ހުޅުމާލެ ފޭސް 2 ގެ ޖީޕީ ކްލިނިކް 24 ގަޑިއިރަށް ބަދަލުކޮށްފި

ހުޅުމާލެ ފޭސް ދޭއްގައި ހުންނަ ޖެނެރަލް ޕްރެކްޓިސް (ޖީޕީ) ކްލިނިކުގެ ހިދުމަތް 24 ގަޑިއިރަށް ބަދަލުކޮށްފިއެވެ.

މިކަމާ ގުޅޭގޮތުން ހުޅުމާލެ ހޮސްޕިޓަލުން ބުނެފައިވަނީ ފޭސްދޭއް ޓަވަރު 16 ގައި ގާއިމްކޮށްފައިވާ ޖީޕީ ކްލިނިކްގެ ހިދުމަތް 24 ގަޑިއިރަށް ބަދަލުކޮށްފައިވާ ކަމަށެވެ. ނަމަވެސް ޖީޕީ ކްލިނިކްގެ ހިދުމަތް ހުކުރުދުވަހު ބަންދުވާނޭކަމަށް ހުޅުމާލެ ހޮސްޕިޓަލުން ވަނީ ބުނެފައެވެ.

ފޭސްދޭއްގައި ޖީޕީ ކްލިނިކެއް ގާއިމްކޮށްފައިވަނީ 2023 ވަނަ އަހަރުގެ ޖަނަވަރީމަހުގެ ތެރޭގައެވެ. އޭރު ހިދުމަތްދޭން ފެށީ ހެނދުނު 10 އަކުން ފެށިގެން ހަވީރު 5 ޖެހުމާ ހަމަޔަށެވެ. ހުޅުމާލޭ ފޭސް ދޭއްގައި 24 ގަޑިއިރު ހިދުމަތްދޭ ކްލިނިކެއް ނެތުމަކީ އެ ސަހަރުގައި ދިރިއުޅެމުންދާ ވަރަށްގިނަ ބައެއްގެ ޝަކުވާއަކަށްވެފައި އޮންނަކަމެކެވެ.

ޖީޕީ ކްލިނިކްގެ ހިދުމަތް 24 ގަޑިއިރަށް ހެދުމާ ގުޅިގެން މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް ހަލީމް އެކްސްގައި ވިދާޅުވެފައިވަނީ، މި ކަމުން ހުޅުމާލެ ފޭސް 2 ގައި ދިރިއުޅުއްވާ ރައްޔިތުންނަށް އިތުރު ލުއި ފަސޭހަތަކެއް ލިބިގެންދާނޭކަމަށެވެ.

ފޭސް ދޭއް ހިޔާގައި 16 ޓަވަރު ހިމެނޭއިރު އެތަނުގެ އާބާދީ 32 ހާހަށްވުރެ ގިނަ މީހުން އުޅެމުންދާއިރު، އެ ޓަވަރުތަކުގައި ދުވަސްވީ މީހުންނާއި ހާއްސަ އެހީއަށް ބޭނުންވާ މީހުން ގިނަ އަދަދަކަށް އުޅެމުންދެއެވެ.

މާލެ އަދި ހުޅުމާލޭގައި ޖީޕީ ކްލިނިކްތައް އިތުރުކުރުމަކީ އަދުގެ ސަރުކާރުގެ ސިޔާަތެކެވެ. ރައްޔިތުން މަޖިލީހުގެ އިޖުތިމާއީ ކޮމިޓީގައި މީގެ ކުރިން ވާހަކަދައްކަވަމުން ހަލީމް ވަނީ ސިއްހީ ނިޒާމް ހަރުދަނާ ކުރުމުގެ ގޮތުން މާލޭ ގްރޫޕް އޮފް ހޮސްޕިޓަލުގެ ފަރާތުން މިހާރުވެސް މުހިއްމު ކަންތައްތަކެއް ކުރަމުން ގެންދާކަމަށެވެ.

މިގޮތުން އެންމެ ހާއްސަ ކަމެއްގެ ގޮތުން މާލެ ސަރަހައްދުގައި 4 ޖީޕީ ކްލިނިކް ގާއިމްކުރުމުގެ މަސައްކަތް ކުރަމުންގެންދާކަން އޭނާ ފާހަގަކުރެއްވިއެވެ. މާލޭގައި ދެ ކްލިނިކް ގާއިމްކުރެވިގެންދާއިރު، ހުޅުމާލެ ފޭސް 1 ގައި ކްލިނިކަކާއި، ފޭސް ދޭއްގެ ވިނަރެސް ޓަވަރުގައި އިތުރު ކްލިނިކެއް ގާއިމްކުރެވިގެންދާނޭކަމަށް ޢަބްދުއްރައްޒާގް ވަނީ ވިދާޅުވެފައެވެ.