އދ. އަތޮޅު ތަޢުލީމީ މަރުކަޒު ތަފާތު؛ ދަރިވަރުންގެ އޯގާތެރިކަމާއި ލޯބި ފޯރުކޮށްދިނީ ފިޔަވަތީގެ ކުދިންނަށް

އދ. އަތޮޅު ތަޢުލީމީ މަރުކަޒުގެ ގްރޭޑް އަށެއްގެ ދަރިވަރުން އިސްނަގައިގެން، ކުޑަކުދިންގެ ހިޔާ "ފިޔަވަތި" ގައި ދިރިއުޅޭ ކުދިންނަށް އީދު ހަދިޔާ ފޮނުވައި، ލޯތްބާއި އޯގާތެރިކަމުގެ ނަމޫނާއެއް ދައްކައިފިއެވެ.

މިއީ މިނިސްޓްރީ އޮފް އެޑިޔުކޭޝަނުން މިއަހަރު ހުރިހާ ސުކޫލުތަކެއްގައި ކުރިއަށްގެންދާ "ވެލިއު އެޑިޔުކޭޝަން" ޕްރޮގްރާމްގެ ދަށުން ކުރިއަށް ގެންދިޔަ ހަރަކާތެކެވެ. މި ޕްރޮގްރާމަކީ ކޮންމެ މަހަކު ވަކި ތީމެއް ކަނޑައަޅައިގެން ދަރިވަރުންގެ ކިބައިގައި ރަނގަޅު އާދަތައް އަށަގަންނުވަން ހިންގާ ހަރަކާތެކެވެ. ކޮންމެ ތީމެއްގެ ދަށުންވެސް ކްލާސް ތެރެއާއި، ގޭތެރެ އަދި މުޖުތަމަޢަށް ފައިދާހުރި ކަންތައްތަކެއް ކުރުމަށް ރާވައެވެ.

އެގޮތުން މެއި މަހަށް ކަނޑައަޅާފައިވާ ތީމަކީ "އޯގާތެރިކަން" ކަމަށްވުމާއެކު، އދ. އަތޮޅު ތަޢުލީމީ މަރުކަޒުގެ ގްރޭޑް 8 ގެ ދަރިވަރުން ވަނީ މުޖުތަމަޢަށް އޯގާތެރިކަން ފޯރުކޮށްދިނުމުގެ ގޮތުން މި ހަރަކާތް ރާވާފައެވެ.

މި ހަރަކާތާ ގުޅޭގޮތުން "ވޮއިސް" އަށް މަޢުލޫމާތު ދެއްވަމުން އެ ގްރޭޑްގެ ކްލާސް ޓީޗަރަކު ވިދާޅުވީ، ފިޔަވަތީގެ ކުދިންނަށް ހަދިޔާ ދިނުމަށް ބޭނުންވާ ފައިސާ ހޯދާފައިވަނީ ސުކޫލުގެ ދަރިވަރުންނާއި މުވައްޒަފުންގެ އެހީތެރިކަމާއެކު ފަންޑް ރެއިޒް ކޮށްގެން ކަމަށެވެ.

ޓީޗަރު ވިދާޅުވި ގޮތުގައި ފުރަތަމަ ގަސްތުކުރީ ލިބުނު ފައިސާ އެހީގެ ގޮތުގައި ދިނުމަށެވެ. ނަމަވެސް ފައިސާ ދިނުމުގައި ހުރި އިދާރީ އުސޫލުތަކުގެ ސަބަބުން، އީދު ހަދިޔާއެއްގެ ގޮތުގައި ކުދިންނަށް ބޭނުންކުރެވޭނެ ތަކެތި ފޮނުވުން މާ ރަނގަޅުވާނެ ކަމަށް ފެންނާތީ ކުދިންނަށް ކަމުދާނެ ތަކެތި ހަދިޔާއެއްގެ ގޮތުގައި ފޮނުވީއެވެ.

ހަދިޔާގެ ގޮތުގައި ފޮނުވާފައިވަނީ މަހިބަދޫގެ ސަގާފަތާއި ރަށުގެ ރަހަތައް ދައްކުވައިދޭ ތަކެއްޗެވެ. އެގޮތުން ރަށުގައި ތައްޔާރުކުރާ ލުއިކާނާ، ތެލުލި ބަނބުކެޔެ، ކުުޅިކާޖާ، ބެންބޮޅު، މުރުމުރު އަދި ކޭމުޖެހި ފަދަ ތަކެތި ހިމެނެއެވެ.

