ރާއްޖޭގައި އެބަތިބި ވޭޕަށް އިންވެސްޓް ކޮށްގެންތިބި ފަރާތަތްތައް؛ އެމީހުންނަށް ބަދަލުދިނުމާމެދު ވިސްނާލަންޖެހޭ: ޣަފޫރު

ރާއްޖޭގައި ފުޅާ ދާއިރާއެއްގައި ވޭޕަށް އިންވެސްޓް ކޮށްގެން ތިބި ފަރާތްތައް ތިބިއިރު، އެ މަނާ ކުރުމުން އެމީހުންނަށް ވާނެ ގޮތަކާމެދު ވިސްނާލަންޖެހޭ ކަމަށް ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ މިއަދު ވިދާޅުވެއްޖެއެވެ.

ދުންފަތް ކޮންޓްރޯލްކުރުމާބެހޭ ގާނޫނަށް ގެންނަ އިސްލާހުތަކުގެ ބިލަށް ބަހުސްކުރައްވަމުން ޣަފޫރު ވިދާޅުވީ ދުންފަތަކީ ސިއްހަތަށް ގެއްލުންވާ އެއްޗެއް ކަމަށާ އެއީ ދެބަސްވެވެން ނެތް ހަގީގަތެއް ކަމަށެވެ.

އެހެން ނަމަވެސް ދުންފަތާއި ސިނގިރޭޓްގެ ޑިޔުޓީ ޑަބަލް އަށްވުރެވެސް ބޮޑުކޮށް ބޮޑު ކުރާއިރު، އެއީ ”ރައްޔިތުންނަށް ތަހައްމަލުކުރެވޭނެ ކަމެއްތޯ“ ވިސްނާލަންޖެހޭ ކަމަށް އޭނާ ވިދާޅުވިއެވެ. އަދި އެފަދައިން ބޮޑު ކުރުމަކީ، ޙާލަތާއި ނުބައްދަލު ބާރެއްގެ ބޭނުން ކުރުން ކަމަށްވެސް އޭނާ ވިދާޅުވިއެވެ.

އޮސްޓްރޭލިޔާއަކީ ޖީ 7 ގެ ގައުމެއް. އެއީ ދުނިޔޭގައި ސިނގިރޭޓް އެންމެ އަގުބޮޑު އެއް ގައުމު. ދެވަނަ ގައުމަކަށް މިވަނީ ދިވެހިރާއްޖެ. ތިންވަނަ ދުނިޔޭގެ ގައުމު. އަޅުގަނޑުވެސް ސިނގިރޭޓްގެ ޑިޔުޓީ ބޮޑުކުރާކަށްވެސް ދެކޮޅެއް ނޫން. އެހެން ނަމަވެސް މިއަދު މިކުރާ ވަރަށް ބޮޑު ކުރަން އަޅުގަނޑު ކަނޑައެޅިގެން ދެކޮޅު.

ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ

ޣަފޫރު އިތުރަށް ވިދާޅުވި ގޮތުގައި ރާއްޖޭގެ 18 އަހަރުން މަތީގެ މީހުންގެ ތެރެއިން 40 އިންސައްތަ އަކީ ދުންފަތް ބޭނުންކުރާ މީހުން ކަމަށެވެ.

"މި ކަން މި ހިސާބުގައި އޮއްވައި ރައްޔިތުންނަށް ތަހައްމަލުނުކުރެވޭ ވަރު ބޮޑު އަގެއް އަޅުގަނޑުމެން މީގައި ޖެހީމާ ދެން ގައުމަށް ވާނެ ގޮތް އެއީ އަޅުގަނޑުމެން ދެވަނަ ފަހަރަށް ވެސް ވިސްނައިލަން ޖެހޭނެ ކަމެއް އިއްޒަތްތެރި ރައީސް،" ޣަފޫރު ވިދާޅުވިއެވެ.

ޣަފޫރު އިތުރަށް ވިދާޅުވީ ރާއްޖޭގައި ވޭޕް މަނާ ކުރާއިރު، އެކަމަށް އިންވެސްޓް ކޮށްގެން ތިބި ފަރާތްތައް ރާއްޖޭގައިތިބި ކަމަށެވެ. އަދި އެކަން މަނާ ކުރުމުން އެ ވިޔަފާރިވެރިންނަށް ލިބޭ ގެއްލުމަށް ދައުލަތުން ބަދަލެއް ދޭނެތޯ ވެސް އެއީ އުފެދޭ ސުވާލެއްކަމަށް ޣަފޫރު ވިދާޅުވިއެވެ.

