ޢުމްރާއިން އެނބުރި އަންނަ މީހުން ބަލިތަކުން ރައްކާތެރިވުމަށް ސަމާލުކަން ދޭންވީ ކަންކަން

ޢުމްރާގެ މަތިވެރި އަޅުކަން އަދާކުރުމަށްފަހު އެނބުރި ރާއްޖެ އަންނަ ފަރާތްތަކުން، އަރިދަފުސް ރޯގާ އާއި ވައިރަލް ހުމުން ރައްކާތެރިވުމަށް ޚާއްޞަ ސަމާލުކަމެއް ދިނުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.

އެޗްޕީއޭއިން ބުނީ، ޙައްޖު ނުވަތަ ޢުމްރާއިން އެނބުރި އައުމަށްފަހު ބައެއް ކަހަލަ ބަލިތައް ފެތުރުމުގެ ފުރުޞަތު އޮންނާތީ، އާންމު ސިއްޙަތު ރައްކާތެރިކުރުމުގެ ގޮތުން ފިޔަވަޅުތައް އެޅުން މުހިންމު ކަމަށެވެ.

މިގޮތުން، ރޯގާޖެހި ކެއްސާނަމަ، މީހުން އެއްވެ އުޅޭ ތަންތަނަށް ނުދިއުމަށާއި، ޚާއްޞަކޮށް ކުޑަކުދިންނާއި އުމުރުން ދުވަސްވީ މީހުންގެ އިތުރުން ދާއިމީ ބަލިތަކަށް ފަރުވާކުރާ މީހުން މިފަދަ ތަންތަނަށް ދިއުމުން ދުރުހެލިވުމަށް އެ އެޖެންސީން ވަނީ އިރުޝާދު ދީފައެވެ.

މީގެ އިތުރުން، ރޯގާޖެހިފައިވާނަމަ ކުޑަކުދިން ކައިރިއަށް ނުދިއުމަށާއި އެކުދިން އުރާ ނުހެދުމަށްވެސް ވަނީ އެދިފައެވެ. ބަލިން ރައްކާތެރިވުމަށް އެޅިދާނެ އެހެން ފިޔަވަޅުތަކުގެ ތެރޭގައި، ކެއްސާ ކިނބިހި އަޅާއިރު އަނގަމަތީގައާއި ނޭފަތުގައި ނިވާކުރުމާއި، ބޭނުންކުރާ ޓިޝޫ ފަދަ ތަކެތި ރައްކާތެރި ގޮތުގައި ނައްތާލުމާއި، ގިނަގިނައިން ސައިބޯނި ލައިގެން އަތްދޮވުން ހިމެނެއެވެ.

އެޗްޕީއޭއިން ވަނީ ޚާއްޞަ އިންޒާރެއްވެސް ދީފައެވެ. އެއީ ޢުމްރާއިން އެނބުރި އަންނަތާ 14 ދުވަސް ތެރޭގައި ހުން އައުން، ކެއްސުން، ނޭވާލާން އުނދަގޫވުން ނުވަތަ މޭގައި ރިއްސުން ފަދަ އަލާމާތެއް ފެނިއްޖެނަމަ، ލަސްނުކޮށް ޑޮކްޓަރެއްގެ މަޝްވަރާ ހޯދުމެވެ. އަދި ޑޮކްޓަރަށް ދައްކާއިރު، އެއީ ޢުމްރާއިން އެނބުރި އައި މީހެއްކަމުގެ މަޢުލޫމާތު ޙިއްސާކުރުމަކީ ބަލި ދެނެގަތުމަށް ވަރަށް މުހިންމު ކަމެއް ކަމަށް އެޗްޕީއޭއިން ބުނެއެވެ.

ގޭގައި ދެވިދާނެ ފަރުވާތަކަށް ބަލާއިރު، ހުން އަދި އަރިދަފުސް ރޯގާ ޖެހިއްޖެނަމަ ގިނަގިނައިން ދިޔާތަކެތި ބޭނުންކުރުމާއި، ފުރިހަމައަށް އަރާމުކުރުމަށް ވަނީ ލަފާދީފައެވެ. އަދި ހުންގަދަނަމަ އާދައިގެ ތާފަނާ ފެނުން ގައިގައި ފެންހޭކުމަށާއި، ޕެރަސެޓަމޯލް ފިޔަވައި އެހެން ބޭހެއް ޑޮކްޓަރެއްގެ މަޝްވަރާއާ ނުލައި ބޭނުން ނުކުރުމަށްވެސް އެޗްޕީއޭއިން ވަނީ ހަނދާންކޮށްދީފައެވެ.