މާލޭ އުތުރު ފަރާތު ބަނދަރުގައި ހަ ފިންގަރ ޖެޓީ ހެދުމުގެ އަމަލީ މަސައްކަތް ފަށައިފި

މާލޭގެ އުތުރު ފަރާތު ބަނދަރުގެ ޖާގައިގެ ދަތިކަމަށް ހައްލެއް ގެނައުމަށް ޖުމްލަ ހަ ފިންގަރ ޖެޓީ ބެހެއްޓުމުގެ އަމަލީ މަސައްކަތް އެމްޓީސީސީން މިއަދު ފަށައިފިއެވެ.

މި މަޝްރޫއުގެ ޖުމްލަ އަގަކީ 18.98 މިލިޔަން ރުފިޔާއެވެ. މަޝްރޫއުގެ ތެރެއިން 25 މީޓަރު ދިގު ހަ މީޓަރު ފުޅާ ތިން ޖެޓީއާއި 15 މީޓަރު ދިގު ހަ މީޓަރު ފުޅާ ތިން ޖެޓީ ހެދުމަށް ވަނީ ހަމަޖެހިފައެވެ.

އެމްޓީސީސީން އެކްސްގައި ކުރި ޕޯސްޓް

އެމްޓީސީސީން ބުނީ، މި ޖެޓީތައް ނިމުމުން ބަނދަރުގައި ތޮއްޖެހުން ކުޑަވެ ގިނަ އުޅަނދުތަކަކަށް އެއް ވަގުތެއްގައި ކައިރިކުރެވޭނެ ކަމަށެވެ. އޭގެ އިތުރުން، ބޭރުގައި އޮންނަ ލޯންޗަކަށް އެރުމަށް އެތައް ލޯންޗެއް ހުރަސްކޮށް ދާން ޖެހޭ ދަތި ހާލަތަށްވެސް ނިމުމެއް އަންނާނެ ކަމަށް އެ ކުންފުނިން ބުނެފައިވެއެވެ.

ކުޑަކުދިންނާއި އިސްރަށްވެހިންގެ އިތުރުން ލަގެޖާ އެކު ދަތުރުކުރާ ފަރާތްތަކަށްވެސް މި ޖެޓީތަކުން ބޮޑު ލުއިފަސޭހައެއް ލިބޭނެ ކަމަށް އެމްޓީސީސީން ފާހަގަކޮށްފައިވެއެވެ.

ދަތުރުވެރިން އުޅަނދުފަހަރަށް އަރައި ފައިބާއިރު ރައްކާތެރިކަން އިތުރުވެ ދަތުރުތައް އަވަސްވެގެން ދިއުމަކީވެސް މި މަޝްރޫއުން ހާސިލުވާނެ ލަނޑުދަނޑިއެއް ކަމަށް އެ ކުންފުނިން ބުނެފައިވެއެވެ.