ވާދަވެރި ކުޅުމަކަށްފަހު ޕޮލިސް ބަލިކޮށް އެމްޕީއެލް އިން ފެށުން ރަނގަޅުކޮށްފި

8 ވަނަ މައިލޯ އޮފީސް/ކޮމްޕެނީ ހޭންޑްބޯޅަ މުބާރާތުގެ ފިރިހެން ފުރަތަމަ ޑިވިޝަނުގައި މިއަދު ހަވީރު އެންމެ ފަހުގެ ޗެންޕިއަން އެމްޕީއެލް އާއި ޕޮލިސް ކުލަބު ވާދަކުރި ފޯރިގަދަ މެޗު 41-33 ގެ ނަތީޖާއަކުން އެމްޕީއެލް ކާމިޔާބުކޮށްފިއެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ، މިމެޗުގެ ފުރަތަމަ ހާފު ފަސް ޕޮއިންޓްގެ ލީޑަކާއެކު 18-13 ގެ ނަތީޖާއަކުން އެމްޕީއެލް ކުރީގައި އޮވެގެން ނިމުނުއިރު، ދެވަނަ ހާފުގައި އެމްޕީއެލް އިން ވަނީ އިތުރު 23 ލަނޑު ކާމިޔާބުކޮށްފައެވެ. އަދި ދެވަނަ ހާފުގައި ޕޮލިސް ކުލަބުން ވެސް ވަނީ އިތުރު 20 ލަނޑު ކާމިޔާބުކޮށްފައެވެ.

އެގޮތުން މިމެޗުގައި އެމްޕީއެލްގެ މުހައްމަދު ފިރުނަސް އަބްދުﷲ ހަތް ލަނޑު ކާމިޔާބުކުރިއިރު، އެޓީމުގެ އަހުމަދު ފިރާޝް ވަނީ ހަ ލަނޑު ކާމިޔާބުކޮށްފައެވެ. އަދި މީގެއިތުރުން އެޓީމުގެ ރާއިދު ރަޝީދު އަދި ހަމަދު ނާބިތު ހަސަން މިއިން ކޮންމެ ކުޅުންތެރިއަކު ފަސް ލަނޑު ކާމިޔާބުކުރިއިރު، އަހުމަދު އުމޭސް ވަނީ ހަތަރު ލަނޑު ކާމިޔާބުކޮށްފައެވެ.

މީގެ އިތުރުން އެޓީމުގެ އަބްދުﷲ ނާޖީ، މުހައްމަދު ޖިދާދު އިބްރާހިމް ޔާދު، އިސްމާއިލް ފަރުހާން އަދި މުހައްމަދު އީމާއު އަބްދުﷲ މިއިން ކޮންމެ ކުޅުންތެރިއަކު ތިން ލަނޑު ކާމިޔާބުކުރިއިރު، އެޓީމުގެ އަނެއް ދެލަނޑު ކާމިޔާބުކޮށްދިނީ ހުސެއިން ނަދީމް އެވެ.

މިމެޗުގައި ޕޮލިސް ކުލަބުގެ މުހައްމަދު އަސްލަމް ހަތް ލަނޑު ކާމިޔާބުކުރިއިރު، އަހުމަދު މަހްފޫޒް މުހައްމަދު އަދި މުހައްމަދު ޝައިހާން އިބްރާހިމް މިއިން ކޮންމެ ކުޅުންތެރިއަކު ވަނީ ފަސް ލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމުގެ އަސްމާއިލް އަހުމަދު، އަހުމަދު އަބްދުއް ސައްތާރު، އިބްރާހިމް މުސްފިރު އަދި އިސްމާއިލް ޒައިދު މިއިން ކޮންމެ ކުޅުންތެރުއަކު ހަތަރު ލަނޑު ކާމިޔާބުކުރިއިރު، މިމެޗުގެ މޮޅު ކުޅުންތެރިއަކަށް ހޮވުނީ އެމްޕީއެލްގެ ރާއިދު ރަޝީދު އެވެ.

މިއަހަރުގެ އޮފީސް/ކޮމްޕެނީ ހޭންޑްބޯޅަ މުބާރާތުގެ ފިރިހެން ފުރަތަމަ ޑިވިޝަނުގައި ހަތަރު ޓީމަކުން ވާދަކުރަމުން އަންނައިރު، އޭގެތެރޭގައި ހިމެނެނީ އެމްޑަބުލިޔުއެސްސީ އާއި ވެމްކޯގެ އިތުރުން އެމްޕީއެލް އަދި ޕޮލިސް ކުލަބެވެ. އަދި މިޑިވިޝަނުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ދެޓީމު ފައިނަލަށް ހޮވޭގޮތަށެވެ.