ދިރާސާތައްކޮށް ކަނޑު އަޑީގެ ވަސީލަތްތައް ދެނެގަނެ، އިޤްތިޞާދު ސިންދަފާތުކުރުމަކީ ސަރުކާރުގެ އަމާޒެއް: ޝިޔާމް

ދިވެހިރާއްޖޭގެ ކަނޑުތަކާ ބެހޭގޮތުން އިތުރު ދިރާސާތައްކޮށް، ކަނޑުގެ އަޑީގައިވާ ވަސީލަތްތައް ދެނެގަތުމާއެކު ދެމެހެއްޓެނެވި ގޮތެއްގައި އިޤްތިޞާދު ސިންދަފާތުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ މުހިއްމު އަމާޒެއް ކަމަށް މިނިސްޓަރ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސް އަޙްމަދު ޝިޔާމް ވިދާޅުވެއްޖެއެވެ

ދުނިޔޭގެ ކަނޑުތަކުގެ ދުވަހުގެ މުނާސަބަތުގައި ދެއްވި މެސެޖެއްގައި މިނިސްޓަރ ޝިޔާމް ވިދާޅުވީ، ރާއްޖޭގެ 99 އިންސައްތައަށް ވުރެ ބޮޑު ސަރަހައްދަކީ ކަނޑުކަމަށް ވާއިރު، ރާއްޖޭގެ އިޤްތިޞާދީ ނާރެހާއި، ބަނޑުފުރާނަ މުއްތިކުރުމާއި، އާމްދަނީ ހޯދުން ބިނާވެފައިވަނީ ކަނޑުގެ ވަސީލަތްތަކުގެ މައްޗަށް ކަމަށެވެ. އެހެންކަމުން ކަނޑުގެ ދިރުންތައް ރައްކާތެރިކޮށް އަންނަން އޮތް ޖީލުތަކަށް ފޯރުކޮށްދިނުމަކީ އެންމެންގެ ޒިންމާއެއްކަން އެމަނިކުފާނު ފާހަގަކުރެއްވިއެވެ.

މިއަހަރުގެ ކަނޑުތަކުގެ ދުވަހުގެ ޝިއާރުގެ މައްޗަށް އަލިއަޅުވާލައްވައި މިނިސްޓަރ ވިދާޅުވީ މެދުއިރުމަތީގެ ހަމަނުޖެހުންތަކާއި ދުނިޔޭގެ އިޤްތިޞާދަށް އަންނަ ލޮޅުންތަކުގެ ސަބަބުން، އަމިއްލަ ފުދުންތެރިކަން އިތުރުކުރުމަކީ މިހާރު ފަސްކުރެވެން ނެތް ކަމެއް ކަމަށެވެ.

ޚާއްޞަކޮށް މޫސުމަށް އަންނަ ބަދަލުތަކުގެ ސަބަބުން ކަނޑުގެ ލޮނުގަނޑު ހޫނުވެ، މަސްވެރިކަމަށް ނޭދެވޭ އަސަރުތަކެއް ކުރަމުންދާކަން މިނިސްޓަރ ފާހަގަކުރެއްވިއެވެ. މިގޮތުން 2024 ވަނަ އަހަރު އިންޑިއާ ކަނޑުގެ ކަޅުބިލަމަހުގެ މަސްވެރިކަން ދަށްވެ، މަސްވެރިކަމުގެ ނުމޫސުން ދިގުލައިގެން ދިއުމުގެ ގޮންޖެހުންތަކާ ކުރިމަތިލާންޖެހިފައިވާކަމަށް ވިދާޅުވިއެވެ.

ސަރުކާރުގެ އައު ސިޔާސަތުތަކާ ގުޅޭގޮތުން ވާހަކަދައްކަވަމުން މިނިސްޓަރ ވިދާޅުވީ، މަހަށް އަގުއެއްކުރުމާއި އެކުއަކަލްޗަރ ފުޅާކުރުމުގެ މަސައްކަތް ބާރަށް ކުރިއަށްދާ ކަމަށެވެ. މިގޮތުން ރާއްޖެއަށް ސީވީޑް އެކުއަކަލްޗަރ ތަޢާރުފްކޮށް، ފުރަތަމަ ޝިޕްމަންޓް މިހާރު އެކްސްޕޯރޓްކޮށްފައިވާ ކަމަށާއި، އިތުރު ދެ ކުންފުންޏަކުން މި ސިނާއަތަށް އިންވެސްޓްކޮށް މަސައްކަތް ފަށާފައިވާކަމަށް ވިދާޅުވިއެވެ.

އަދި ދުނިޔޭގެ ކާބޯތަކެއްޗާބެހޭ ޖަމްއިއްޔާ އެފްއގެ އެހީގައި ސީވީޑް އުފެއްދުންތައް ތައްޔާރުކުރުމުގެ އައު މަޝްރޫޢަކަށް ފެހި ސިގްނަލް ލިބިފައިވާ ކަމަށާއި، ޖަޕާނު ސަރުކާރުގެ އެހީގައި އިތުރު މަޝްރޫޢެއް ކުރިއަށް ގެންދިއުމަށް މަޝްވަރާ ކުރެވެމުންދާ ކަމަށްވެސް ވިދާޅުވިއެވެ.

"އޯޝަން ޑެކޭޑް" ގެ ގޮތުގައި ފާހަގަކުރާ މި ދުވަސްވަރު، ސައިންޓިފިކް ދިރާސާތައްކުރުމާއި އައު ޓެކްނޮލޮޖީ ތަޢާރުފްކުރުމަށް ދުނިޔޭގެ ފެންވަރުގައި ކުރާ މަސައްކަތްތަކުގައި ރާއްޖެއިން ބައިވެރިވާނެކަމަށް ޝިޔާމް ވިދާޅުވިއެވެ. އަދި ދިވެހިރާއްޖޭގެ ކަނޑުތަކުގެ ނަފާ ހޯދުމުގައި ދިވެހިން އެންމެ ކުރީ ސަފުގައި މަސައްކަތްކުރުމަކީ އުއްމީދެއް ކަމަށާއި، އެކަމުގައި މިނިސްޓްރީގެ ފުރިހަމަ އެއްބާރުލުން ލިބޭނެ ކަމަށްވެސް ވިދާޅުވިއެވެ.