އިޒުރޭލުން ހުޅަނގު އައްސޭރީގައި ހިންގަމުންދާ ޖަރީމާތަކުގައި ފަލަސްޠީނުގެ 1000 އަށްވުރެ ގިނަ މީހުން ޝަހީދުވެއްޖެ

2023 ވަނަ އަހަރުގެ އޮކްޓޯބަރު މަހުގެ 7 ވަނަ ދުވަހުންފެށިގެން އިސްރާއީލުން ހުޅަނގު އައްސޭރީގައި ހިންގަމުންދާ ޖަރީމާތައް އިތުރުކޮށް، ފަލަސްޠީނުގެ 1،000 އަށް ވުރެ ގިނަ މީހުން ޝަހީދުކޮށްލައިފިއެވެ.

އިސްރާއީލުން ޣައްޒާގައި ނަސްލު ހޭދަކުރުމަށް ހިންގަމުންދާ ޖަރީމާތަކުގައި، ފަލަސްޠީނުގެ 56،331 އަށްވުރެ ގިނަ މީހުން މިހާތަނަށް ޝަހީދު ކޮށްލާފައިވާއިރު، 2.3 މިލިއަން މީހުންގެ އާބާދީއެއް އޮންނަ ޣައްޒާއިން، ފަލަސްޠީނުގެ ރައްޔިތުން ނުކުތުމަށް މަޖުބޫރުކުރުވާފައިވާ މި ދަނޑިވަޅުގައި ދުނިޔެ އެކަމަށް ސަމާލުކަން ދީފައިވަނިކޮށް، އިސްރާއީލުން ހުޅަނގު އައްސޭރީގައި ހިންގަމުންދާ އަނިޔާވެރި ޖަރީމާތައް މިވަނީ އިތުރުކޮށްފައެވެ.

ހުޅަނގު އައްސޭރީގައި ފަލަސްޠީނުގެ ރައްޔިތުންނަށް އަމާޒުކޮށް ހަމަލާދެނީ ކޮން ބައެއް؟

މި ސުވާލުގެ ޖަވާބު ވަރަށް ސާފެވެ. އެއީ އިސްރާއީލުގެ ބާރުތަކާއި ހުޅަނގު އައްސޭރީގައި ނުޙައްގުން ބިންފޭރިގަނެގެން އުޅޭ ޔަހޫދީންގެ މީހުންނެވެ.

މިފަދައިން ބިންފޭރިގަނެގެން އުޅޭ ޔަހޫދީން ކުއްލި ކުއްލިއަށް އަނިޔާވެރި އެތަކެއް ޖަރީމާތަކެއް ފަލަސްޠީނުގެ ރައްޔިތުންނާއި ދެކޮޅަށް ދެއެވެ. ފަލަސްޠީނު މީހުންގެ މުދާ ރަށް އަންދައި، މީހުންނަށް ހަމަލާދީ، އަދި އެމީހުން ގެތަކުން ކޮންމެ ދުވަހަކު ދަނީ ނެރެމުންނެވެ.

ހަމައެއާއެކު، ސެކިއުރިޓީ ބާރުތަކުން ރެފިއުޖީ ކޭމްޕްތައް ވަށައިލައި، އެތަންތަނަށް ހުއްޓުމެއްނެތި ދަނީ ހަމަލާދެމުންނެވެ. އިތުރު މީހުން އެމީހުންގެ ގެތަކުން ނުކުތުމަށް މަޖުބޫރުކުރުވައި، އަނބުރާ އެނބުރި ނާދެވޭ ގޮތަށް ފަލަސްޠީނުގެ ބިންތަކުން ފަލަސްޠީނުގެ ރައްޔިތުން ދަނީ ބޭރުކުރަމުންނެވެ.

ފާހަގަކޮށްލަން ޖެހޭ ގޮތުގައި މިފަދައިން ނުޙައްގުން ފަލަސްޠީނުގެ ބިންތައް ފޭރޭ ޔަހޫދީންގެ އަތުގައި ސެމީ-އޮޓޮމެޓިކް ހަތިޔާރުތައް އިޒްރޭލުގެ ސަރުކާރުން ދީފައިވެއެވެ. އަދި ޣައްޒާގައި ހަނގުރާމަ ކުރުމަށް ފޮނުވާފައިވާ ސިފައިންގެ ބަދަލުގައި، ހުޅަނގު އައްސޭރީގައި ތިބި އިޒުރޭލުގެ އިސްތިއުމާރީ ބާރުތަކާ އެ ރަށްރަށުގައި ނުޙައްގުން ވަޒަންވެރިެގެން ތިބި ޔަހޫދީން ވަނީ ފަލަސްޠީނުގެ ރައްޔިތުންނާ ދެކޮޅަށް އަނިޔާވެރި ޖަރީމާތައް ހިންގުމަށް ބައިތިއްބާފައެވެ.

މިކަމުގެ ސަބަބުން ފަލަސްޠީނުގެ ބިންތަށް ފޭރިގަނެގެން ތިބި ޔަހޫދީންނަށް ފަލަސްޠީނުގެ ރައްޔިތުންނާ ދެކޮޅަށް އަނިޔާވެރިކަން އިތުރުކުރުމުގެ ބާރު ލިބިދީފައިވެއެވެ.

އިސްރާއީލުން މިކަން ކުރަނީ ކީއްވެ؟

ފަލަސްޠީނުގެ ރައްޔިތުންނާއި، ކަމާ ގުޅުންހުރި މާހިރުންނާއި، އިންސާނީ ޙައްޤުތަކަށް މަސައްކަތްކުރާ ޖަމުއިއްޔާ ޖަމާޢަތްތަކާއި، އަދި މޮނިޓަރުން ބުނާ ގޮތުގައި، މިއީ ފަލަސްތީނުގެ ރައްޔިތުން އެޤައުމުން ނުކުމެގެން ދިއުމަށް މަޖުބޫރުކުރުވައި، އެމީހުންގެ ބިންތައް ފޭރިގަތުމަށް އިސްރާއީލުން ދުރާލައި ރާވައިގެން ހިންގަމުންދާ ޖަރީމާއެކެވެ.