މި ވެރިކަން ވައްޓާލަން ފަންޑު ހޯދުމަށް އެންމެ އިސްކޮށް އުޅުނީ އަނދުން ހުސައިނާއި ޢީސަ: ވޮޝިންގޓަން ޕޯސްޓް

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަން ވައްޓާލުމަށް އިދިކޮޅު އެމްޑީޕީއިން އިންޑިޔާއާއި ރޭވުންތައް ރޭވި ކަމަށާ، އެކަމަށް ބޭނުންވާ ފަންޑު އިންޑިޔާއިން ހޯދުމަށް އެންމެ އިސްކޮށް ހަރަކާތްތެރިވީ ރައްޔިތުންގެ މަޖިލީހުގެ ކުރީގެ ހެންވޭރު ދެކުުނު ދާއިރާގެ އެމްޑީޕީގެ މެމްބަރު ހުސައިން ޝަހީމް (އަނދުން ހުސައިން) އާއި ކުރީގެ ކެނދިކުޅުދޫ ދާއިރާގެ މެމްބަރު އަޙުމަދު ޢީސާ ކަމަށް އެމެރިކާގެ ނޫހެއް ކަމަށްވާ ވޮޝިންގްޓަން ޕޯސްޓުން ބުނެފިއެވެ.

ދިވެހިރާއްޖެ އާއި އަދި އިންޑިއާގެ މައުލޫމާތު އެނގޭ އިސް ބޭފުޅުން ހިމެނޭހެން ޖުމްލަ 24 އަށްވުރެ ގިނަ މީހުންނާއި އިންޓަވިއު ކޮށްގެން ލިޔުނު ރިޕޯޓްގައި ބުނެފައިވާ ގޮތުން، ވެރިކަން ވައްޓާލުމުގެ މިމަޝްވަރާތައް ކުރިއަށް ގެންދިޔައީ މިއަހަރުގެ ޖަނަވަރީން ފެށިގެން މަޖިލިސް އިންތިހާބާއި ދެމެދުއެވެ.

އެގޮތުން ރައީސުލް ޖުމްހޫރިއްޔާ ތުރުކިޔޭ އަށާއި، އެއަށްފަހު ޗައިނާއަށް ކުރެއްވި ފުރަމާނަ ދަތުރުފުޅުން އެނބުރި ރާއްޖެ ވަޑައިގެންނެވުމުން މި ރޭވުންތައް ފެށިގެން ދިޔަކަމަށާ، އެކި ރަށްރަށުގަޔާއި، ސިޔާސީ މީހުންގެ ގެތަކުގައި، އަދި ރައްޔިތުންގެ މަޖިލީހުގެ ބޭރުގައިވެސް، އެމްޑީޕީއާއި ކުރީގެ ރައީސް މުޙައްމަދު ނަޝީދު އުފެއްދެވި ޑިމޮކްރެޓްސް ޕާޓީގެ މެންބަރުންގެ މެދުގައި ރައީސް މުޢިއްޒު އިމްޕީޗްކުރުމުގެ މަޝްވަރާތައް ކުރިއަށް ދިޔަ ކަމަށް ބުނެފައިވެއެވެ.

"ބައެއް އެމްޑީޕީ ލީޑަރުން ޖެހިލުންވެ، އިމްޕީޗްމަންޓް ރޭވި ފަރާތްތަކަށް އިންޒާރުދިނެވެ. އެއީ އިމްޕީޗްމަންޓްގެ މަސައްކަތް ސުޕްރީމް ކޯޓުން ނުވަތަ ސިފައިންގެ ތެރޭގައި ތިބި ރައީސް މުއިއްޒުގެ ތާއީދުކުރާ ފަރާތްތަކުން ހުއްޓުވައިފާނެ ކަމަށް ބުނެއެވެ. އަނެއްބައި މީހުން ބިރުގަތީ މިކަމުގެ ސަބަބުން ރައީސް މުޢިއްޒަށް ވޯޓު ދިން ފަރާތްތައް ރުޅިއަންނާނެތީއެވެ. އެއީ އެމަނިކުފާނު އިންތިޚާބުކުރެވުނުތާ މާގިނަ ދުވަސްތަކެއް ނުވާތީއެވެ.“ އެ ލިޔުމުގައު ބުނެފައިވެއެވެ.

