ފަލާހްގެ ރައްދު: ކުރި ވައްކަން ހެއްކާއެކު އަރާހަމަކުރާނެ

ކުރީގެ ސަރުކާރުގައި ހިންގާފައިވާ ވައްކަންތައް ހެއްކާއެކު އަރާހަމަ ކުރާނެ ކަމަށް ވިދާޅުވެ ކުރީގެ ފޮރިން މިނިސްޓަރު އަބްދުﷲ ޝާހިދަށް ކޮންގްރެސް ޕާޓީގެ ޕީޖީ ގުރޫޕްގެ ލީޑަރު އިބްރާހިމް ފަލާހް ރައްދު ދީފި އެވެ.

އޭނާގެ ރަައްދު, ޝާހިދަށް އަމާޒުކުރީ އަންނަ މަހުގެ ތިންވަނަ ދުވަހު އެމްޑީޕީން މުޒާހަރާ ކުރަން ނިންމުމުން އެކަން ހާމަކޮށް ޝާހިދު ކުރެއްވި ޕޯސްޓަކާއި ގުޅިގެންނެވެ. އާންމުންގެ ބޮޑު ފާޑުކިޔުމެއް އަމާޒުވެފައިވާ ފަލާހް ވިދާޅުވި ގޮތުގައި އެމްޑީޕީން އުޅެނީ ގައުމު ހަލަބޮލި ކުރާށެވެ. އަދި މުޒާހަރާ ކުރަނީ ކޮށްފައިވާ ވައްކަންތައް މިހާރު ބަލަން ފަށާތީ އެވެ.

އަދި ވިދާޅުވީ ޖަރީމާ ހިންގާ ގައުމު ނޮޅާ ހުސްކޮށްލުމަށް ފަހު އެހެން މީހުންގެ ބޮލަށް ކަނޑާލާ މަތިޖަހަން އަބަދު އުޅެވޭނެ ކަމަށް ހީނުކުރުމަށް އިންޒާރުކޮށްފައިވެ އެވެ.

‏"ބަދަލުގެ ނަމުގައި އެކަނި ފަސް އަހަރު ގާތް ރަހްމަތްތެރިންނަށް 800 މިލިއަން ރުފިޔާ ބަހާލި. ކޮވިޑުގައި ގައުމުތަކުން ލިބުން ހާހިލޭ އެހީ އެހެރީ ރާއްޖެއިން ބޭރުގައި އަމިއްލަ އެކައުންޓްތަކުގައި," އިދިކޮޅުގެ ވެރީންނަށް ތުހުމަތު ކުރައްވާ ފަލާހް ވިދާޅުވި އެވެ.

‏އަދި ވިދާޅުވީ ޕްރޮޖެކްޓް ހިންގުމުގެ ނަމުގައި ހުރީ ކަރުދާހުގައި ސޮއިކޮށްލި ގޮތަށް އެއްވެސް މަސައްކަތެއްނުކޮށް ކަމަށެވެ. ނަމަވެސް އެކުވެރި ކުންފުނިތަކަށް އެތައްސަތޭކަ މިލިއަން ރުފިޔާ ބަހާލާފައިވާ ކަމަށާ އެކަން ކުރީ ބައިއަޅާ ގޮތަށް ކަަމަށެވެ.

".. ހީނުކުރަށްވާ ދިވެހި ރައްޔިތުން އެހާ މޮޔަ ކަމަށް. ތިއުޅެނީ މިހާލުގައި ގައުމު ޖައްސާފަ އަދިވެސް ހިތް ނުފުރިގެންތަ. މިގޮތަށް ކިޔާނަމަ ރައްޔިތުންނަށް އެމްޑީޕީގެ ވެރިން ހިންގާފަހުރި ޖަރީމާތަށް ހާހުން ކިޔާލަން އެބަހުރި. އިންތިޒާރުކޮށްލައްވާ ކުރި ވައްކަންތައް އަރާހަމަކުރާނެ ހެއްކާއެކު," ޝާހިދުގެ ޕޯސްޓަށް ރައްދު ދީ ފަލާހް ކުރި ޕޯސްޓްގައި ވިދާޅުވި އެވެ.