ސްޓެލްކޯގެ މަތީ މިންގަނޑަށް އައްޑޫގެ ކަރަންޓުގެ ޚިދުމަތް ގެނައުމަށް ހުރިހާ މުވައްޒަފުން މަސައްކަތްކުރުމަށް އެދިއްޖެ

ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ޤަބޫލުކުރާ މަތީ މިންގަނޑަށް އައްޑޫ ސިޓީގެ ކަރަންޓުގެ ޚިދުމަތް ގެނައުމަށްޓަކައި އެންމެހައި މުވައްޒަފުން ކުންފުންޏާއެކު އެއްބައިވަންތަކަމާއެކު މަސައްކަތްކޮށްދެއްވުމަށް އެ ކުންފުނީގެ މެނޭޖިންގ ޑިރެކްޓަރ ޑރ. ޢަލީ އަޒުވަރު އެދިވަޑައިގެންފިއެވެ.

އެމްޑީ މިކަމަށް އެދިވަޑައިގެންނެވީ، އައްޑޫ ސިޓީގެ ކަރަންޓުގެ ޚިދުމަތާ ރަސްމީކޮށް ޙަވާލުވުމަށް ސްޓެލްކޯގެ އިސްވެރިންގެ ޓީމަކާއެކު އެ ސިޓީއަށް ކުރައްވަމުން ގެންދަވާ ދަތުރުގެ ތެރެއިން، އައްޑޫ ސިޓީ ހިތަދޫ، ސެންޓްރަލް ޕަވަރ ސްޓޭޝަން އަދި މަރަދޫފޭދޫގައި މަސައްކަތްކުރާ މުވައްޒަފުންނާ ރޭ ބައްދަލުކުރައްވައި ދެއްކެވި ވާހަކަފުޅުގައެވެ.

ސްޓެލްކޯއިން އެކްސްގައި ކުރި ޕޯސްޓެއްގައި ބުނީ މި ބައްދަލުކުރެއްވުމުގައި ވާހަކަދައްކަވަމުން މެނޭޖިންގ ޑިރެކްޓަރ މި ދަތުރުފުޅުގައި ފާހަގަކުރެވުނު ޚިދުމަތާ ގުޅުންހުރި މުހިންމު ކަންކަމަށް އަލިއަޅުއްވާލައްވާފައިވާ ކަމަށެވެ.

އަދި ސްޓެލްކޯގައި ހެދިފައިވާ ހަރުދަނާ އުސޫލުތަކާއި ގަވައިދުތަކަށް ބޯލަނބައިގެން މަސައްކަތްކުރުމުގެ މުހިންމުކަން ފާހަގަކުރައްވަމުން، ސްޓެލްކޯއަކީ ރައްޔިތުންނަށް އަސާސީ ޚިދުމަތެއް ފޯރުކޮށްދޭ 76 އަހަރުގެ ފަޚުރުވެރި މާޒީއެއް އޮތް ކުންފުންޏެއްކަން ދެނެގަނެ، އެންމެ އެދެވޭ ގޮތުގައި މަސައްކަތް ކުރިއަށް ގެންދިއުމަށް އޭނާ ނަސޭހަތްތެރިވެވަޑައިގެންނެވި ކަމަށް ބުންޏެވެ.

މީގެ އިތުރުން، މަސައްކަތުގެ މާޙައުލުގައި މުވައްޒަފުންނަށް ދިމާވާ އެކި ކަހަލަ ދަތިތަކާއި ގޮންޖެހުންތައް އޮޅުންފިލުއްވައި، އެ ކަންކަން ޙައްލުކޮށްދެއްވުމަށް ކުންފުނީގެ މެނޭޖްމަންޓުން އަޅުއްވާނެ ފިޔަވަޅުތަކާ ގުޅޭގޮތުންވެސް މި ބައްދަލުވުމުގައި ވަނީ ފުޅާ ދާއިރާއެއްގައި މަޝްވަރާކުރައްވާފައިވާ ކަމަށްވެސް ބުންޏެވެ.

ސްޓެލްކޯއިން އައްޑޫ ސިޓީގެ ކަރަންޓުގެ ޚިދުމަތާ ޙަވާލުވުމަށް ކުރަމުންދާ މަސައްކަތްތަކުގެ ތެރެއިން، އެމްޑީ ޑރ. ޢަލީ އަޒުވަރާއި ކުންފުނީގެ އިސްވެރިން އިއްޔެ ވަނީ ސްޓެލްކޯގެ މަރަދޫފޭދޫ އޮފީހަށް ވަޑައިގެން، އެ ތަނުގައި ކުންފުނީގެ ދިދަ ނަންގަވައިދެއްވާފައެވެ.

އެ ރަސްމިއްޔާތުގައި ވާހަކަފުޅު ދައްކަވަމުން މެނޭޖިންގ ޑިރެކްޓަރ ވިދާޅުވެފައިވަނީ، ސްޓެލްކޯއިން އައްޑޫ ސިޓީގެ ކަރަންޓުގެ ޚިދުމަތާ ދެވަނަ ފަހަރަށް ޙަވާލުވުމަކީ އެ ސިޓީގެ ރައްޔިތުންނަށް ލިބުނު އައު އުއްމީދެއް ކަމަށެވެ. އަދި ޒަމާނީ ވަސީލަތްތަކާއެކު ދެމެހެއްޓެނިވި، ފެންވަރު ރަނގަޅު ޚިދުމަތެއް އައްޑޫގެ ރައްޔިތުންނަށް ފޯރުކޮށްދެއްވާނެ ކަމުގެ ޔަޤީންކަންވެސް ވަނީ ދެއްވާފައެވެ.