ބޭކާރު ޚަރަދޭ ވިދާޅުވުމުން ތަރުޖަމާނުގެ ރައްދެއް ރައީސް ނަޝީދަށް

ބޮޑުތަކުރުފާނުމަގު ތަރައްޤީކުރުމަށް ސަރުކާރުން ކުރިއަށްގެންދާ މަޝްރޫޢުއަށް ނުސީދާ ގޮތެއްގައި ކުރީގެ ރައީސް ނަޝީދު ފާޑުވިދާޅުވުމުން މި ސަރުކާރުގެ ޗީފް ގަވަމަންޓް ސްޕޯކްސްޕަރސަން ރައްދު ދެއްވައިފިއެވެ.

މި ސަރުކާރުން ބޮޑުތަކުރުފާނުމަގު ތަރައްޤީކުރުމަށް ކުރިއަށްގެންދާ މަޝްރޫޢުއަށް ނުސީދާ ގޮތެއްގައި ފާޑުވިދާޅުވަމުން ކުރީގެ ރައީސް  ނަޝީދުގެ ނުރަސްމީ އެކައުންޓުން ކުރެއްވި ޕޯސްޓެއްގައި ވިދާޅުވެފައިވަނީ، އާންމުކޮށް މި ބާވަތުގެ މަސައްކަތް ކުރަމުން އައި އުސޫލުތަކަކީ މިހާރުގެ ހާލަތަށް ބަލާއިރު ދެމެހެއްޓެނިވި ގޮތްތަކެއް ނޫންކަމަށެވެ. އަދި މިގޮތަށް މަސައްކަތް ކުރުން ދެން ކުރިއަކަށް ނުގެންދެވޭނޭކަމަށްވެސް ޕޯސްޓްގައި ވަނީ ވިދާޅުވެފައެވެ.

ނޫސްވެރިއަކު މިކަމާ ގުޅޭގޮތުން ސުވާލުކުރެއްވުމުން ޗީފް ސްޕޯކްސް ޕާސަން މުޙައްމަދު ޙުސައިން ޝަރީފް ވަނީ ބޭކާރު ހަރަދަކީ ކޮބައިތޯ ސުވާލުކުރައްވައި ރައީސް ނަޝީދުގެ ވެރިކަމުގައި 2011 ވަނަ އަހަރު ސާކް ސަމިޓް ބޭއްވުމަށް އައްޑޫ ސިޓީ ހިތަދޫގައި ބިނާކުރި ކޮންވެންޝަން ސެންޓަރުގެ ވާހަކަ ދައްކަވާފައެވެ. ދެމެހެއްޓެނިވި ވިސްނުމެއްނެތި ވަގުތީގޮތުން ބޭނުންކޮށްލެވޭގޮތަށް ބިނާ ކުރި އެ ސެންޓަރަކީ ރައީސް ނަޝީދުގެ ސަރުކާރުން ކުރި ބޭކާރު ހަރަދެއްކަމަށް ތަރުޖަމާން ވިދާޅުވިއެވެ.

ބޭކާރު ހަރަދަކީ ސާކްސަމިޓެއް ބައްވަންވެގެން ބޮޑު މާސް ލޭންޑެއް ކޮނެ، އެތަނުގައި އަސްޓޭބަލްކޮށް އިމާރާތެއް އަޅައި ކަމެއްކުރާނެ ވިސްނުމެއްނެތި އިމާރާތެއް އެޅުން

ޗީފް ސްޕޯކްސް ޕާސަން މުޙައްމަދު ޙުސައިން ޝަރީފް

ތަރުޖަމާން ވިދާޅުވީ، ރައްޔިތުން އާއްމުކޮށް ބޭނުންކުރާ ބޭންކުތައް، އޮފީސްތައް، ވިޔަފާރިތައް އަދި ދަތުރުފަތުރުކުރާ ތަންތަން ހެދުމަކީ އެތަންތަނުގެ މަންފާ ރައްޔިތުންނަށް އެންމެ ފުރިހަމަ ގޮތުގައި ލިބޭނޭ ތަންތަންކަމަށެވެ. އެގޮތުން ބޮޑުތަކުރުފާނުމަގު ތަރައްޤީކުރުމުގެ މަޝްރުޢުގެ ދަށުން ބާޒާރުމަތީ ސަރަހައްދުގެ ތޮއްޖެހުމުގެ މައްސަލަ ހައްލުވެ އެކަމުގެ ފަސޭހަކަން މިއަދު ރައްޔިތުންނަށް ފެންނަން ފަށައި އެކަމުގެ ހިތްހަމަޖެހުން މިއަދު ލިބެމުންދާކަމަށް ތަރުޖަމާނު ފާހަގަކުރެއްވިއެވެ.

ރައީސް ނަޝީދުގެ ވެރިކަމުގައި ބިނާކުރި އައްޑޫ އިކްޓޯރިއަލް ކޮންވެންޝަން ސެންޓަރުގެ ވާހަކަ ތަރުޖަމާނު ފާހަގަކުރެއްވިއިރު، މިހާރު އެތަން ބޭނުންކުރަމުންދަނީ ހޮސްޕިޓަލެއްގެ ގޮތުގައެވެ. ކުރީގެ ރައީސް ޔާމީނުގެ ވެރިކަމުގައި އެތަން ހޮސްޕިޓަލަކަށް ބަދަލުކޮށް ހިންގަން ނިންމީ އެތަނުން ދެމެހެއްޓެވި ގޮތެއްގައި މަންފާލިބޭނޭގޮތެއް ނެތުމުންނެވެ.

އައްޑޫ ކޮންވެންޝަން ސެންޓަރު ހޮސްޕިޓަލެއްގެ ގޮތުގައި ބޭނުންކުރަމުންދާއިރު، އަދުގެ ސަރުކާރުން ވަނީ އެތަން އިތުރަށް ތަރައްގީކޮށް، ހިދުމަތްތައް ފުޅާކުރުމަށްޓަކައި 150 މިލިއަން ރުފިޔާގެ ބޮޑު މަޝްރޫއުތަކެއް ފައްޓަވާފައެވެ.