މިއީ ފެށުމެއް، މުލީގެ ތަރައްޤީއަށް ކުރަން ހުރި ކަންކަން ކުރިއަށް އޮތް ތަނުގައި ފެށޭނެ: ރައީސް މުޢިއްޒު

މުލީ އެއާޕޯޓް ހުޅުވިގެންދިޔުމަކީ އެ ރަށުގެ ތަރައްޤީއަށް ކުރަން ހުރި މަސައްކަތްތަކުގެ ފެށުން ކަމަށާ، ކުރިއަށް އޮތް ތަނުގައި އެ ރަށުގައި ގިނަ މަޝްރޫޢުތަކެއް ކުރިއަށް ދާނެ ކަމަށް ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ.

މުލަކު އަތޮޅުގެ ފުރަތަމަ އެއާޕޯޓް، މުލީ އެއާޕޯޓް ހުޅުވުމުގެ ރަސްމިއްޔާތުގައި ވާހަކަދައްކަވަމުން ރައީސް ވިދާޅުވީ، މުލީގައި އެއާޕޯޓް ހުޅުވިގެން ދިޔުމަކީ ވަރަށް ގިނަ ކަންކަމަށް މަގުފަހިވެގެންދާނެ ކަމެއް ކަމަށެވެ.

އާދެ މިއަދު މިއީ ހަމަ ފެށުމެއް. އިރާދަކުރެއްވިއްޔާ މިރަށުގެ ތަރައްޤީއަށް ކުރަންހުރި ބައިވަރު ކަންކަން އެބަހުރި. އަޅުގަނޑު ވަޢުދުވެފައި ހުރި ވަރަށްގިނަ ކަންކަންވެސް އެބަހުރި. އޭގެ ތެރާެގައި ފަތުރުވެރިކަމުގެ ދާއިރާ ތަރައްޤީ ކުރުން، މަގުހެދުމުގެ މަޝްރޫޢު ކުރިއަށް ގެންދިޔުން. އިރާދަކުރެއްވިއްޔާ އަންނަ އަހަރުގެ ތެރޭގައި މަގުހެދުމުގެ މަޝްރޫޢު ކުރިއަށް ގެންގޮސްދޭނަން.

ރައީސް ޑރ. މުޙައްމަދު މުޢިއްޒު

މީގެ އިތުރުން މުލަކު އަތޮޅުގައި ރީޖަނަލް ހޮސްޕިޓަލް އެޅުމަށް އެމްޓީސީސީއާ އެކު ސޮއި ކުރެވިފައިވާ ކަން ފާހަގަކުރައްވައި ރައީސް ވަނީ ސިއްޙީ ޚިދުމަތްތައް ރަނގަޅުކޮށްދިނުމަކީ އެންމެ އިސްކަމެއް ދެއްވާ އެއް ކަންތައް ކަމަށެވެ.

ހަމަ އެހެންމެ ގެދޮރުވެރިކަމަކީވެސް ނުހަނު މުހިންމު ޚިދުމަތެއް ކަމަށާ، 57 ރަށެއްގައި ގެދޮރުވެރިކަމުގެ މަޝްރޫއު ފެށުމަށް މިހާރު އިއުލާން ކުރެވިފައިވާކަން ރައީސް ފާހަގަކުރެއްވިއެވެ. އަދި އޭގެ ތެރޭގައި މުލީގައި އެޅުމަށް ހަމަޖެހިފައިވާ 300 ހައުސިންގ ޔުނިޓް ހިމެނޭނެ ކަމަށްވެސް ވިދާަޅުވިއެވެ.

300 ހައުސިންގ ޔުނިޓް އެޅުން ވެގެންދާނެ ތިޔަ ބޭފުޅުންގެ ހުވަފެންތަކުގައި ވަރަށް ގިނަ ކުލަތައް ޖެހޭނެ ކަމަކަށް. ޚާއްސަކޮށް ޒުވާނުންނާއި، ގެދޮރުވެރިކަން ނެތް ފަރާތްތަކަށް. މި ރަށަށް އަންނަން ބޭނުންވާ ފަރާތްތަކަށް. އަޅުގަނޑު ވަރަށް އެދެން މިގޮތަށް އިންފްރާސްޓްރަކްޗަރ ޤާއިމް ކުރެވޭ ރަށްތަކަކީ ސަރަހައްދީ ގޮތުން ތަރައްގީ ކުރުމުގެ ވިސްނުމުގައި އެހެން ރައްޔިތުންވެސް ބައިވެރިވާ ރަށްތަކަށް ވާން

ރައީސް ޑރ. މުޙައްމަދު މުޢިއްޒު

މިއާއެކު ރައީސް މުޢިއްޒު ވިދާޅުވީ، ނާލާފުއްޓާއި މުއްޔާއި ކޯޒްވޭ އަކުން ގުޅުވާލުމަކީ އެމަނިކުފާނުގެ ވަޢުދުފުޅެއް ކަމަށާ، އެ މަޝްރޫޢުގެ އަމަލީ މަސައްކަތްވެސް ފެށިގެންދާނެ ކަމަށެވެ. އަދި އެ މަޝްރޫޢު އަކީ އިޤްތިޞާދީ މަސައްކަތެއް ކަމަށާ، އެއިން ގިނަގުނަ އިޤތިޞާދީ ނަފާ ލިބޭނެ ކަމަށްވެސް ބުނެފައިވެއެވެ.