ގޮނޑި އަނބުރާހޯދައިދޭނަމަ، ޕީއެންސީން ވަކިވާން ތައްޔާރު މެންބަރުން އެބަތިބި؛ މިއަހަރު ރައީސް މުޢިއްޒު އިސްތިއުފާދެއްވަން ޖެހޭނެ: ޞާލިޙް

މިއަހަރު ނިމުމުގެ ރައީސް ޑރ. މުޙައްމަދު މުޢިއްޒު މަގާމުން އިސްތިއުފާ ދެއްވަން ޖެހިވަޑައިގަންނަވާނެ ކަމަށާ، މަޖިލީހުގެ ތެރެއިން އެމަނިކުފާނު ޖަވާބުދާރީ ކުރުވުމުގެ މަސައްކަތް މިއަހަރު ފެށިގެންދާނެ ކަމަށް ކުރީގެ ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަން ގައި ވާދަކުރައްވާ އެމްޑީޕީ ކެންޑިޑޭޓް ޢަބްދުالله ޞާދިޤު (ސޯބެ)ގެ ކެންޕެއިން ޖަލްސާގައި ވާހަކަދައްކަވަމުން ޞާލިޙް ވިދާޅުވީ، މި ސަރުކާރުން ވަނީ ރައްޔިތުންގެ މަޖިލީހުގެ މެންބަރުން ”ގައިގައި ތަޅުއަޅުވާފައި“ ކަމަށެވެ. އަދި ދާއިރާގެ ރައްޔިތުންނަށް މެމްބަރުން ވެވަޑައިގެންފައިވާ ވަޢުދުތައް ސަރުކާރުން ފުއްދައި ނުދިނުމުންވެސް އެ މެންބަރުން ތިބެންޖެހެނީ ޕާޓީގައި ކަމަށާ، އެއީ އެކަން އޮންނަންވީ ގޮތް ނޫން ކަމަށް ޞާލިޙް ވިދާޅުވިއެވެ.

ސަރުކާރުން ވަޢުދުތަކާއި ޚިލާފްވާނަމަ، މެންބަރު ހޮވުނު ޕާޓީ ދޫކޮށް ސަރުކާރު ޖަވާބުދާރީ ކުރުމުގެ ޙައްގު އޮންނަންވާނެ ކަމަށްވެސް ޞާލިޙް ވިދާޅުވިއެވެ.

މިމޭރުމުން އިތުރަށް ވާހަކަދައްވަމުން ރައީސް ޞާލިޙް ވިދާޅުވީ، ޕީއެންސީން ވަކިވެ ސަރުކާރު ޖަވާބުދާރީ ކުރުވުމުގެ މަސައްކަތް ކުރާނެ މެންބަރުން މިހާރުވެސް އެބަތިބި ކަމަށާ، ތިން ރައީސުން އެ މެންބަރުން ހޮވަން މަސައްކަތްކުރާނެ ނަމަ، ޕާޓީ ދޫކޮށްލަންވެސް އެބޭފުޅުން ތިބީ ތައްޔާރަށް ކަމަށެވެ.

އަޅުގަނޑަށް މީގެ ދެ ދުވަސް ކުރިން ގުޅި. ޕީއެންސީގެ މަޖިލިސް މެމްބަރެއް. ތިމަންނައާ އެކު އެބަތިއްބޭ އެތައް މިތަށް މެމްބަރުން. މިއީ ހަމަ ޞަރީޙަ ތެދު ވާހަކައެއް އަޅުގަނޑު މިދައްކަނީ. މިވަގުތު ވެސް މިތިބީ ޕީއެންސީ ދޫކޮށްފައި ނުކުމެ، މި ސަރުކާރު ޖަވާބުދާރީ ކުރުވަން މަސައްކަތްކުރަން ތައްޔާރަށޭ، ޔަގީންކަން ދެއްވާށޭ. އަޅުގަނޑު ގާތުގައި ވިދާޅުވީ ތިމަންމަމެންނަށް ޔަގީން ކަމެއް ތިބޭފުޅުން ދެއްވަބައްލަވާށޭ. އެ އިޝާރާތް ކުރީ އަޅުގަނޑަށާއި، ރައީސް ނަޝީދަށްށާއި، ރައީސް ޔާމީނަށް. ތި ތިން ބޭފުޅުން މަސައްކަތްތަކެއް ފައްޓަވާފީމެއްނުންހޭ. ތިމަންނަމެން ޕާޓީ ދޫކޮށްފަ ނުކުތީމަ ގޮނޑި ގެއްލުނީމަ އެގޮނޑި ތިމަންނަމެންނަށް ހޯދައިދިނުމަށް އަޅުގަނޑުމެން ތިން މީހުން މިއަދު އެއްބަސްވިޔަސް ތިމަންނަމެން މިތިބީ މިސަރުކާރު ޖަވާބުދާރީ ކުރުވުމަށް ނުކުންނަން ތައްޔާރައްށޭ.

ރައީސް ޞާލިޙް

ރައީސް ޞާލިޙް ވިދާޅުވީ، ”ތިލަފަތަށް ބަރުވަމުން އަންނަ“ ކަމަށާ، ކުރިއަށް އޮތް މަޖިލިސް ބައި އިލެކްޝަން އާއެކި އެމްޑީޕީގެ މަސައްކަތް ފުޅާވެ، ސަރުކާރު ޖަވާބުދާތީ ކުރުވުމުގެ މަސައްކަތް ފެށޭނެ ކަމަށެވެ.

”އިރާދަކުރެއްވިއްޔާ މިއަހަރު ނިމުމުގެ ކުރީން ރައީސް މުޢިއްޒު ޖަވާބުދާރީ ކުރުވާނަން، ނޫނިއްޔާ މަނިކުފާނަށް ޖެހިވަޑައިގަންނަވާނެ ވެރިކަންދޫކޮށްފައި ވަޑައިގަންނަވަން.“

ރައީސް ޞާލިޙް