އެބޭފުޅުންނަށް، މާދަމާ ފިހާރައިގައި ތަޅު އަޅުވާލާފައި، އޭގެ ބަދަލެއް ދޭނެތޯ ނުދޭނެތޯ އެވެސް އަޅުގަނޑުމެން ވިސްނާލަން ޖެހޭ ކަމެއް. ރާއްޖެއަކީ މިނިވަން ވިޔަފާރިކުރާ ގައުމެއް. މިނިވަން ވިޔަފާރީގެ ސިނާޢަތުގެ ތެރޭގަްއި އަޅުގަނޑުމެން މަސައްކަތް ކުރަންޖެހޭނީ. މިއީ ހައްތާވެސް ސުވާލު އުފެދޭ ކަމެއް

ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ

ހަމައެއާއެކު ރާއްޖެ އަންނަ ފަތުރުވެރިންގެ ތެރެއިން 60 އިންސައްތައަކީ ވޭޕް ބޭނުންކުރާ މީހުން ކަމަށާ ވޭޕް ބޭނުންކުރުން މަނާކުރާއިރު، ފަތުރުވެރިންނަށްވެސް އެކަން މަނާވެގެންދާނެތޯ އެއީ ވިސްނަން ޖެހޭކަމެއް ކަމަށް ޣަފޫރު ވިދާޅުވިއެވެ.

ޣަފޫރު ވިދާޅުވިގޮތުގައި ދުންފަތުންވާ ގެއްލުމާ އޭނާވެސް ދެކޮޅު ނޫން ކަމަށާ، އެހެން ނަމަވެސް މަޖިލީހުން ނިންމާ ނިންމުމަކީ ރައްޔުތުންގެ ތަކުލީފާއި އުނދަގޫތައް ކުޑަވާނެ ގޮތަކަށް ނިންމާ ނިންމުމަކަށް ވާންޖެހޭ ކަމަށް އޭނާ ވިދާޅުވިއެވެ.

"މިއަދު މި ހާލަތު އޮތް ވަރަކީ ގޭގައި ކައްކައި ނުކެޔަސް ގަންނަންޖެހޭ ސިނގިރޭޓު ގަނެގެން ނޫނިއްޔަކާ އުޅެވޭކަށް ނެތް އިއްޒަތްތެރި ރައީސް. އެއީ މި ގައުމުގެ ހާލަތު. އެެހެންވީމާ އެ ހާލަތަށް ވެއްޓިގެންދާއިރުގައި މި ހާލަތަށް އަގު އަރައިގެން ދިޔައިމާ ވާނެ ގޮތާ ދޭތެރޭގައި ހަމަ ވިސްނައިފައި އަޅުގަނޑުމެން ގޮތްތައް މިއަދު ނިންމަން ޖެހޭނީ ވެސް،" ޣަފޫރު ވިދާޅުވިއެވެ.

މީގެ އިތުރުން، ދުވަހުން ދުވަހަށް ވޭޕާއި ސިނގިރޭޓު ބޭނުންކުރާ މީހުން ރާއްޖޭގައި ވެސް އިތުރުވަމުން އަންނައިރު، މިއަދާ ހަމައަށް ވެސް ސަރުކާރުތަކަށް އެ ކަމުގެ ގެއްލުން އެންމެ ރަނގަޅަށް ބުނެދެވިފައި ނުވާކަމަށް ވެސް ޣަފޫރު ވިދާޅުވިއެވެ.

ސަރުކާރުން މިހާރު ހުށަހަޅައިފައިވަނީ އެކްސްޕޯޓް އިމްޕޯޓްގެ ގާނޫނުގެ ހަތްވަނަ މާއްދާގެ ޗެޕްޓަރު 24ގެ ދަށުން ސިނގިރޭޓާއި ބިޑިއަށް ނަގާ އިމްޕޯޓް ޑިއުޓީގެ ސްޕެސިފިކް ރޭޓް ތިން ރުފިޔާއިން އަށް ރުފިޔާއަށް މަތިކުރުމަށެވެ. އަދި ސިނގިރެޓާއި ބިޑިން ނެގޭ އެޑްވަލޮރަމް ރޭޓް 50 އިންސައްތަ މަތިކުރުމަށެވެ.