މާފުށީ ނަރުދަމާ ނިޒާމް ފުރިހަމަކުރުމަށް ބިޔަ މަޝްރޫޢުއެއް

ގެސްޓްހައުސް އައިލެންޑްގެ ގޮތުގައި މަޝްހޫރު، ކ.މާފުށީ ފެނާއި ނަރުދަމާ ޤާއިމްކުރުމަށް ބިޔަ މަޝްރޫޢުއެއް ފެށުމަށް ތައްޔާރުވެއްޖެއެވެ.

ހައުސިން އެންޑް އިންފްރާސްތަކްޗަރ މިނިސްޓްރީން ވަނީ މިކަމާ ގުޅޭގޮތުން ދެ އެއްބަސްވުމެއްގައި އެމްޑަބްލިއުއެސްސީއާއެކު ސޮއިކޮށްފައެވެ. މި އެއްބަސްވުމުގައި ހައުސިން މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ.ޢަބްދުﷲ މުއްތަލިބެވެ. އެމްޑަބްލިއުއެސްސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރު އަބްދުލް މަތީނެވެ.

އޭގެ ތެރެއިން އެއް އެއްބަސްވުަކީ މާފުށީ ހިއްކި ސަރަހައްދުގައި ފެނާއި ނަރުދަމާ ނިޒާމް ގާއިމްކުރުމަށް ވެވުނު އެއްބަސްވުމެވެ. ޤައުމީ ފެންކުންފުންޏާ މި މަސައްކަތް ހަވާލުކޮށްފައިވަނީ 128.6 މިލިއަން ރުފިޔާގެ އަގަކަށް 571 ދުވަހުގެ ތެރޭގައި މަސައްކަތް ނިންމާށެވެ.

ހައުސިން މިނިސްޓްރީން ބުނީ މި އެއްބަސްވުމުގެ ދަށުން މާފުށީ ހިއްކި ސަރަހައްދުގައި ފެނާއި ނަރުދަމާ ހޮޅިއެޅުމާއި ނަރުދަމާ ޕަމްޕިން ސްޓޭޝަންތައް ބެހެއްޓުމާއި، ނަރުދަމާ ޖަންކްޝަންތައް ބެހެއްޓުމާއި އައުޓްޑޯ ފޯލް އެޅުމަށް ނިންމާފައިވާކަމަށެވެ. މީގެ އިތުރުން މާފުށީ ހިއްކި ސަރަހައްދުގައި ދުވާލަކަށް 1500 ޓަނުގެ ފެން އުފެއްދޭވަރުގެ 2 އާރުއޯ ޕްލާންޓް ބެހެއްޓުމާއި 3500 ޓަނުގެ ފެން ރައްކާކުރެވޭވަރުގެ 2 ޓޭންކް ބެހެއްޓުމާއި، ފެންމީޓަރުތައް ބެހެއްޓުމުގެ އިތުރުންވެސް މަޝްރޫޢޫއާ ގުޅޭ އެހެނިގެން މަސައްކަތްތައް ހިމެނެއެވެ.

މާފުށީގައި ގާއިމްކޮށްފައިވާ ނަރުދަމާ ނިޒާމް އަޕްގްރޭޑިން މަސައްކަތުގެ އަގަކީ 57.4 މިލިއަން ރުފިޔާއެވެ. މި މަސައްކަތް 571 ދުވަހުގެ ތެރޭގައި ނިންމަން ޖެހޭއިރު، މި މަޝްރޫޢުގެ ދަށުން އެރަށުގައި ގާއިމްކޮށްފައިވާ ނަރުދަމާ އަޕްގްރޭޑް ކުރުމާއި، ނަރުދަމާ ޕަންޕިން ސްޓޭޝަންތައް ބެހެއްޓުމާއި އިތުރު މަސައްކަތް ހިމެނެއެވެ.