އެމެރިކާ-އީރާނު ހަނގުރާމަ ރަތް ކަނޑާއި ކެސްޕިއަން ކަނޑަށް ފެތުރިއްޖެ

އެމެރިކާގެ ވައިގެ ހަމަލާތައް ވަގުތީ ގޮތުން މެދުކެނޑިފައި ވީ ނަމަވެސް، މެދުއިރުމަތީގެ ހަނގުރާމަ މިދިޔަ ހަފުތާ ބަންދުގައި ރަތް ކަނޑާއި ކެސްޕިއަން ކަނޑާ ހަމައަށް ފެތުރި، މަސްރަޙު އިތުރަށް ގޯސްވެއްޖެއެވެ.

މި ކުރިމަތިލުންތަކުގެ ތެރޭގައި ޔަމަނުގެ ޙޫތީން ސަޢޫދީ ޢަރަބިއްޔާގެ ތެޔޮ ކާރުޚާނާތަކަށް ހަމަލާދީފައިވާއިރު، ކެސްޕިއަން ކަނޑުގައި އީރާނުގެ ބޯޓަކަށް ޔޫކްރެއިނުން ހަމަލާދީފައިވާ ކަމަށް އީރާނުން ވަނީ ތުހުމަތުކޮށްފައެވެ.

އެމެރިކާ ސިފައިން ހޮނިހިރު ދުވަހު ބުނެފައިވަނީ އީރާނާ ދެކޮޅަށް ކަނޑުގެ މަގުން ހިންގާ ޙިޞާރު "އެއްވެސް ލުޔެއް ނެތި ދެމިއޮތް" ކަމަށެވެ. ނަމަވެސް، ޖެހިޖެހިގެން 13 ރޭ ވަންދެން ދެމުންދިޔަ ހަމަލާތައް ކުއްލިއަކަށް ހުއްޓާލި ސަބަބެއް އެމެރިކާއިން ހާމަކޮށްފައެއް ނުވެއެވެ. މި މުއްދަތުގެ ތެރޭގައި އީރާނުގެ ފަރާތުން އަވައްޓެރި ޤައުމަކަށް ހަމަލާއެއް ދިން ކަމުގެ ރިޕޯޓެއް ލިބިފައެއް ނުވެއެވެ.

ހަމަލާތައް މެދުކެނޑުމާ ގުޅޭގޮތުން އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުގެ އިސް އޮފިޝަލަކު ބުނީ، ޓްރަމްޕް އަބަދުވެސް އިސްކަންދެނީ ޑިޕްލޮމެސީއަށް ކަމަށެވެ. ނަމަވެސް ހެޔޮ ނިޔަތެއް ނެތި މަޝްވަރާގެ މޭޒަށް ނާންނަ ނަމަ ކަންވާނެ ގޮތް އީރާނަށް ދައްކާފައިވާނެ ކަމަށް އޭނާ ބުންޏެވެ.

ނިއު ޔޯކް ޓައިމްސްއިން ރިޕޯޓުކޮށްފައިވާ ގޮތުގައި، ހަނގުރާމަ ފުޅާވެ ހަތިޔާރުގެ ސްޓޮކް ހުސްވުމާއި، ގަލްފްގެ ބައިވެރިންގެ ނުރުހުމާއި، ދުނިޔޭގެ އިޤުތިޞާދަށް އަތުވެދާނެ ލޮޅުމަކަށް ބިރުން ޓްރަމްޕް މިވަގުތު ވަނީ ހަމަލާތައް ވަރުގަދަ ކުރުމުގެ ވިސްނުމާ ދުރައްގޮސްފައެވެ. ސީއެންއެންއިން ރިޕޯޓުކުރި ގޮތުގައި ނައިބު ރައީސް ޖޭ.ޑީ ވޭންސް އާއި ޖެނެރަލް ޑޭން ކެއިން ވެސް ވަނީ ހަތިޔާރުގެ ސްޓޮކާ މެދު ހުރި ކަންބޮޑުވުންތައް ޓްރަމްޕާ ހިއްސާކޮށްފައެވެ.

