ރާއްޖޭގެ ކަނޑުގެ ސަރަހައްދުގައި ބޮމުގެ ހަމަލާއެއް ދިން ކަމަށް ދެކެވޭ ވާހަކަތައް ދޮގު ކޮށްފި
ރާއްޖޭގެ ކަނޑުގެ ސަރަހައްދުގައި ދެ ތެޔޮ ބޯޓަކަށް ބޮމުގެ ހަމަލާއެއް ދިންކަމަށް ދެކެވެމުންދާ ވާހަކަތައް ގައުމީ ދިފާއީ ބާރު، އެމްއެންޑީއެފުން ދޮގުކޮށްފިއެވެ.
އެމްއެންޑީއެފުން ބުނީ މިފަދަ ހާދިސާއެއް ދިވެހިރާއްޖޭގެ ކަނޑުގެ ސަރަހައްދުގައި ހިނގާފައިވާ ކަމުގެ އެއްވެސް ރިޕޯޓެއް މިހާތަނަށް ލިބިފައިނުވާ ކަމަށެވެ.
އަދި މިހާތަނަށް އެ އިދާރާއިން ބެލި ބެލުމުން އެނގުނު ގޮތުގައި މިކަމާއި ގުޅިގެން ފެތުރެމުންދާ ބައެއް މަޢުލޫމާތާއި ފޮޓޯއަކީ މިީގެ ކުރިން ރާއްޖެއާއި ދުރުން ހިނގާފައިވާ ހާދިސާތަކުގެ މަޢުލޫމާތާއި ފޮޓޯކަން އެނގިފައިވާ ކަމަށާއި، މިފަދަ ކަމެއް ހިންގިކަމުގެ އެއްވެސް ނިޝާނެއް ފެންނަން ނެތް ކަމަށެވެ.
މީގެ އިތުރުންވެސް އެމްއެންޑީއެފުން ބުނީ މަޢުލޫމާތު ހިއްސާ ކުރާ ސަރަހައްދީ އިދާރާތަކަށްވެސް އެފަދަ ރިޕޯޓެއް ލިބިފައިވާކަމުގެ އެއްވެސް މަޢުލޫމާތެއް މިހާތަނަށް ލިބިފައިނުވާތީ، ދިވެހިރާއްޖޭގެ ކަނޑުގެ ސަރަހައްދެއްގައި އެފަދަ ޙާދިސާއެއް ހިނގިކަމަށް ފަތުރާ ޚަބަރަކީ ސައްހަ ޚަބަރެއްނޫން ކަމަށެވެ.
ރާއްޖޭގެ ކަނޑުގެ ސަރަހައްދުން ދަތުރުކުރި އިޒްރޭލާ ގުޅުން އޮތް ދެ ތެޔޮ ބޯޓަކަށް ބޮމުގެ ހަމަލާދީފައިވާ ކަމަށް ބުނެ ރެއިން ފެށިގެން ވާހަކަތަކެއް ދަނީ ދައުރު ކުރަމުންނެވެ. މިކަމާއި ގުޅުން ހުރި ކަމަށް ބުނާ ބައެއް ފޮޓޯތަކެއް ވެސް ދަނީ ދައުރުކުރަމުންނެވެ.
އެމްއެންޑީއެފުން އަންނަނީ މިކަން އިތުރަށް ބަލަމުންނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
