ނިޔާވެފައިވާ 700ވުރެ ގިނަ މީހުންގެ އެކައުންޓަށް 10 މިލިއަނަށް ވުރެ ގިނަ ރުފިޔާ ޖަމާކުރި

ނިޔާވެފައިވާ 700 ވުރެ ގިނަ މީހުންގެ އެކައުންޓަށް 10 މިލިއަނަށް ވުރެ ގިނަ ރުފިޔާ ޖަމާކޮށްފައިވާ ކަން ފާހަގަކުރެވިފައިވާ ކަމަށް އެންސްޕާގެ ސީއީއޯ އާމިނަތު ޝިރުނާ ވިދާޅުވެއްޖެ އެވެ.

ޕީއެސްއެމްގެ ޕްރަގްރާމެއްގައި ވާހަކަ ދައްކަވަމުން އޭނާ މިހެން ވިދާޅުވީ އިޖުތިމާއީ އެހީތެރިކަމާއި ގުޅުންހުރި ޕްރޮގްރާމްތަކުން އެހީ ފޯރުކޮށްދެވެނީ ސީދާ އޭގެ ހައްގުވެރިންނަށްކަން ކަށަވަރުކުރުމަށް ކުރަމުންދާ މަސައްކަތް ފާހަގަކުރައްވަ އެވެ.

ޝިއުރާ ވިދާޅުވީ އެ މަސައްކަތަށް އެންމެ މުހިއްމު އެއްކަމަކީ މޮނީޓަރިންގެ މަސައްކަތް ކަމަށެވެ. އެހެން ނަމަވެސް 2020 ވަނަ އަހަރު އެ މަސައްކަތް ކުރަމުންދިޔަ މޮނީޓަރިން ސެކްޝަން އުވާލުމާއި ގުޅިގެން، މަސައްކަތް ހުއްޓިފައިވާ ކަމަށެވެ.

އަދި ވިދާޅުވީ އެކަމުގެ ސަބަބުން ދައުލަތަށް ބޮޑެތި ގެއްލުންތަކެއް ވަމުން ގޮސްފައިވާ ކަމަށެވެ. އެއް ކަމަކަށް ފާހަގަ ކުރެއްވީ އެހީ ފޯރުކޮށްދިނުމުގެ ތެރެއިން ނިޔާވެފައިވާ މީހުންގެ އެކައުންޓްތަކަށް ގިނަ އަދަދެއްގެ ފައިސާ ޖަމާކޮށްފައިވުމެވެ.

އެގޮތުން ނިޔާވެފައިވާ 700ވުރެ ގިނަ މީހުންގެ އެކައުންޓަށް 10 މިލިއަނަށް ވުރެ ގިނަ ރުފިޔާ ޖަމާކޮށްފައިވާކަން ފާހަގަކުރެވިފައިވާ ކަމަށް ވިދާޅުވި އެވެ. އެއީ ދައުލަތަށް ލިބުނު ވަރަށް ބޮޑު ގެއްލުމެއް ކަމުގައި ވިދާޅުވި އެވެ.

"މިހާރު އަޅުގަނޑު މިދަނީ އަލުން އެސެކްޝަންގެ މަސައްކަތް އިޔާދަކޮށް ސިސްޓަމް އިތުރަށް ހަރުދަނާކުރުމުގެ މަސައްކަތް މި ދަނީ ކުރަމުން." ޝިރުނާ ވިދާޅުވި އެވެ.

އިޖުތިމާއީ އެހީތެރިކަމާއި ގުޅުންހުރި ޕްރޮގްރާމްތަކުން އެހީ ފޯރުކޮށްދޭ މީހުންގެ އަދަދު އިތުރުވަމުންދާއިރު މިވަގުތު 15000 އެއްހާ މީހުން ރަޖިސްޓްރީވެފައިވެ އެވެ.