އަދި މި ރޭވުން ރާވާ ފަރާތްތަކަށް ފައިސާގެ މައްސަލައެއްވެސް ދިމާވިއެވެ. ގިނަ މެމްބަރުން ވޯޓު ދޭން ތައްޔާރަށް ތިބި ނަމަވެސް ރިޝްވަތަށް އެދުނެވެ. (މިއީ މި ރޭވުން ރޭވި އެއް ފަރާތަކާއި އިތުރު 4 ދިވެހި އޮފިޝަލުން ބުނާ ގޮތުގައެވެ.) އެމްޑީޕީ އޮތީ ބަނގުރޫޓުވާން ކައިރިވެފައެވެ. ނަމަވެސް އެއަށް ހައްލެއް އޮތެވެ: އެއީ އިންޑިއާއެވެ.

ވޮޝިންގޓަން ޕޯސްޓް

ޖަނަވަރީ މަހު ބޭއްވުނު ސިއްރު ބައްދަލުވުމެއްގައި، އިމްޕީޗްމަންޓްގެ ޕްލޭނަށް އިދިކޮޅު ފަރާތްތައް އެއްބައިވެއްޖެނަމަ އިންޑިއާއިން ފައިސާ ހޯދައިދެވިދާނެ ކަމަށް ކަމަށް އަނދުން ހުސައިން ވިދާޅުވިކަމަށް އެ ނޫހުގައި ވެއެވެ. އަދި އަދުން ހުސައިނަކީ އިންޑިއާގެ އިންޓެލިޖެންސް އޭޖެންސީ އެއް ކަމަށްވާ އާރއޭޑަބްލިޔު އާއެކު މުހިންމު ގުޅުމެއް އޮތް ދިވެއްސެއް ކަމަށް އިންޑިއާގެ ނެޝަނަލް ސެކިއުރިޓީ އެޑްވައިޒަރީ ބޯޑުގެ ކުރީގެ އޮފިޝަލަކު މައުލޫމާތު ދިން ކަމަށްވެސް ބުނެފައިވެއެވެ.

މީގެ އިތުރުން، މެންބަރު އީސާއަކީ އިންޑިއާގެ ކުރީގެ ފުލުސް އޮފިސަރެއް ކަމަށްވާ ތޯރަޓްގެ ޒަމާންވީ ރަހުމަތްތެރިއެއް ކަމަށާ ރައީސް މުޢިއްޒު އިމްޕީޗް ކުރުމުގައި އިދިކޮޅު ފަރާތްތައް ނާކާމިޔާބުވެއްޖެ، އޭޕްރީލް މަހު ބޭއްވުމަށް ހަމަޖެހިފައިއޮތް ރައްޔިތުންގެ މަޖިލީހުގެ އިންތިޚާބަށް އެމްޑީޕީއަށް ފަންޑު ހޯދުމަށް އިންޑިއާގެ އެހީ ހޯދައިދެވިދާނެ ކަމަށް އޭނާ ވިދާޅުވި ކަމަށް އެ ނޫހުގައި ވެއެވެ.

”އީސާ ދެއްވި އިންޓަވިއުއެއްގައި، އިންޑިއާއާއެކު ގާތް ގުޅުމެއް އޮތް ކަމަށް ގަބޫލުކުރެއްވިއެވެ. އެހެންނަމަވެސް އިންތިޚާބަށް އިންޑިއާގެ ފައިސާ ހޯދައިދިނުމަށް ހުށަހެޅި ކަމަށް ދެކޮޅު ހެއްދެވިއެވެ. އަނދުން ހުސައިން އިޢުތިރާފުވެވަޑައިގަތީ އިމްޕީޗްމަންޓް ރޭވުމުގައި ބައިވެރިވެވަޑައިގެންނެވި ކަމަށެވެ. އެހެންނަމަވެސް އެކަމަށް ފައިސާ ހޯދުމަށް އޭނާ ހުށަހެޅުއްވި ކަމާ ގުޅޭގޮތުން އެއްވެސް އެއްޗެއް ވިދާޅުވުމަށް އިންކާރު ކުރެއްވިއެވެ.“ ވޮޝިންގްޓަން ޕޯސްޓުގައިވެއެވެ.

