އެމެރިކާ އިންތިޚާބުގެ ލަނޑުދަނޑިތަކަށް އީރާނުގެ ހެކަރުން ހަމަލާދިން: ގޫގުލް

އެމެރިކާގެ ރިޔާސީ އިންތިޚާބުގެ މުހިންމު ލަނޑުދަނޑިތަކަށް އީރާނުގެ ހެކަރުން ހަމަލާދިންކަމަށް ގޫގުލް އިން ހާމަކޮށްފިއެވެ.

މި ހަމަލާތަކާ ގުޅޭގޮތުން ކުރިން މައިކްރޯސޮފްޓުން ހާމަކުރި މަޢުލޫމާތުތަކާ އެއްގޮތަށް، ގޫގުލްއިން ވެސް އޭޕީޓީ42 (APT42) ގެ ނަމުގައި ފާހަގަކުރެވޭ ހެކަރުންގެ ގްރޫޕަކުން މި ހަމަލާތައް ދެމުންދާކަން ފާހަގަކޮށްފައިވެއެވެ.

ގޫގުލްގެ ރިޕޯޓުގައި ބުނެފައިވާ ގޮތުގައި، ފާއިތުވި 6 މަސްދުވަހުގެ ތެރޭގައި އޭޕީޓީ42ގެ ހަމަލާތަކުގެ 60 ޕަސެންޓް އަމާޒުކޮށްފައިވަނީ އިސްރާއީލާއި އެމެރިކާއަށެވެ. މީގެ ތެރޭގައި ހިމެނެނީ ޖީމެއިލް އެކައުންޓްތަކަށް ނުފޫޒު ފޯރުވުމަށް ދޭ ފިޝިންގ ހަމަލާތަކާއި އިޖުތިމާޢީ އިންޖިނިއަރިންގ ހަމަލާތަކެވެ.

އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އާ ގުޅުންހުރި އޭޕީޓީ42އިން އެމެރިކާގެ ރިޔާސީ އިންތިޚާބާ ގުޅޭ ތަފާތު ފަރާތްތަކަށް ހަމަލާ ދީފައިވެއެވެ. މީގެ ތެރޭގައި ކުރީގެ ރައީސް ޓްރަމްޕްގެ ކެމްޕޭނާއި ރައީސް ބައިޑަންގެ ކެމްޕޭނަށް އަމާޒުކޮށްފައިވާ ހަމަލާތައް ހިމެނެއެވެ. ގޫގުލްއިން ބުނެފައިވާ ގޮތުގައި، މި ހަމަލާތަކުގެ ތެރެއިން ބައެއް ހަމަލާތައް ކާމިޔާބުވެ، ވަރަށް މަޤާމު މަތީ ސިޔާސީ މަޝްވަރާދޭ ފަރާތެއްގެ އެކައުންޓަށް ވަނީ ނުފޫޒު ފޯރުވާފައެވެ.

އޭޕީޓީ42ގެ މި ހަމަލާތައް މިހާރުވެސް ހުއްޓުމެއްނެތި ކުރިއަށްދާކަމަށް ގޫގުލްއިން ބުނެފައިވެއެވެ. އެގޮތުން ރައީސް ބައިޑަން، ނައިބު ރައީސް ކަމަލާ ހެރިސް، އަދި ކުރީގެ ރައީސް ޓްރަމްޕާ ގުޅުންހުރި ފަރާތްތަކަށް މިހާރުވެސް ހަމަލާދޭން މަސައްކަތްކުރަމުންދާކަމަށް ފާހަގަކޮށްފައިވެއެވެ.

މި ހަމަލާތަކުން ރައްކާތެރިވުމަށް ގޫގުލްއިން ހުށަހަޅާފައިވަނީ ސަރުކާރުގެ އިސް ފަރާތްތަކާއި، އިންތިޚާބީ ކެންޑިޑޭޓުން، ކެމްޕޭން މަސައްކަތްތެރިން، ނޫސްވެރިން އަދި އިންތިޚާބުގެ މަސައްކަތްތެރިން ފަދަ މަތީ ރިސްކު އޮންނަ ފަރާތްތަކުން ގޫގުލްގެ އެޑްވާންސްޑް ޕްރޮޓެކްޝަން ޕްރޮގްރާމްގައި ބައިވެރިވުމަށެވެ. މި ޕްރޮގްރާމަކީ ފިޝިންގ ހަމަލާތަކާއި ހުއްދަނެތި އެކައުންޓަށް ވަނުމުން ރައްކާތެރިވުމަށް އިތުރު ފިޔަވަޅުތަކެއް ހިލޭ ފޯރުކޮށްދޭ ޕްރޮގްރާމެކެވެ.