ތިލަފުށީގެ ކުނިތައް ހދ.ކުނބުރުދޫއަށް ގެންދާތީ ހުށަހެޅި ކުއްލި މައްސަލަ ބޭރުކޮށްލައިފި

ކ. ތިލަފުށީގައި ހުންނަ ވެމްކޯގެ ކުނި މެނޭޖުކުރާ ސައިޓުގައި މިދިޔަ ހަފުތާގައި ހިނގި އަލިފާނުގެ ހާދިސާގައި ރޯވި ކުނިތައް އދ.ކުނބުރުދުއަށް ގެންދާތީ މަޖިލީހަށް ހުށަހެޅި ކުއްލި މައްސަލަ ބޭރުކޮށްލައިފިއެވެ.

މިމަހުގެ 19 ވަނަ ދުވަހު ތިލަފުށީގައި ހުންނަ ވެމްކޯގެ ކުނި މެނޭޖުކުރާ ސައިޓުގައި ހިނގި އަލިފާނުގެ ހާދިސާގައި 50އެއްހާ ޓަނުގެ ކުނި އަނދާފައިވާކަމަށް ވެމްކޯއިން ބުނެއެވެ. އެ ކުނިތައް އދ.ކުނބުރުދޫގައި ހިންގާ ވޭސްޓް މެނޭޖުމަންޓް ފެސިލިޓީއަށް ގެންދިއުމުގެ މަސައްކަތް މިއަދު ފަށާނެކަމަށްވެސް އެ ކުންފުނިން ބުނެއެވެ.

މިކަމާއި ގުޅިގެން ކަންބޮޑުވުން ފާޅުކޮށް، މިއަދުގެ މަޖިލީހުގެ ޖަލްސާގައި ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) ވަނީ ކުއްލި މައްސަލައެއް ހުށަހަޅާފައެވެ.

އެ މައްސަލާގައި ފިއްޓޭ ވިދާޅުވީ އެކަމުގެ ސަބަބުން ކުނބުރުދޫ ރައްޔިތުންގެ ސިއްޙަތަށާއި، ތިމާވެއްޓަށާއި، މުޅި ސަރަހައަދުގެ ގުދުރަތީ ނިޒާމަށް އިއާދަ ނުކުރެވޭފަދަ ބޮޑެތި ގެއްލުންތަކެއް ލިބޭނެ ކަމަށެވެ.

ފިއްޓޭ ވިދާޅުވީ، ކުނބުރުދޫ ފެސިލިޓީއަކީ މަސައްކަތް ނިމި ކުނި މެނޭޖުކުރުމުގެ މަސައްކަތް ފަށާފައި ނުވާ ތަނެއް ތަނެއް ކަމަށެވެ. އަދި ކުނި އެޅުމަށް ބޭނުންވާ ކޮންކްރީޓް ފަންގިފިލާއެއް ނެތުމުގެ ސަބަބުން ކުނިތައް ސީދާ ބިމަށް އުކާލުމުން އުފެދޭ ވިހަ ފެން ރައްކާތެރިކަމާއެކު ނައްތާލެވޭނެ އެއްވެސް ނިޒާމެއް އެ ރަށުގައި ގާއިމުކުރެވިފައި ނުވާކަމަށެވެ.

"ކުނބުރުދުއަކީ ރާއްޖޭގައި ހިމާޔަތްކޮށްފައިވާ ކަންޒުކަހަނބު އާލާވެ ދިރިއުޅުމަށް ތިމާވެށްޓަށް ނުހަނު މުހިންމު މާޙައުލެއް ކަމުން، ތިލަފުށީން ގެންދާ ވިހަ ކުނިތަކުގެ ސަބަބުން އެތަކެތި ނެތިދިއުމުގެ ބިރު އެބައޮތުމުގެ އިތުރުން ކުނިން ބޭރުވާ ވިހަ މާއްދާތައް ބިމުގެ ފަސްގަނޑާއި ފެން ފަށަލައަށް ޖަމާވުމުގެ ސަބަބުން ރަށުގެ ދަނޑުވެރިކަމަށް އިއާދަނުކުރެވޭ ފަދަ ގެއްލުންތަކެއް ލިބިދާނެ ކަމުގެ ނުރައްކާ (އެބަ) އޮތް“ ފިއްޓޭ ވިދާޅުވުއެވެ.

އޭނާ އިތުރަށް ވިދާޅުވީ، ތިލަފުށިން ގެންދާ ޕްލާސްޓިކް އަދި ސިނާއީ ކުނިތަކުން ޑައޮކްސިންސް އާއި ބެންޒިން ފަދަ ކެންސަރު އުފައްދާ ނުރައްކާތެރި މާއްދާތައް ބޭރުވާ ކަމަށާ، އެ މާއްދާތައް ވައިގެ މަގުންނާއި ފެނުގެ ޒަރީއާއިން އިންސާނުންގެ ހަށިގަނޑަށް ވާސިލުވެ، ދާއިމީ ބަލިތަކަށް މަގުފަހިވާނެ ކަމަށެވެ.

”ކުނިގަނޑުން އަރާ ކާބަން މޮނޮކްސައިޑާއި ހައިޑްރޯޖަން ސަލްފައިޓް ގޭހުގެ ސަބަބުން ކައިރި ސަރަހައްދުތަކުގައި ދިރިއުޅޭ ރައްޔިތުންގެ ބޮލުގައި ރިއްސުމާއި، ނޭވާލުމަށް އުނދަގޫވުމާއި، މޭނުބައިކުރުން ފަދަ ސިއްހީ މައްސަލަތައް ކުރިމަތިވެދާނެ“ ފިއްޓޭ ވިދާޅުވިއެވެ.

އެހެންކަމުން، ވެމްކޯގެ މި ނިންމުމަކީ ރައްޔިތުންގެ ސިއްހަތާއި ތިމާވެށްޓަށް އޮތް ބޮޑު ނުރައްކަލަކަށް ވާތީ، ސަރުކާރުގެ ސަމާލުކަމަށް މިކަން ގެނައުމަށް މައްސަލަ ހުށަހެޅީ ކަމަށް ޒިޔާދު ވިދާޅުވިއެވެ.

މި ކުއްލި މައްސަލަ ބަލައިގަންނަން ވޯޓް ދެއްވީ އެންމެ 07 މެންބަރުންނެވެ. އަދި މައްސަލަ ބަލައިނުގަންނަން 27 މެންބަރުން ވޯޓް ދެއްވިއެވެ. އެހެންކަމުން މައްސަލަވަނީ ތަޅުމުން ބޭރުކޮށްލާފައެވެ.