ވިޔަފާރިވެރިން ސަރުކާރަށް ކުރި އިތުބާރާއި ޔަގީންކަން މުޅިން ގެއްލިއްޖެ: އަމީރު

މި ސަރުކާރާމެދު ވިޔަފާރިވެރިން ކުރި އިތުބާރާއި ޔަގީންކަން މުޅިން ގެއްލިގެން ހިނގައްޖެކަމަށް އެމްޑީޕީ ސަރުކާރުގެ މާލީ ވަޒީރު އިބްރާހިމް އަމީރު ވިދާޅުވެއްޖެއެވެ.

ސަރުކާރުގެ މާލީ ސިޔާސަތާ ގުޅޭގޮތުން މިއަދު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އަމީރު ވިދާޅުވީ، އަދުގެ ސަރުކާރުގެ މާލީ ސިޔާސަތުތައް މިއަދު ހުރީ، ވެރިކަމަށް އައުމަށް ކުރި ދަތުރުގައި ރައްޔިތުންނަށް ހިއްސާކުރި ގޮތަށް ނޫންކަމަށެވެ. ރިޔާސީ ކެމްޕެއިނުގައި ރައީސް ޑރ.މުއިއްޒު މާލީ ކަންކަމާއި ގުޅޭގޮތުން ދެއްކެވި ވާހަކަތަކަށް ރައްދު ދެއްވަމުން އަމީރު ވިދާޅުވީ، ސަރުކާރުން ސިޔާސީ މަޤާމުތައް އިތުރުނުވާނޭކަމަށް ބުނެފައިވާއިރު، ސިޔާސީ މަގާމުތައްވެސް އިންތިހާއަށް އިތުރުވެގެން ހިނގައްޖެ ކަމަށެވެ.

ޓެކްސް އިތުރުނުކޮށް ޓެކްސް ބޭސް ފުޅާކުރާނޭކަމަށް ސަރުކާރުން ބުނި ނަމަވެސް، މިއަދު ރައްޔިތުންގެ މަޖިލީހުގެ ތެރެއިން ބިލްތައް ވައްދައި، ސަރުކާރުން މަސައްކަތްކުރަނީ ޓެކްސް ރޭޓް އިތުރުކުރަން ކަމަށްވެސް އަމީރު ވިދާޅުވިއެވެ.

ވެރިކަމާ ހަވާލުވުމަށް ތައްޔާރުވަމުންދިޔައިރު، ބޭއްވި ޓްރާންސިޝަން ޕީރިއަޑުގެ ތެރޭގައި ބޭރުގެ އެކި ކަންކޮޅުތަކުން މާލީ އެހީލިބޭނޭކަމުގެ ފެހި ސިގްނަލްތަކުގެ ވާހަކަ ދެއްކެވިއިރު، މިހާތަނަށް މިކަމުގައިވެސް ލިބުނު ކުރިއެރުމެއް ނެތްކަމަށް އަމީރު ވިދާޅުވިއެވެ.

ޓްރާންސްސިޝަން މުއްދަތުގައި ބޭއްވި ބައްދަލުވުންތަކުގައި ސަރުކާރުން އޭރު ވިދާޅުވި އައިއެމްއެފްގެ އެހީތެރިކަންވެސް ބޭނުންނުވާކަމަށް އޭރު ވިދާޅުވި

އަމީރު ވިދާޅުވިއެވެ.

ބޭރުގެ އެކިކަންކޮޅުތަކުން އެހީނުލިބުމުން ބޮޑެތި އަދަދުތަކުން ލޯނު ނެގުމަށް މިއަދު ސަރުކާރަށް މަޖުބޫރުވެފައިވާކަމަށާއި، ސަރުކާރުން ކުރި ހަރަދުތަކާއެކު ޑޮލަރު ފަންޑުގައިވެސް މިއަދު އެއްވެސް އެއްޗެއް އޮންނާނޭކަމަށް ނުބެލެވޭކަމަށް އަމީރު ވަނީ ވިދާޅުވެފައެވެ.

އެމްޑީޕީ ވެރިކަމުގައި ދައުލަތުގެ މާލިއްޔަތުގެ ތެރެއިން މާލީ ގާނޫނާ ހިލާފަށް އުސޫލުން ބޭރުން އެއްވެސް ކަމެއް ކޮށްފައި ނުވާނޭކަން ފާހަގަކުރައްވަމުން އަމީރު ވަނީ އެފަދަ ކަމެއް ހިންގާފައިވާނަމަ އެކަން ސާފުކޮށް ހާމަކޮށްދެއްވުމަށްވެސް ގޮވާލާފައެވެ.