ގިނަ އަދަދެއްގެ ކުދީންނާއެކު މި އަހަރުގެ "މަންފާ ނަމާދު ވޯކްޝޮޕް" ފަށައިފި

ދިވެހީންގެ ދީނީ ހޭލުންތެރިކަމަށް އެންމެ ފުޅާ ދާއިރާއެއްގައި މަސައްކަތް ކުރަމުންދާ "މަންފާ" ޖަމިއްޔާއިން މާލެ ސަރަހައްދުގައި ކުރިއަށް ގެންދާ ދެވަނަ ނަމާދު ވޯކްޝޮޕް ފަށައިފި އެވެ.

ނަމާދު ވޯކްޝޮޕް މި އަހަރު ކުރިއަށް ދަނީ އަރަބިއްޔާ ސުކޫލު ހޯލުގަ އެވެ. މަންފާއިން ބުނީ މި އަހަރުގެ ވޯކްޝޮޕަށް ހުޅުވާލުމުން ވެސް ގިނަ އަދަދެއްގެ ދަރިވަރުން ބައިވެރިވެފައިވާ ކަމަށެވެ.

މި އަހަރު ވޯކްޝޮޕް ކުރިއަށް ގެންދަނީ ދެ ދަންފަޅިއަކަށް ދެ އުމުރު ފުރައަކަށް ބަހާލައިގެންނެވެ. އެއީ ހަތް އަހަރާއި 10 އަހަރާއި ދެމެދުގެ ދަރިވަރުން އަދި 10 އަހަރާއި 14 އަހަރާ ދެމެދުގެ އުމުރުފުރާ އެވެ.

ހަތް އަހަރާއި 10 އަހަރާއި ދެމެދުގެ ދަރިވަރުންނަށް ވޯކްޝޮޕް ކުރިއަށް ގެންދަނީ ހަވީރު އެވެ. 10 އަހަރާއި 14 އަހަރާ ދެމެދުގެ އުމުރުފުރާގެ ދަރިވަރުންނަށް ވޯކްޝޮޕް ކުރިއަށް ގެންދަނީ ރޭގަނޑު އެވެ.

ނަމާދު ވޯކްޝޮޕްގައި ކުދީންނަށް ކިޔަވައިދެއްވަނީ މަޝްހޫރު ދީނީ އިލްމުވެރިޔާ ޑރ. އިމްރާން މުހައްމަދު އަލީ އެވެ. މީގެ އިތުރުން އަލްއަޚް އަލީ ރަމީޒު, ބަންގި ސެޝަންވެސް ކުރިއަށް ގެންދާނެ އެވެ.

މަންފާއިން ބުނީ މި ވޯކްޝޮޕް ނިމިގެންދާއިރު ކުދީންނަށް އެނގިފައިވާ މިންވަރު ބެލުމަށް ވަކިވަކީން ކޮންމެ ދަރިވަރަކު އިމްތިހާނު ކުރެވޭނެ ކަމަށެވެ.

މިފަހަރުގެ ވޯކްޝޮޕުން ފުރުސަތު ނުދެވުނު ދަރިވަރުންގެ ކިބައިން މާފަށް އެދެމުން އެ ޖަމިއްޔާއިން ބުނީ ދެން އަންނަ އަހަރުގެ މި ދުވަސްވަރުގެ ސުކޫލު ބަންދުގައި ވެސް ނަމާދު ވޯކްޝޮޕް މާލެ ސަރަހައްދުގައި ކުރިއަށް ގެންދާނެ ކަމަށެވެ.

މާލެ ސަރަހައްދުގައި ނަމާދު ވޯކްޝޮޕް ކުރިއަށް ގެންގޮސް ދިނުމަށް ވަރަށް ގިނަ ބެލެނިވެރީން ދިޔައީ މަންފާގައި އެދެމުންނެވެ. އެކަމަށް އިޖާބަދީ އެކަން ފެށީ މިދިޔަ އަހަރު އެވެ. މިދިޔަ އަހަރު އޮތް ފުރަތަމަ ނަމާދު ވޯކްޝޮޕަށްވެސް ބޮޑު ތަރުހީބެއް ލިބުނެވެ.

މަންފާ އިން ގެންދަނީ މާލެ ސަރަހައްދާއި އަތޮޅުތަކުގައިވެސް ސިލްސިލާ ދަރުސްތަކާއި ދީނީ ހޭލުންތެރިކުރުމަށް ހާއްސަ މަސައްކަތްތަކެއް ކުރަމުންނެވެ. ހުރިހާ ރަށަކުން ވެސް މަންފާގެ ހަރަކާތްތަކަށް ބޮޑު ތަރުހީބެއް ލިބެ އެވެ.