ ބޮޑު ހިޔާނާތުގެ މަޝްރޫޢުއެއް ކަމަށެވެ. މިއީ މިހާތަނަށް ރާއްޖޭގައި ފެނިގެންދިޔަ އެންމެބޮޑު ހިޔާނާތްކަމަށާއި، މި ހިޔާނާތުގެ އަގު 5.4 ބިލިއަން ރުފިޔާއަށްވުރެބޮޑުކަމަށް ފަލާހު ވިދާޅުވިއެވެ.

ފަލާހު ވިދާޅުވީ ނިމިގެންދިޔަ ސަރުކާރުން ގޯތި ތަކަކާއި ފްލެޓްތަކެއް ރައްޔިތުންނަށް ދީފައިވާކަމަށް އެފަރާތްތަކުން ބުނަމުންދާ ކަމަށާއި، ނަމަވެސް ހަޤީގަތަކީ އެފަރާތްތަކުން ހަދާފައިވަނީ ލިސްޓެއް ކަމަށެވެ.

ލިސްޓެއް ހެދިކަމަށް ފާހަގަކުރާ މި ސަބަބަކީ އެއްޗެއްދިނުމާއި އެއްޗެއް ލިސްޓްކުރުމާ މީ ތަފާތު ދެކަމެއް. މިސާލަކަށް ގޯތިދިންއިރުގައި އޭގެ ތެރޭގައި ގިރާވަރުފަޅު ، ގުޅީފަޅު މި ތަންތަނުން މިހިރީ ނުހިއްކާ ވަރަށްގިނަ ތަންތަނުންވެސް ގޯތިތަކެއް ދޫކޮށްފަ. ހާއްސަކޮށް ހުޅުމާލެ ކަހަލަ މުޅި ރާއްޖޭގެ އެންމެން ޝާމިލްވާ ގޮތަށް ދައުލަތަށް ލިބިފައިހުރި ޓެކްސް ފައިސާއިން ހިއްކާފައިވާ ބޮޑުސިންގާ އަގުބޮޑު ބިމަކުން ހަމަ ރިޔާސީ އިންތިހާބަށް ގާތްގަނޑަކަށް މަހަކަށްވެ ދެމަހަށް ވެފައި ވަނިކޮށް މިއޮތީ ގޯތިތަކެއް ދޫކޮށްފަ.

ފަލާހް ވިދާޅުވިއެވެ.

ފަލާހް ވިދާޅުވީ ހުޅޫމާލެއާ، ގުޅީފަޅާ، ގިރާވަރުފަޅާ މި ތަންތަނުން ޖުމްލަ 9،100 އަށްވުރެގިނަ ގޯތި ދޫކޮށްފައިވާކަމަށެވެ. ކަރުދާސް ގަނޑެއްގައި ލިސްޓެއް އަދި ރަޖިސްޓްރީއެއް ހަދާފައި ދިނުމަކީ ވަރަށް ފަސޭހަކަމެއް ކަމަށާއި، ގޯތިތައް ދޫކުރުމުގައި އެމްޑީޕީ ސަރުކާރުން އަމަލުކޮށްފައިވަނީ ޒިންމާދާރު ސަރުކާރަކުން މިބާވަތުގެ ކަންކަމުގައި އަމަލުކުރާ އުސޫލްތަކާ މުޅިން އިދިކޮޅަށްކަމަށް ފަލާހް ވަނީ ފާހަގަކުރައްވާފައެވެ.

ނޫސްވެރިންގެ ބައްދަލުވުމުގައި ޕީޖީ ގްރޫޕްގެ ސީނިއާ ޑެޕިއުޓީ ލީޑަރު، އަދި ހއ.ބާރަށު ދާއިރާގެ މަޖިލީހުގެ މެމްބަރު އިބްރާހިމް ސުޖާއު ވިދާޅުވީ، ބިމާބެހޭ ޤާނޫނު އޮންނަގޮތުން ބަންޑާރަ ގޯތި ދޫކުރެވޭނީ އޮތް ބިމަކުން ކަމަށާއި، ނުވެސް ހިއްކާއޮތް ކަނޑުންނާއި ފަޅުފަޅުން މިދިޔަ ސަރުކާރުގައި ގޯތިތައް ދޫކޮށްފައިވާކަމަށެވެ. އެހެންކަމުން އެމްޑީޕީ ސަރުކާރުން ގޯތިތައް ދޫކޮށްފައިވަނީ ބިމާބެހޭ ޤާނޫނާވެސް ފުށުއަރާގޮތަށްކަމަށްވެސް ސުޖާއު ފާހަގަކުރެއްވިއެވެ.

އިތުރަށް ވާހަކަދައްކަވަމުން ސުޖާއު ވިދާޅުވީ، އެމްޑީޕީން އެކުލަވާލާފައިވާ ފްލެޓް ލިސްޓްގައި ހިމެނޭ ފްލެޓް ހައްގުވާ ފަރާތްތަކަށް އެ ފްލެޓްތައް ދޫކުރުމަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ރިޔާސީ ވައުދެއް ކަމަށާއި، އެކަން އެމަނިކުފާނު ކުރައްވާނޭ ކަމަށެވެ. ފްލެޓް ލިސްޓް ހިފަހައްޓާފައިވަނީ ސަރުކާރުން ނޫންކަމަށާއި، އޭސީސީން އެ ލިސްޓް ހިފަހައްޓާފައިވަނީ މިދިޔަ ވެރިކަމުގައި ކަމަށްވެސް ސުޖާއު ވިދާޅުވިއެވެ.