"ވަކިވަކި ދިވެހިން އިންޑިއާއަށް ގޮސް ހުށަހެޅުން ހުށަހަޅާފައި އޮތުން އެކަށީގެންވޭ. އެހެންނަމަވެސް ޙަޤީޤަތުގައި އަޅުގަނޑުމެން އެއްވެސް ޤައުމަކުން ފައިސާއަށް އެދިފައެއް ނޯންނާނެ. އަޅުގަނޑު އިންޑިއާގެ އޮފިޝަލުންނާ ވަރަށް ގާތުން މަސައްކަތްކުރަން. އިންޑިއާއިން ދިވެހިރާއްޖޭގެ ޑިމޮކްރެޓިކް ޕްރޮސެސްއަށް އެއްވެސް ދަތިކަމެއް ކުރިމަތިކޮށްފައެއް ނުވޭ." އަނދުން ހުސައިން ދެއްވި ބަސްދީގަތުމުގައި ވިދާޅުވި ކަމަށް ދަ ޕޯސްޓު ނޫހުގައި ބުނެފައިވެއެވެ.

އޭޕްރީލް މަހު ބޭއްވި މަޖިލިސް އިންތިހާބުގައި ރައީސް މުއިއްޒުގެ ޕާޓީން ބޮޑު ކާމިޔާބީއެއް ހޯދައި، އިމްޕީޗްމަންޓް ވޯޓެއް ނެގުން ގާތްގަނޑަކަށް މުސްތަޙީލު ކަމަކަށް ވެގެން ދިއުމުން އެމްޑީޕީގެ މެމްބަރުންގެ މެދުގައި ބަލިވީ ކީއްވެގެންތޯއާއި، އިމްޕީޗްމަންޓް ކާމިޔާބު ނުވީ ކީއްވެތޯ އާއި ވައުދުވި ގޮތައް އިންޑިއާއިން ފައިސާ ނުލިބުނީ ކީއްވެތޯ ސުވާލު އުފައްދާފައިވާ ކަމަށް ދަ ޕޯސްޓުގެ ރިޕޯޓްގައި ބުނެފައި ވެއެވެ.

އަދި އިންޑިއާގެ އޮފިޝަލުންނާ ގާތް އެމްޑީޕީގެ އެއް ލީޑަރަކު ވޮޝިންޓަން ޕޯސްޓަށް ވިދާޅުވީ އިންޑިއާ ދެކެނީ އެމްޑީޕީ އާއި އަދި އިދިކޮޅު ފަރާތްތަކަކީ މާބޮޑަށް ބައިބައިވެފައިވާ އަދި އިތުބާރު ނުކުރެވޭ ބައެއްގެ ގޮތުގައި ކަމަށެވެ.

މީގެ އިތުރުން ދަ ޕޯސްޓު ނޫހުގައި ބުނެފައިވާގޮތުން ރައީސް މުޢިއްޒުގެ ވެރިކަން ވައްޓާލުމަށް ނިމިދިޔަ މަޖިލީހުގެ 40 މެމްބަރުންނަށް ރިޝްވަތު ދިނުމަށާ، ސިފައިންނާއި ފުލުހުންގެ އިސް 10 އޮފިސަރަކާއި ބާރުގަދަ ތިން ގޭންގަކަށް ފައިސާ ދިނުމަށް ހުށަހަޅާފައިވެއެވެ. އެފަރާތްތަކަށް ފައިސާ ދެއްކުމަށް އިންޑިއާ އިން 87 މިލިއަން ރުފިޔާ ނުވަތަ ހަ މިލިއަން ޑޮލަރު ބޭނުންވާ ކަމަށާއި އެކަން އިންޑިއާ އިން ހަމަޖެހޭނެ ކަމަށް ދިވެހި ދެއޮފިޝަލަކު ވޮޝިންޓަން ޕޯސްޓަށް މައުލޫމާތު ދެމުން ބުނެފައިވާ ކަމަށް ރިޕޯޓްގައި ބުނެފައި ވެއެވެ.

ވޮޝިންޓަން ޕޯސްޓުން ބުނީ އެ ނޫހުގެ ރިޕޯޓްގައި ހުރި ވާހަކަތައް އިންޑިއާގެ އެކްސްޓާނަލް އެފެއާޒް މިނިސްޓްރީން ދޮގު ކޮށްފައިވާ ކަމަށެވެ. އަދި މިކަމާއި ގުޅޭ ގޮތުން ރައީސް އޮފީހުގެ މިނިސްޓަރ އިބްރާހިމް ހަލީލް އާއި ސުވާލު ކުރުމުން ކޮމެންޓެއް ކުރައްވާފައި ނުވާކަމަށް ވޮޝިންޓަން ޕޯސްޓުން ބުނެފައި ވެއެވެ.