އަހަރު ނިމޭއިރު ބޭރު ފައިސާގެ ގާނޫނުގެ ނަތީޖާ ފެންނާނެ؛ ޑޮލަރުގެ ކަޅު ބާޒާރެއް ދެން ނޯންނާނެ: ރައީސް މުޢިއްޒު

މިހާރު އަމަލުކުރަން ފަށާފައިވާ ބޭރު ފައިސާގެ ގާނޫނުގެ ސަބަބުން އަހަރެއްގެ ތެރޭގައި ކާޑު ލިމިޓު ބޮޑުކޮށް، ޑޮލަރުގެ ކަޅު ބާޒާރު އެއްކޮށް ނައްތާލެވޭނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސުލްޖުމްހޫރިއްޔާ ހުވަދު އަތޮޅަށް ކުރައްވަމުންދާ ދަތުރުފުޅުގެ ތެރެއިން، ރޭ ގދ. ފިޔޯރީއަށް ވަޑައިގެން އެ ރަށުގެ ރައްޔިތުންނާއި ބައްދަލު ކުރައްވައި ވާހަކަދައްކަވަމުން ވިދާޅުވީ، މިހާރު ހައްލު ކުރަންޖެހިފައިވާ މައްސަލަ ތަކުގެ ތެރެއިން، ސަރުކާރުން އެޅި އެންމެ މުހިންމު އެއް ފިޔަވަޅަށް ވެގެންދާނީ ޑޮލަރުގެ މައްސަލަ ހައްލު ކުރުމަށް އަޅާފައިވާ ފިޔަވަޅުތައް ކަމަށެވެ.

”ޑޮލަރުގެ ދަތިކަން އޮތީމަ އަޅުގަނޑުމެން ވަނީ ގާނޫނެއް ފާސްކޮށް އަމަލު ކުރަން ފަށާފައި. މިހާރު މަޖުބޫރު ވާނެ ރިސޯޓުތަކަށް ވެސް އަދި އެކިއެކި އިންޑަސްޓްރީތަކުގައި މަސައްކަތް ކުރައްވާ ފަރާތްތަކަށް ވެސް ބޭންކަށް ޑޮލަރު މާރުކުރަން. 500 ޑޮލަރު ޓޫރިސްޓަކަށް އަދި އެކިއެކި ކުންފުނިތައް ނުވަތަ އެކި ވަރުވަރުގެ އިންޑަސްޓްރީތަކުން ކުންފުނިތަކުން ނޫނިއްޔާ ވިޔަފާރިތަކުން ތަފާތު ވަރުވަރަށް މާރު ކުރަން ޖެހޭނެ. ގާނޫނެއް ހަދައި، ގެޒެޓުކޮށް މިހާރު އަމަލު ކުރަން ޖެހޭނެ.“

ރައީސް ޑރ މުޙައްމަދު މުޢިއްޒު

ރައީސް ވިދާޅުވީ، ސަރުކާރުން އަޅާފައިވާ ފިޔަވަޅުތަކަށް ވިޔަފާރިވެރިންގެ ފުރިހަމަ އެއްބާރުލުން ލިބޭނެކަމުގެ ޔަގީންކަން އެބައޮތްކަމަށެވެ. އަދި ބޭރު ފައިސާގެ ގާނޫނާއެކު، ވިޔަފާރި ވެރިންނަށް ޓީޓީ ހެދުމުގައި ލުއިތަކެއް ލިބި ބޭރުގައި ދިރިއުޅެމުންދާ ދިވެހިންނަށް ބޭނުންވާ ޑޮލަރު ހޯދުމުގައި ފަސޭހަތަކެއްވުމުގެ އިތުރުން ކާޑުގެ ލިމިޓް ވެސް އިތުރު ކުރުމަށް މަގުފަހިވެގެން ދާނެކަމަށް ރައީސް ވިދާޅުވި އެވެ.

އަޅުގަނޑުމެން އެސްއޯއީތަކުން މިހާރު ޑޮލަރު ހޯދުމުގައި ދިމާވާ ދަތިތައްވެސް ހައްލުވެ، ބްލެކް މާކެޓްގެ ޑިމާންޑް ކުޑަކުރެވި، ޑޮލަރުގެ އަގު ތިރިވެގެން ދިޔުން. އެއީ ދުވަސްތަކެއް ނަގާނެ ކަމެއް. އެހެން ނަމވެސް، މީގެ ނަތީޖާއަކަށް ވާނީ ކުރިއަށް އޮތް މަސްތަކުގެ ތެރޭގައި، އިރާދަކުރެއްވިއްޔާ މި އަހަރު ނިމިގެންދާއިރު، އެހިސާބަށް ދެވިފައި އޮންނާނެ ކަމަށް. އެއީ ގާނޫނާ އެއްގޮތަށް ވިޔަފާރިވެރިން ޑޮލަރު މާރުކުރާނަމަ ހާސިލްވާނެ ކަމެއް

ރައީސް މުޢިއްޒު

ޓޫރިސްޓް ހިދުމަތްދޭ ކުންފުނިތަކުން ބޭންކަށް ޑޮލަރު މާރުކުރެވޭގޮތަށް އުސޫލްތަކެއް ކަނޑައަޅައި ބޭރުފައިސާ މާރުކުރުމުގެ ގާނޫނު ފާސްކޮށްފައި ވަނީ ފާސްކުރިއިރު ރާއްޖެ އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު މާރުކުރުމުގެ އުސޫލަށް ލުޔެއް ދިނުމުގެ ގޮތުން ލިބޭ އާމްދަނީން 20 އިންސައްތަ މާރުކުރެވޭ ގޮތަށްވަނީ އުސޫލު ބަދަލުކޮށްފައެވެ. އަދި ބޭރުފައިފާ މާރުކުރުން އިސްތުސްނާވާ ހާލަތްތައްވެސް ހިމަނާފައިވެއެވެ.