ނިދާފައި އޮތުމަށްފަހު، މިދިޔަ ސަރުކާރު ނިމެން ކައިރިވުމުން އޭސީސީ ހޭލީ މަގާމުގެ ދިފާއުގައި: މައުރޫފް
ލިޔުންތެރިޔާ
ޚަދީޖާ އަރުފާ
ކުރީ ސަރުކާރުގައި ”ނިދާފައި އޮތުމަށްފަހު“ އެ ސަރުކާރު ނިމެން ވުމުން އެންޓި ކޮރަޕްޝަން ކޮމިޝަން (އޭސީސީ) ހޭލީ، އެތަނުގައި މެންބަރުންގެ ތިބި މީހުންގެ ވަޒީފާގެ ދިފާޢުގައިކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މަޢުރޫފް ޒާކިރު ވިދާޅުވެއްޖެއެވެ.
އޭސީސީގެ ރައީސާއި ނާއިބު ރައީސް އައްޔަނު ކުރުމުގެ ބާރު ރައީސުލްޖުމްހޫރިއްޔާއަށް ދޭގޮތަށް އޭސީސީގެ ގާނޫނު އިސްލާހު ކުރުމަށް ސަރުކާރުގެ ފަރާތުން ހުށަހަޅާފައިވާ ބިލަށް ބަހުސް ކުރައްވަމުން މައުރޫފް ވަނީ މަޖާޒީ ގޮތަކަށް ސަރުކާރަށް ވަރަށް ބޮޑަށް ފާޑުވިދާޅުވެފައެވެ.
”ދިވެހި ރައްޔިތުން ރައީސް މުޢިއްޒު އަދި ޕީއެންސީގެ އަގުލަބިއްޔަތު އޮތް މަޖިލީހެއް އިންތިޚާބުކޮށްފައި ދެންނެވީ، އޭސީސީ، ޕީއެންސީއާއި ސަރުކާރު ބޭނުންވާ ގޮތަކަށް ބަދަލުކޮށްދެއްވާށޭ. ދިވެހި ރައްޔިތުން ބުނީ، ގާނޫނު އަސާސީގައިހުރި މިނިވަން މުވައްސަސާތަކުގެ ބާރު ރައީސުލްޖުމްހޫރިއްޔާއަށް ދެއްވާށޭ. އަދި މަޖިލީހުގެ ރައީސަކީވެސް ރައީސުލްޖުމްހޫރިއްޔާ އައްޔަނުކުރައްވާ ބޭފުޅެއްގެ ގޮތުގައި ހައްދަވައިދެއްވާށޭ. ދިވެހި ރައްޔިތުން އަދިވެސް ވިދާޅުވެފައި އެބައޮތް ކައުންސިލްތަކުގެ ރައީސުންނާއި ނާއިބުންނަކީވެސް ރައީސުލްޖުމްހޫރިއްޔާ އައްޔަނުކުރައްވާ ބޭފުޅެއްގެ ގޮތުގައި ހައްދަވައިދެއްވާށޭ. އެހެންވީމާ ރައްޔިތުނ އެގޮތަށް ބޭނުންވާ ނަމަ އެ ބަދަލުތައް ގެންނަންވީ.“
ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މަޢުރޫފް ޒާކިރު
ކަންމިހެން ހުރި ނަމަވެސް، ގާނޫނު އަސާސީގައި، ސަރުކާރު އަދި ދައުލަތް ހިނގާގޮތުގެ މައްޗަށް ފާރަވެރިވުމަށް މަތިކޮށްފައިވާ ފަރާތަކީ އޭސީސީ ކަމުގައިވާއިރު، އެ ކޮމިޝަނުގެ ރައީސާއި ނާއިބު ރައީސުލްޖުމްހޫރިއްޔާ އައްޔަނުކުރާ ގޮތަށް ހަމަޖެއްސުމުން ސަރުކާރު ހިންގަންތިބޭ މީހުންނަށް ކުރެވޭ ތުހުމަތުތައް ތަހުގީގު ކުރުމަށް އޭސީސީއަށް ދަތިތަކާއި ކުރިމަތިލާންޖެހޭނެ ކަމަށް އޭނާ ވިދާޅުވުއެވެ.
މިއާއެކު މައުރޫފް ވިދާޅުވީ، މިނިވަން މުވައްސަސާތަކަށް އައްޔަނު ކުރެވޭ މެންބަރުން އެ މަގާމަށް ކުރިމަތިލަނީ ވަޒީފާއެއްގެ ބޭނުމުގައި ކަމަށެވެ. އަދި އެ ވަޒީފާ ގެއްލިދާނެތީ އެ ކޮމިޝަންތަކުގެ ރައީސުންނާއި ނާއިބުންވެސް ”އެތަކެއް ސަކަރާތެއް ޖަހާފައިވާތަން“ ފެންނަން ހުރިކަން އޭނާ ފާހަގަކުރެއްވިއެވެ.
މިއިން ކޮމިޝަނަކަށް އައްޔަނުކުރެވޭ އެއްވެސް ފަރާތެއް އެފަރާތެއްގެ މަގާމު ގެއްލޭކަށެއް ބޭނުމެއް ނުވޭ. އަޅުގަނޑުމެންނަށް ފެނިގެން ދިޔައީ، މިދިޔަ ސަރުކާރު ނިމެމުންދިޔައިރު، އޭސީސީ ނިދާފައި އޮވެފައި އެކްޓިވްވެގެން އުޅުނު ގޮތް. ފްލެޓްތައް ބަދަލު ކޮށްލީ. ފްލެޓް ލިސްޓްތައް ބާތިލްކޮށްލީ. އެތައް ކަމެއް އޭސީސީން ކުއްލިއަކަށް ކުރަން ފަށައިފި. އަމިއްލައަށް، މަޖިލީހުން ދައުވަތެއް ުނުދެއްވަނީސް މަޖިލީހަށް ވަޑައިގެން، އެކި ކަހަލަ ޝަކުވާތައް މަޖިލިސް ދޮށުގައި ކުރި. މީގެ ބޭނުމަކީ މި ސަރުކާރުގައި މަގާމުގައި ދެމިހުރުން
ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މަޢުރޫފް ޒާކިރު
ކަންމިހެން ހުރުމުން، އޭސީސީ ފަދަ ތަންތަނުގެ ރައީސާއި ނާއިބު ކަނޑަެެޅުމުގެ ބާރު ރައީސުލްޖުމްހޫރިއްޔާއަށް ދިނުމުން، އެތަންތަނަށް ހުށަހެޅޭ މައްސަލަތައް ބެލުމުގައި، ރައީސުލްޖުމްހޫރިއްޔާއަށް ބަލަންޖެހޭ ފަދަ ގޮތަކަށް ކަންކަން ވެގެންދާނެ ކަމަށް މައުރޫފް ވިދާޅުވިއެވެ. އަދި މިފަދަ ކަންކަން ކުރުމަކީ ޑިމޮކްރަސީގައި ފަހަތަށް އެޅޭ ފިޔަވަޅެއްކަމުގައިވެސް މައުރޫފް ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
