ޖަމްޢިއްޔަތުއްސަލަފުން މާލޭ ސިޓީ ކައުންސިލާ ބައްދަލުކޮށްފި

ދީނީ ހޭލުންތެރިކަން އިތުރުކުރުމާއި އިޖުތިމާޢީ އެކި ކަންކަމުގައި އެހީތެރިކަން ހޯދުމާ ގުޅޭގޮތުން، ޖަމްޢިއްޔަތުއްސަލަފުން މާލޭ ސިޓީ ކައުންސިލާ ބައްދަލުކޮށް މުހިންމު މަޝްވަރާތަކެއް ބާއްވައިފި އެވެ.

މި ބައްދަލުވުމުގައި މާލޭ ސިޓީގެ މޭޔަރު އާދަމް އާޒިމުގެ އިތުރުން ކައުންސިލްގެ ބައެއް އިސް ބޭފުޅުން ބައިވެރިވެވަޑައިގެންނެވިއެވެ. ޖަމްޢިއްޔަތުއްސަލަފުގެ ފަރާތުން މި ބައްދަލުވުމުގައި ބައިވެރިވެވަޑައިގަތީ އެ ޖަމްޢިއްޔާގެ ރައީސް އައްޝައިޚް ޢަބްދުﷲ މުޙައްމަދުގެ އިތުރުން ޖަމްޢިއްޔާގެ ބައެއް އިސް ބޭފުޅުންނެވެ.

މި ބައްދަލުވުމުގެ މައިގަނޑު މަޤްޞަދަކީ ދީނީ ހޭލުންތެރިކަން ފެތުރުމުގެ މަސައްކަތުގައި ސިޓީ ކައުންސިލުގެ ފަރާތުން އެހީތެރިކަން ފޯރުކޮށްދެވިދާނެ ކަންކަމާ ބެހޭގޮތުން މަޝްވަރާކުރުން ކަމަަށް ސަލަފުން ބުންޏެވެ.

މިގޮތުން،މާލޭ ސިޓީކައުންސިލާ ޖަމްޢިއްޔަތުއް ސަލަފާ ދެމެދު ފަހުނާމާއެއްގައި ސޮއިކުރުމުގެ އިތުރުން، މާލޭގެ އެކި ސަރަޙައްދުތަކުގައި ބެހެއްޓިފައިވާ ޑިޖިޓަލް ސްކްރީންތައް މެދުވެރިކޮށް ދީނީ މެސެޖުތައް ފެތުރުމާއި، އެ ސްކްރީންތަކުގެ ބޭނުން ހެޔޮގޮތުގައި ހިފޭނެ ގޮތްތަކާ ބެހޭގޮތުން ދެ ފަރާތުން ޚިޔާލު ބަދަލުކުރެއްވިއެވެ.އަދި ސިޓީ ކައުންސިލުގެ ދަށުގައިވާ މާލޭގެ ބޮޑެތި ހުސްބިންތަކުގައި ދެފަރާތުން ގުޅިގެން ހިންގިދާނެ ޙަރަކާތްތަކާ ބެހޭގޮތުން ވާހަދެކެވުނު ކަމަށް އެ ޖަމިއްޔާއިން ބުނެ އެވެ.

މީގެ އިތުރުން، ބާވެ ހަލާކުވެފައިވާ ދީނީ ލިޔުންތައް އިސްލާމީ އުޞޫލުތަކާ އެއްގޮތަށް ރައްކާތެރިކަމާއެކު ނައްތާލުމުގެ އިންތިޒާމުތައް ހަމަޖެއްސުމާ ގުޅޭގޮތުން ވެސް މި ބައްދަލުވުމުގައި މަޝްވަރާކޮށްފައިވެ އެވެ.

ޖަމްޢިއްޔަތުއްސަލަފުން ކޮންމެ ރަމަޟާން މަހަކު ހަސްފަތާލުތަކަށް އަމާޒުކޮށްގެން ކުރިއަށްގެންދާ “ހަޔާދާ” ރޯދަވީއްލާ ޕެކް ތައްޔާރުކުރުމުގެ މަސައްކަތަށް ބޭނުންވާ އެހީތެރިކަމާ ގުޅޭގޮތުން ވެސް މި ބައްދަލުވުމުގައި ވާހަކަދެކެވުނު ކަމަަށާ އެގޮތުން މި ޕެކްތައް ތައްޔާރުކުރުމަށް ގަންނަ ތަކެތި ގުދަންކޮށް، ޕެކް ކުރުމުގެ މަސައްކަތް ކުރާނެ އެކަށީގެންވާ ތަނެއް ހޯދުމުގައި ކައުންސިލުގެ އެހީތެރިކަން ދިނުމާ ބެހޭގޮތުން ދެ ފަރާތުން މަޝްވަރާ ކުރި ކަމަށް އެ ޖަމިއްޔާއިން ބުނެ އެވެ.

މި ބައްދަލުވުމަކީ މާލޭ ސިޓީގައި ދީނީ ހޭލުންތެރިކަން އިތުރުކޮށް، އިޖުތިމާޢީ ކަންކަމުގައި މަދަނީ ޖަމްޢިއްޔާތަކާއި ސަރުކާރުގެ އިދާރާތަކާ ދެމެދު އޮންނަ ގުޅުން ހަރުދަނާކުރުމަށް ކުރެވުނު މުހިންމު މަސައްކަތެއް ކަމަށް ޖަމްޢިއްޔަތުއްސަލަފުން ބުނެ އެވެ.