ރޯދަ މަހުގެ ކުރިން ތަކަންދޫ އާއި މާރެންދޫގައި އާރްޓީއެލްގެ ހިދުމަތް ފަށަނީ

ކުރިއަށް އޮތް ރަމަޟާން މަހުގެ ކުރިން ހއ.ތަކަންދޫ އާއި ހއ.މާރެންދޫގައި އާރުޓީއެލްގެ ހިދުމަތް ފަށާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސް ޑރ.މުޢިއްޒު މިފަދައިން ވިދާޅުވީ، އެމަނިކުފާނު ހއ އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ހއ.ތަކަންދޫއަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުންނެވެ.

ދަތުރުފަތުރުކުރުމުގައި ތަކަންދޫ ރައްޔިތުން އުފުލަންޖެހޭ ތަކުލީފުތައް ފާހަގަކުރައްވަމުން ރައީސް ޑރ.މުޢިއްޒު ވިދާޅުވީ، ފެރީގެ ނިޒާމުގައި ތަކަންދޫއަށް ކައިރި ކުރާނަމަ ލިބޭނެ ފަސޭހަތަށް ރައްޔިތުންގެ ފަރާތުން އަޑުއިވިފައިވާ ކަމަށެވެ.

މިއާއިއެކު ރައީސް ޑރ.މުޢިއްޒު ވަނީ ރޯދަ މަހުގެ ކުރިން އާރުޓީއެލް ފެރީ ތަކަންދޫ އަށާއި މާރެންދޫއަށް މަޑު ކުރާގޮތަށް ހަމަޖެހިގެންދާނެކަމަށާއި، މިކަމުގެ ސަބަބުން ރައްޔިތުންނަށް ވަރަށް ބޮޑަށް ފަސޭހަވެގެންދާނެކަމަށެވެ.

"އިރާދަކުރެއްވިއްޔާ ރޯދަ މަހުގެ ކުރިން މަތިބިތުން ދަތުރުކުރާ އާރްޓީއެލް ފެރީ ތަކަންދޫ އަށާއި މާރެންދޫއަށް މަޑުކޮށްފައިވާ ގޮތަށް އިންތިޒާމް ހަމަޖެހިގެންދާނެ. އޭރުން ތިބޭފުޅުންނަށް ބޮޑުތަނުން ފަސޭހަވާނެ،"

ރައީސް ޑރ.މުޢިއްޒު ވިދާޅުވިއެވެ.

މީގެ އިތުރުންވެސް ރައީސް ޑރ.މުޢިއްޒު ވަނީ ތަކަންދޫގެ ބަނދަރާއި، ސްކޫލް އަދި ސިއްހީ މަރުކަޒު އިތުރަށް ކުރިއެރުވުމަށް މަސައްކަތް ކުރައްވާނެ ކަމުގެ ޔަގީންކަންވެސް ދެއްވާފައެވެ.