އުތުރު ތިލަފަޅުން ގޯތި ނުދީ އެހެން ކަންކަން ކުރާތީ ތިލަފަޅު ޔޫނިއަނުން ކަންބޮޑުވެއްޖެ

މާލެ ސަރަހައްދުގައި ދިރިއުޅެމުންދާ ފަރާތްތަކަށް ގޯތި ދިނުމަށް މިދިޔަ ސަރުކާރުން ހިންގި ގެދޮރުވެރިޔާ އަދި ބިންވެރިޔާ ސްކީމްގެ ދެވަނަ ފިޔަވަހީގެ ދަށުން އުތުރު ތިލަފަޅު ހިއްކައި އެތަނުން ގޯތި ދިނުމަށް އުތުރު ތިލަފަޅު ޔޫނިއަނުން ގޮވާލައިފިއެވެ.

ތިލަފަޅު ޔޫނިއަނުން މިއަދު ބޭއްވި ނޫސްވެރިންގެ ބައްދަލުވުމެއްގައި ވަނީ، ގޯއްޗަށް ހުށަހަޅާފައިވާ ފޯމުތަށް އިވަލުއޭޓް ނުކުރުމާއި، އުތުރު ތިލަފަޅުގައި ތަފާތު އެކި މަޝްރޫއުތައް ހިންގަން ސަރުކާރުން ހާމަކޮށްފައިވާތީ އާއި ގޯތި ދިނުމަށް ސަރުކާރުން އުޒުރުވެރިވާތީ ކަންބޮޑުވުން ފާޅުކޮށްފައެވެ.

އުތުރު ތިލަފަޅު ޔޫނިއަން އިން މިއަދު ބޭއްވި ނޫސްވެރިންގެ ބައްދަލުވުމުގައި ގާނޫނީ ވަކީލު އަލީ ހުސައިން ވިދާޅުވީ މިދިޔަ ސަރުކާރުން އުތުރު ތިލަފަޅުގެ ބިން ހިއްކީ އެ ސަރަހައްދުގައި ބޯހިޔާވަހިކަމަށް ބޭނުންވެފައިވާ ފަރާތްތަކަށް ބޯހިޔާވަހިކަން ފޯރުކޮށްދިނުމަށް ކަމަށެވެ.

އުތުރުތިލަފަޅުން ބިން ހިއްކަން ފެށި މަގުސަދާއި ހިލާފަށް އެތަނުގައި ހޯޕް އައިލެންޑާއި މަރުކަޒީ ޖަލު ތަރައްގީކުރުމަށް ސަރުކާރުން ނިންމާފައިވާތީ އުތުރު ތިލަފަޅު ޔޫނިއަން އިން މިއަދު ބޭއްވި ނޫސްވެރިންގެ ބައްދަލުވުމުގައި ވަނީ ކަންބޮޑުވުން ފާޅުކޮށްފައެވެ. އެގޮތުން އެންމެ 300 އެއްހާ ކުދިން ރިހިބިލިޓޭޓް ކުރުމަށް 19،000 އާއިލާގެ އުންމީދު ގެއްލުވާލައިގެން ނުވާނެކަމަށް އަލީ ހުސައިން ވިދާޅުވިއެވެ.

އުތުރުތިލަފަޅުގައި 200 ހެކްޓަރުގެ ބިން ހިއްކައި، އެތަނުގައި ދަނޑުވެރިކަން ކުރާ ޒޯނެއް ތަރައްގީކުރުމަށްވެސް ސަރުކާރުން ވަނީ ނިންމާފައިވެއެވެ. މިކަމަށް އިޝާރަތްކުރައްވާ އަލީ ހުސައިން ވިދާޅުވީ އުތުރު ތިލަފަޅުގައި ދަނޑުވެރިކަމުގެ މަސައްކަތް ފެށުމަށް ނިންމުމަކީ ކަންބޮޑުވާންޖެހޭ ކަމެއް ކަމަށެވެ.

ބިންވެރިޔާ އަދި ގެދޮރުވެރިޔާ ސްކީމް އަކީ މާލޭގެ ރައްޔިތުންނާއި، ދަފްތަރުގައި ތިބި ރައްޔިތުންނާއި، 20 އަހަރަށް ވުރެ ގިނަ ދުވަހު މާލޭގައި ދިރިއުޅެފައިވާ އެހެން ރަށްރަށުގެ ރައްޔިތުންނަށް ކުރިމަތިލެވޭނޭހެން ހުޅުވާލި ސްކީމެކެވެ. މި ސްކީމްގެ ދަށުން ފްލެޓް އަދި ގޯތި ހޯދުމަށް 40،000 އަށްވުރެ ގިނަ މީހުން ވަނީ ކުރިމަތިލާފައެވެ.