މި ހަރަކާތުގައި މައިގަނޑު ގޮތެއްގައި ބައިވެރިވީ ގްރޭޑް 8 އެއްގެ ދަރިވަރުންނެވެ. ނަމަވެސް، މިއީ މުޅި ސުކޫލުގެ ދަރިވަރުންނާއި މުވައްޒަފުންގެ ފަރާތުން ދެވުނު ހަދިޔާއެއްކަން ޓީޗަރު ފާހަގަކުރެއްވިއެވެ.

މި ހަރަކާތުގައި ގްރޭޑް 8 އެއްގެ ދަރިވަރުން ވަރަށް ފޯރިއާއެކު ބައިވެރިވިއެވެ. ހަދިޔާތައް ބަންދުކޮށް، ޕާރުސަލް ތައްޔާރުކުރުމާއި، އީދު މުބާރަކް ކާޑު ހެދުމުގައިވެސް އިސްކޮށް އުޅުނީ ދަރިވަރުންނެވެ.

މީގެ އިތުރުން، ބެލެނިވެރިންގެ ފަރާތުންވެސް ބޮޑު އެއްބާރުލުމެއް ލިބުނުކަން ޓީޗަރު ފާހަގަކުރެއްވިއެވެ. އެގޮތުން ތަކެތި ތައްޔާރުކޮށްދިނުމާއި، ސުކޫލުން ބޭނުންވި ކޮންމެ ވަގުތަކު ދަރިވަރުން ސުކޫލަށް ގެންގޮސްދީ، މި ކަމުގައި ބެލެނިވެރިން ވަނީ ނަމޫނާ ދައްކާފައެވެ.

"ގްރޭޑް 8 ގެ ދަރިވަރުންގެ ބެލެނިވެރިންނަށް މި ހަދިޔާ ފޮނުވުމާ ގުޅޭގޮތުން މައުލޫމާތު ދިނުމުން، އެ ބޭފުޅުންގެ ފަރާތުން ދޭ ހަދިޔާއެއްގެ ގޮތުން ވަނީ ކޭމުޖަހާތަކެތި ތައްޔާރުކޮށް އަޅުގަނޑުމެންނާ ހަވާލުކޮށްދެއްވާފަ. އަދި ސުކޫލް ބަންދު ދުވަސްވަރު ނަމަވެސް، ސްކޫލުން ކަނޑައަޅާފައިވާ ގަޑިތަކަށް ދަރިވަރުން ސްކޫލަށް ހާޒިރުކޮށްދެއްވުމުގައާއި، ދަރިވަރުން ބަލާ ވަޑައިގަތުމުގައި ބެލެނިވެރިން އެއްވެސް ޝަކުވާއެއް ނެތި ދެއްވި ފުރިހަމަ އެއްބާރުލުމާއި އެހީތެރިކަން ޝުކުރުވެރިކަމާއެކު ފާހަގަކުރަން." ޓީޗަރު ވިދާޅުވިއެވެ.

ޓީޗަރު ވިދާޅުވިގޮތުގައި މިފަދަ ހަރަކާތެއް ހިންގުމުގެ މައިގަނޑު މަޤްޞަދަކީ ދައުލަތުގެ ބެލުމުގެ ދަށުގައި ތިބޭ ކުދިންނަކީވެސް މި މުޖުތަމަޢުގެ ބައެއްކަން ދަރިވަރުންނަށް އިހުސާސްކޮށްދީ، އެކުދިންނަށް އޯގާތެރިވުމުގެ ރޫޙު އާލާކުރުމެވެ.

މި ހަރަކާތާމެދު ސްކޫލުގެ ދަރިވަރުންނާއި މުދައްރިސުން ތިބީ ނުހަނު އުފަލުންނެވެ. އެހެން ޓީޗަރުންގެ ފަރާތުން މިކަމަށް ބޮޑު ތަރުހީބެއް ލިބުނުއިރު، ދަރިވަރުން ވަނީ ފިޔަވަތީގެ ކުދިން މަހިބަދޫއަށް ގެނެސް، އެކުދިންނާއެކު ވަގުތު ހޭދަކޮށްލުމުގެ ޝައުގުވެރިކަންވެސް ފާޅުކޮށްފައެވެ.