މިދިޔަ ވެރިކަމުގައި ހިންގި ފެނަކައާ ގުޅޭ ހިޔާނާތުގެ އިތުރު މައްސަލަތަކެއް އޮޑިޓަރ ޖެނެރަލް ފާހަގަކޮށްފި

މިދިޔަ ވެރިކަމުގައި ހިންގި، ފެނަކައާ ގުޅޭ ހިޔާނާތުގެ އިތުރު މައްސަލަތަކެއް ހިމެނޭ އޮޑިޓް ރިޕޯޓެއް ދައުލަތުގެ އޮޑިޓަރ ޖެނެރަލް ނެރުއްވައިފިއެވެ.

އޮޑިޓަރ ޖެނެރަލް ނެރުއްވި މި ރިޕޯޓްގައި މިފަހަރު ފާހަގަކުރައްވާފައިވަނީ 2021 ވަނަ އަހަރުން ފެށިގެން 2023 ވަނަ އަހަރުގެ ނިޔަލަށް ހދ.ކުޅުދުއްފުށީ ފެނަކަ ބްރާންޗާއި އެތަނުގައި ހިންގި ޕްރޮޖެކްޓްތަކުން ފާހަގަކުރެވުނު މައްސަލަތަކެވެ.

އޮޑިޓް ރިޕޯޓްގައި ފާހަގަކޮށްފައިވާ މުހިންމު މައްސަލަތަކުގެ ތެރޭގައި ކުޅުދުއްފުށީ އިންޖީނުގޭގެ އާ ޕްރީފެބްރިކޭޓް އިމާރާތުގެ މަސައްކަތަށް ބޮޑު ހަރަދެއް ކުރުމަށްފަހު އިމާރާތުގެ ކޮންސެޕްޓް ބަދަލުކޮށް އިމާރާތުގެ މަސައްކަތް އިން ހައުސްކޮށް ކުރުމަށް ނިންމި ނިންމުން ހިމެނެއެވެ. އެގޮތުން އިންޖީނުގޭގެ އާ އިމާރާތް އިން ހައުސްކޮށް ކުރިއަށް ގެންދިއުމުގެ ސަބަބުން 33.6 މިލިއަން ރުފިޔާ އިތުރަށް ހަރަދުކުރަން ޖެހުނުކަން ވަނީ ރިޕޯޓްގައި ފާހަގަކޮށްފައެވެ.

މީގެ އިތުރުން ވަކިވަކި ޕްރޮޖެކްޓްތަކަށް ކުރި ހަރަދުގެ ހިސާބުތައް ފުރިހަމައަށް ބަލަހައްޓާފައި ނުވުމާއި، އިންޖީނުގޭ އިމާރާތްކުރުމަށް ހޯދި ގިނަ އަދަދެއްގެ ކެމިކަލްތަކުގެ މުއްދަތު ހަމަވުމާއި، އިންޖީނުގެ މަސައްކަތް ކުރުމަށް ނެގި މުއައްޒަފުންގެ ތަފްސީލް ބަލަހައްޓާފައިނުވާ މައްސަލަވެސް ފާހަގަކޮށްލެވެއެވެ.

މީގެ އިތުރުން މުއައްޒަފުންގެ އަމިއްލަ އެކައުންތްތަކުގައި ކުންފުނީގެ ޕެޓީކޭޝް ފައިސާއަށްވާ 1.14 މިލިއަނެއްހާ ރުފިޔާ ޖަމާކުރުމާއި، މުއައްޒަފުންގެ ކެއުމުގެ ކަންކަން ހަމަޖައްސާފައިވަނިކޮށް ޕެޓީކޭޝްއިން އެކަމަށް ހަރަދުކުރުން ހިމެނެއެވެ.

މި ރިޕޯޓްގައި ވަނީ ފެނަކަ ކުޅުދުއްދުފުށީ ބްރާންޗަށް އުސޫލްތަކާ ހިލާފަށް މުއައްޒަފުން ނެގުމާއި، އިތުރު މަސައްކަތެއް ހަވާލުނުކޮށް މުސާރައާއި އިނާޔަތްތައް ދިން މައްސަލަތަކެއްވެސް ވަނީ ފާހަގަކޮށްފައެވެ.  މީގެ އިތުރުންވެސް މި ރިޕޯޓްގައި ވަނީ ބްރާންޗަށް ލިބެންޖެހޭ ފައިސާތައް ވީއެއްނުވީއެއް ނޭނގި ގެއްލުމާއި، އިންޖީނުގޭގައި ހުރި ކޭބަލްފަދަ އެއްޗެހި ގެއްލުމާއި ހަރުމުދާތައް ރައްކާތެރިކަމެއްނެތި ދޫކޮށްލާފައި ހުރިކަން ފާހަގަކޮށްފައެވެ.