މުލި އެއާޕޯޓް ކޮމާޝަލް އޮޕަރޭޝަންތަކަށް ހުޅުވާލައިފި
ލިޔުންތެރިޔާ
އަހުމަދު ހަމީދު އާދަމް
މ. މުލި އެއާޕޯޓް ކޮމާޝަލް އޮޕަރޭޝަންތަކަށް ހުޅުވާލައިފި އެވެ.
ރީޖަނަލް އެއާޕޯޓްސް އިން މިއަދު ބުނީ މުލި އެއާޕޯޓް ކޮމާޝަލް އޮޕަރޭޝަންތަކަށް މިއަދު ހުޅުވާލާފައިވާ ކަމަށެވެ.
އެގޮތުން އެތެރޭގެ އުދުހުންތައް ކުރިއަށް ގެންދާ މޯލްޑިވިއަން އައި ވިލާ އެއާ އަދި މަންތާ އެއާއަށް ފުރުސަތު ހުޅުވާލާފައިވާ ކަމަށް ބުންޏެވެ.
މުލީ ގައި ތަރައްގީ ކޮށްފައިވާ އެއާޕޯޓް މަޝްރޫއު ނިމި ޓެސްޓް ފްލައިޓް ޖެއްސީ މިދިޔަ މަހުގެ 25 ވަނަ ދުވަހު އެވެ. ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި ފެށި މަޝްރޫއު ނިންމާ އެއާޕޯޓް ހުޅުވަން ސަރުކާރުން ކަނޑައެޅީ މިދިޔަ މަހުގެ 31 ވަނަ ދުވަހު ނުވަތަ މި މަހުގެ ފުރަތަމަ ދުވަހު އެވެ.
ނަމަވެސް މުއްދަތެއް ނެތް ގޮތަށް އެކަން ވަނީ ފަސްކޮށްފަ އެވެ.
މުލީ އެއަރޕޯޓުގެ އަމަލީ މަސައްކަތް 2021 ވަނަ އަހަރުގެ އޮގަސްޓްމަހު ފަށައި، 2023 ވަނަ އަހަރުގެ މެދުތެރޭގައި ޚިދުމަތްދޭން ރާވާފައި އޮތް ނަމަވެސް، އެކި ސަބަބުތަކާހުރެ އެއާޕޯޓުގެ މަސައްކަތްތައް ލަސްވީ އެވެ.
މިއީ މުލަކަ އަތޮޅުގައި ތަރައްގީ ކުރި ފުރަތަމަ އެއާޕޯޓެވެ. 1200 މީޓަރު ދިގު އަދި 30 މީޓާރު ފުޅާ ރަންވޭއަކާއެކު ތަރައްގީކޮށްފައިވާ މި އެއަޕޯޓުގެ މަޝްރޫއަށް ސަރުކާރުން 221 މިލިޔަން ރުފިޔާ ހަރަދުކޮށްފައިވެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
