ޕީޖީ ޝަމީމަށް ދިން ހަމަލަޔާ ގުޅޭ ގޮތުން ރައީސް ޞާލިހާ ސުވާލު ކުރަނީ!
ލިޔުންތެރިޔާ
ޚަދީޖާ އަރުފާ
ޕްރޮސެކިއުޓާ ޖެނަރަލް ހުސައިން ޝަމީމަށް އަމާޒުކޮށް ދެވުނު ހަމަލާއާއި ގުޅިގެން ކުރީގެ ރައީސް އިބްރާހިމް މުހައްމަދު ޞާލިހާ ސުވާލު ކުރައްވާނެ ކަމަށް ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާގެ ވަޒީރު ޢަލީ އިޙުސާން ވިދާޅުވެއްޖެއެވެ.
އިހްސާން މިފަދައިން ވިދާޅުވެފައި މިވަނީ، ޕީޖީ ޝަމީމް އަށް ދިން ހަމަލާ ކުށްވެރި ކުރައްވައި ޞާލިހް އެކްސް ގައި ކުރެއްވި ޕޯސްޓެއްގައި އެ ހަމަލާ އަކީ ސިޔާސީ ގޮތުން ދެވުމުން ހަމަލާއެއްގެ ގޮތަށް ސިފަކުރެއްވުމާއި ގުޅިގެންނެވެ.
ޞާލިހުގެ އެ ޓުވީޓަށް ރައްދު ދެއްވައި އިހްސާން އެކްސްގައި ކުރެއްވި ޕޯސްޓުގައި ވަނީ، ޝަމީމަށް ދެވުނު ހަމަލާއާއި ގުޅޭ ތަހުގީގު ފުލުހުން ކުރަމުންދާ ކަމަށެވެ.
އެ ހަމަލާއަކީ ސިޔާސީ ގޮތުން ދެވުނު ހަމަލާއެއް ކަމަށް ކުރީގެ ރައީސް ޞާލިހު ވިދާޅުވި ވިދާޅުވުމަކީ އެހަމަލާ ދިނުމުގެ ފަހަތުގައިވާ މަޤުޞަދާއި ނިޔަތާ ގުޅޭ ބުރަދަންހުރި އިތުބާރުކުރެވޭ މައުލޫމާތު އެމަނިކުފާނަށް ލިބިވަޑައިގެންފައިވާކަމަށް ބެލެވޭނެ ސަބަބެއް
ވަޒީރު ޢަލީ އިޙުސާން
އެހެންކަމުން، ރައީސް ޞާލިހުގެ އެ ޕޯސްޓުގައި އިޝާރާތްކުރެއްވި ސިޔާސީ މަޤުޞަދާ ގުޅޭ ގޮތުން އެމަނިކުފާނަށް ލިބިވަޑައިގެންފައިވާ އިތުބާރުހުރި މައުލޫމާތު ދިވެހި ފުލުހުންގެ ޚިދުމަތާ މިހާރުން މިހާރަށް ހިއްސާކުރެއްވުމަށް އިހްސާން ވަނީ އެދިވަޑައިގެންފަ އެވެ.
އަދި އެ މައުލޫމާތު ހޯދުމަށް ކުރީގެ ރައީސްގެ އޮފީހާ ގުޅިގެން ފުލުހުންގެ ޚިދުމަތުން މަސައްކަތްކުރުމަށް، އެ މައްސަލަ ތަހުގީގުކުރާ ޓީމަށް އިރުޝާދުދެއްވާފައިވާ ކަމަށްވެސް އިހްސާން ވިދާޅުވި އެވެ.
މީގެ އިތުރުން އިހްސާން ވިދާޅުވީ، ފުލުހުން އަންނަނީ އެ މައްސަލައަށް އެންމެ އިސްކަމެއް ދީގެން ތަހުގީގު ކުރަމުން ކަމަށާ، ހަމަލާ ދިން ފަރާތްތައް އިންސާފުގެ ކުރިމައްޗަށް ނެރުއްވާނެ ކަމަށެވެ.
ޕީޖީ ޝަމީމަށް ހަމަލާދީފައި ވަނީ މިއަދު ގެ ވަގުތެއްގައި މާލޭ ގައެވެ.
މި މައްސަލަ އާއި ގުޅިގެން ފުލުހުން ބުނީ އެ ބޭފުޅާ އަށް ލިބިފައިވާ އަނިޔާތަކަށް އޭޑީކޭ ގައި ފަރުވާ ހޯދަމުން އަންނަ ކަމަށެވެ. އަދި މިހާތަނަށް ބެލި ބެލުމުން ހަމަލާދީފައި ވަނީ ތޫނު އެއްޗަކުން ކަން އެނގޭ ކަމަށާއި އެ މައްސަލަ އިތުރަށް ތަހުގީގު ކުރަމުން އަންނަ ކަމަށް ފުލުހުން ވަނީ ބުނެފައެވެ.
ޕީޖީ ޝަމީމަށް ދިން ހަމަލާގައި އެބޭފުޅާ ގެ އަތްޕުޅުގެ މުލައްދަނޑިއަށް އަނިޔާވި ނަމަވެސް ސީރިއަސް އަނިޔާއެއް ލިބިވަޑައިގެންފައެއް ނުވެއެވެ.
ހަމަލާ އާއި ގުޅިގެން ޝަމީމަށް ދެމުން އަންނަ ސެކިޔުރިޓީ ވެސް ވަނީ ވަރުގަދަ ކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