ގަލްފް ސަރަޙައްދު ވަގުތީ ގޮތުން ހިމޭންވި ނަމަވެސް، ހޮނިހިރު ދުވަހު ޙޫތީން ވަނީ ސަޢޫދީގެ ޖީޒާނާއި ޔަންބޫގައި ހުރި އަރާމްކޯގެ ތެޔޮ ވަސީލަތްތަކަށް ހަމަލާދީފައެވެ. ޖީޒާންގެ ރިފައިނަރީއަށް ދިން ހަމަލާގައި ބޮޑެތި ގެއްލުންތަކެއް ލިބި، އެ ސަރަޙައްދުން ބޮޑެތި ދުންގަނޑުތައް އަރަމުންދާ މަންޒަރު ފެންނަ ވީޑިއޯތައް ވަނީ ޢާންމުވެފައެވެ. ޔަންބޫއަށް ފޮނުވާލި މިސައިލްތައް ސަޢޫދީން ހުއްޓުވި ނަމަވެސް، މިއީ ރަތް ކަނޑުގެ ޝިޕިން ރޫޓަށް އޮތް ބޮޑު ނުރައްކަލެއްގެ ގޮތުގައި ބެލެވެއެވެ. ޙޫތީންގެ ތަރުޖަމާން ޔަޙްޔާ ސަރީޢު ވަނީ ސަޢޫދީގެ ހުރިހާ ތެޔޮ ވަސީލަތްތަކަކީ މިހާރު ހަމަލާދޭނެ އަމާޒުތަކެއް ކަމަށް އިޢުލާންކޮށްފައެވެ.

މީގެ އިތުރުން، ކެސްޕިއަން ކަނޑުގައި ދަތުރުކުރަމުންދިޔަ އީރާނުގެ ވިޔަފާރި ބޯޓަކަށް ޔޫކްރެއިނުން ހަމަލާދީ ފަޅުވެރިއަކު މަރާލާފައިވާ ކަމަށް އީރާނުން ވަނީ ބުނެފައެވެ. މި މައްސަލައިގައި ތެހެރާނުން ވަނީ ޔޫކްރެއިންގެ ޗާޖް ޑެފެއާ ހާޒިރުކޮށް އިހުތިޖާޖު ކޮށްފައެވެ. މި ހަމަލާ އައީ، ރަޝިޔާއިން އީރާނަށް ސެޓެލައިޓް މައުލޫމާތު ފޯރުކޮށްދޭ ކަމަށް ޔޫކްރެއިންގެ ރައީސް ޒެލެންސްކީ ތުހުމަތު ކުރެއްވިތާ ކުޑަދުވަސްކޮޅެއްގެ ތެރޭގައެވެ.

ޔަމަނުގެ ދާޚިލީ ހަނގުރާމަވެސް އަލުން ހޫނުވަމުންދާއިރު، ސަޢޫދީގެ ތާއީދު އޮންނަ ސަރުކާރުގެ ވައިގެ ބާރުން ވަނީ މާރިބާއި އަލް-ޖައުފްގައި ޙޫތީންނަށް ހަމަލާދީފައެވެ. 2022 ވަނަ އަހަރުން ފެށިގެން އޮތް ހަމަލާ ބަދަލުކުރުން ހުއްޓާލުމުގެ އެއްބަސްވުން މި މަހު ރޫޅިފައިވާއިރު، ޙޫތީން ވަނީ ސަޢޫދީ ވަށައިގެން ކަނޑުގެ ޙިޞާރެއްވެސް އިޢުލާންކޮށްފައެވެ. މީގެ ފަސް މަސް ކުރިން އެމެރިކާ އާއި އިސްރާއީލުން އީރާނަށް ހަމަލާދޭން ފެށި ފަހުން، ޙޫތީން ދަނީ މި ހަނގުރާމައިގައި ޢަމަލީ ގޮތުން ބައިވެރިވަމުންނެވެ.