އެމެރިކާގެ މަނަވަރުތަކަށް ހަމަލާދީފިނަމަ އީރާން ބިމާ ހަމަކޮށްލާނެ ކަމުގެ އިންޒާރު ޓްރަމްޕް ދީފި

ހޯރްމޫޒް ކަނޑުއޮޅިން ދަތުރުކުރާ އެމެރިކާގެ މަނަވަރުތަކަށް އީރާނުން ހަމަލާދީފިނަމަ، އެ ގައުމު "ދުނިޔޭގެ ޗާޓުން ފޮހެލާނެ" ކަމުގެ ވަރުގަދަ އިންޒާރެއް އެމެރިކާގެ ރައީސް ޑޮނަލްޑް ޓްރަމްޕް ދީފިއެވެ.

"ޕްރޮޖެކްޓް ފްރީޑަމް" ގެ ނަމުގައި އެ ސަރަހައްދުން ދަތުރުކުރާ އުޅަނދުފަހަރަށް އެމެރިކާގެ އަސްކަރިއްޔާއިން ހިމާޔަތް ދެމުންދާއިރު، އެމެރިކާގެ މަނަވަރުތަކަށް އަމާޒުކޮށް އީރާނުން އެއްވެސް ހަމަލާއެއް ދީފިނަމަ އީރާން ބިމާ ހަމަކޮށްލާނެ ކަމަށް ޓްރަމްޕް ބުނެފައިވެއެވެ.

ޓްރަމްޕް މި އިންޒާރު ދިނީ ހޯރްމޫޒް ކަނޑުއޮޅީގައި އޮތް އެމެރިކާގެ މަނަވަރަކަށް އީރާނުގެ މިސައިލް ހަމަލާތަކެއް އެރި ކަމަށް ބުނެ އީރާނުން ފަތުރަމުންދާ ރިޕޯޓްތަކާ ގުޅިގެންނެވެ. ނަމަވެސް އެމެރިކާގެ އަސްކަރިއްޔާއިން ވަނީ އެ ވާހަކަތައް ދޮގުކޮށްފައެވެ.

އެމެރިކާގެ އަސްކަރިއްޔާއިން ބުނި ގޮތުގައި، ވިޔަފާރި އުޅަނދުތަކަށް ހުރަސްއަޅަން މަސައްކަތްކުރި އީރާނުގެ ކުދި ބޯޓުތަކެއް ވަނީ ފައްތާލާފައެވެ. އަދި އެމެރިކާގެ ހިމާޔަތުގައި ޑެންމާކުގެ މާސްކް ކުންފުނީގެ އުޅަނދެއް ރައްކާތެރިކަމާއެކު އެ ސަރަހައްދު ހުރަސްކޮށްފައިވާ ކަމަށްވެސް ރިޕޯޓްތައް ބުނެއެވެ.

މި މައްސަލައާ ގުޅިގެން އީރާނުގެ ޚާރިޖީ ވަޒީރު އައްބާސް އަރަގްޗީ ސޯޝަލް މީޑިއާގައި ވިދާޅުވީ، ހޯރްމޫޒްގައި ހިނގަމުންދާ ކަންކަމުން އެނގެނީ ސިޔާސީ މައްސަލަތަކަށް އަސްކަރީ ހައްލެއް ނެތްކަން ކަމަށެވެ. އަދި ޕާކިސްތާނު މެދުވެރިއެއްގެ ދައުރު އަދާކުރަމުންދާ މަޝްވަރާތަކުގައި ކުރިއެރުންތަކެއް ލިބެމުންދާ ކަމަށާއި، އެމެރިކާ އާއި ޔޫއޭއީ އިން މި ދަންތުރައިގައި ނުޖެހުމަށް އޭނާ ވަނީ ގޮވާލައްވާފައެވެ.

ފޮކްސް ނިއުސްއަށް ދިން އިންޓަވިއުއެއްގައި ޓްރަމްޕް ބުނީި، ކުރިއަށް އޮތީ ދެ މަގެއް ކަމަށެވެ. އެއީ ރަނގަޅު އެއްބަސްވުމަކަށް އައުން ނުވަތަ އަސްކަރީ ހަރަކާތްތައް އަލުން ފެށުން ކަމަށެވެ. އަދި މިހާރު ކުރިއަށްދާ އަސްކަރީ ހަރަކާތްތަކަކީ މިހާތަނަށް ހިންގުނު އެންމެ ކާމިޔާބު އެއް އޮޕަރޭޝަން ކަމަށާއި، މިހާރު ކުރިއަށްދާ މަޝްވަރާތަކުގައި އީރާނުން ދޫދެމުންދާ ކަމަށްވެސް ޓްރަމްޕް ފާހަގަކުރިއެވެ،

ޓްރަމްޕް މީގެ ކުރިންވެސް ވަނީ އީރާނަށް މިފަދަ ވަރުގަދަ އިންޒާރުތަކެއް ދިފައެވެ. އެގޮތުން އީރާނުން އެމެރިކާގެ ޝަރުތުތަކަށް އެއްބަސްނުވެއްޖެނަމަ މުޅި ހަޟާރާތް ނެތިދާނެ ކަމަށް ބުބެފައިވެއެވެ. އެކަމާގުޅިގެން ބައިނަލްއަގުވާމީ މުޖުތަމައުގެ ފާޑުކިޔުން އޭނާއަށް އަމާޒުވިއެވެ.