އީރާނަށް ހަމަލާ ދިނުމުގައި އެމެރިކާގެ ވިސްނުން ބަދަލުވާން ފަށައިފި
ލިޔުންތެރިޔާ
އަބްދުﷲ ހުސައިން
އީރާނަށް ހަމަލަދިނުމާ ގުޅޭގޮތުން އެމެރިކާއިން ދެމުން އަންނަ އިންޒާރުގެ އަޑު މަޑުވެ، އެންމެފަހުން އެޤައުމުގެ ވިސްނުން ބަދަލުވާން ފަށައިފިއެވެ.
އިސްރާއީލްގެ ނޫހެއްކަމަށްވާ ޓައިމްސް އޮފް އިސްރާއީލުން ބުނީ، އީރާނަށް ހަމަލާ ދިނުމަކީ ރައީސް ޑޮނާލްޑް ޓްރަމްޕްގެ ސިޔާސަތެއް ނޫންކަމަށާއި، އީރާނާއެކު ނޫސީދާ ވާހަކަތައް ފެށުމަށް އިސްކަންދެއްވާކަމަށް ވައިޓްހައުސްގެ އޮފިޝަލުން ވިދާޅުވެފައިވާކަމަށެވެ. ޓައިމްސް އޮފް އިސްރާއީލުން ރިޕޯޓްކުރިގޮތުގައި އީރާން މައްސަލާގައި ވައިޓް ހައުސްގެ އޮފިޝަލުންގެ ވިސްނުން ވަނީ ދެކަފިވެފައެވެ.
އެމެރިކާގެ ނޫހަކަށް ވައިޓްހައުސްގެ އޮފިޝަލުންތަކެއް މައުލޫމާތުދެއްވަމުން ވިދާޅުވެފައިވަނީ، އީރާނުން ހުށަހަޅާފައިވާ ހުށަހެޅުމަށް ވައިޓް ހައުސްއިން ވަރަށް ސީރިއަސްކޮސް ވިސްނަމުންދާކަމަށެވެ. އީރާނަށް ހަމަލާދޭން ޖެހިއްޖެނަމަ، އެކަމަކީ ވަރަށްބޮޑަށް ތައްޔާރުވެގެން ނޫނީ ނުކުރެވޭނެކަމެއްގެ ގޮތުގައި އޮފިޝަލުން ވަނީ ފާހަގަކޮށްފައެވެ.
އެމެރިކާއިން ވަނީ އީރާނުން ކުރިއަށްގެންދާ ނިއުކްލިއާ މަޝްރޫޢުގެ މަސައްކަތްތައް ހުއްޓާލުމަށް އިންޒާރުދީފައެވެ. އަދި އެކަމާ ގުޅޭގޮތުން ވާހަކަތައް ފެށުމަށް ވަނީ އަންގާފައެވެ. ނަމަވެސް އީރާނުން ވަނީ އެމެރިކާއާއެކު ކުރާނެ މަޝްވަރާއެއް ނޯންނާނެކަމަށް ބުނެފައެވެ. ނަމަވެސް ނުސީދާ ގޮތެއްގައި އެމެރިކާއާ ވާހަކަތައް ދެއްކިދާނޭކަމަށް އީރާނުން ވަނީ ބުނެފައެވެ. އީރާނުން އެގޮތަށް ބުނުމާ ގުޅިގެން އެމެރިކާގެ ރައީސް ޑޮނާލްޑް ޓްރަމްޕް ވަނީ، އީރާނުގެ ނިއުކްލިއާ ޕްރޮގްރާމާ ގުޅޭގޮތުން މަޝްވަރާގެ މޭޒުދޮށަށް ނާންނަނަމަ ތެހެރާނަށް ބޮންއަޅަން ޖެހިދާނޭކަމުގެ އިންޒާރުދެއްވާފައެވެ.
ޓްރަމްޕްގެ އިންޒާރާ ގުޅޭގޮތުން އީރާނުގެ ރޫހީ ލީޑަރު އާޔަތުއްﷲ އަލީ ހާމަނާއީ ވިދާޅުވެފައިވަނީ، އީރާނަށް ހަމަލާ ދީފިނަމަ ރައްދުގައި އެޤައުމުންވެސް ހަމަލާދޭނެ ކަމަށެވެ. މި މައްސަލާގައި އީރާނުގެ އަސްކަރިއްޔާއިން ބުނެފައިވަނީ، އެމެރިކާ ފަހާ މެކްސިކޯގެ ކަނޑަށް ދާންޖެހުނު ނަމަވެސް އެކަން ކުރާނޭކަމަށެވެ. އެމެރިކާއިން އީރާނަށް އިންޒާރު ދިނުމާ ގުޅިގެން ރަޝިއާއިންވެސް ވަނީ އީރާނާއެކު އޮތްކަމަށް ބުނެފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
