މަންފާ ޤުރުއާން ކޭމްޕް މަހިބަދޫގައި ފަށައިފި

މަންފާއިން އިންތިޒާމުކޮށްގެން ކޮންމެ އަހަރަކު ރާއްޖޭގެ ރަށެއްގައި ސިލްސިލާކޮށް ކުރިއަށް ގެންދިއުމަށް ނިންމާފައިވާ "މަންފާ ޤުރުއާން ކޭމްޕް" ގެ ފުރަތަމަ ކޭމްޕް އދ. މަހިބަދޫގައި ފަށައިފިއެވެ.

މި ކޭމްޕް ކުރިއަށްދާނީ މި އޮގަސްޓް މަހުގެ 26 އިން 28 ގެ ނިޔަލަށެވެ.

މި ކޭމްޕްގެ ހަރަކާތްތައް މިއަދު ފަށާފައިވާއިރު، ހެނދުނު ކުރިއަށްދިޔައީ އުމުރުން ހަ އަހަރުން ދަށުގެ ކުދިންނަށް ޚާއްސަ މުބާރާތެކެވެ. މި މުބާރާތުގައި މައިގަނޑު ގޮތެއްގައި ބަލާފައިވަނީ އެންމެ ރަނގަޅަށް އަކުރު ކިޔާ ކުދިންނާއި، ކަނޑައެޅިފައިވާ ވަގުތުގެ ތެރޭގައި އެންމެ ގިނަ ކަލިމަ ކިޔާ ދަރިވަރުންނަށެވެ.

މީގެއިތުރުން، މިއަދު މެންދުރު ވަނީ ރަށުގެ އެންމެހައި ރައްޔިތުންނަށް އަމާޒުކޮށްގެން ޤުރުއާން ކިޔެވުމާ ގުޅޭގޮތުން މަޢުލޫމާތު ދިނުމުގެ ޚާއްސަ ސެޝަނެއް ބާއްވާފައެވެ. މި ސެޝަން ނަންގަވައިދެއްވީ މަޝްހޫރު ޤާރީ އަލްޤާރީ އަހުމަދު ތައުފީޤު އެވެ.

މި ކޭމްޕާ ގުޅޭގޮތުން މަންފާ އެކަޑަމީގެ ނައިބު ރައީސް އަލްޤާރީ މުޙައްމަދު ތައުފީޤު ވިދާޅުވީ، މިއީ ވަރަށް ތަފާތު ކޭމްޕެއް ކަމަށާއި، މި ކޭމްޕްގެ ތެރެއިން ގިނަގުނަ ހަރަކާތްތަކެއް ކުރިއަށް ގެންދިއުމަށް ރޭވިފައިވާ ކަމަށެވެ. އެގޮތުން މި ކޭމްޕްގެ ތެރެއިން ޖުމްލަ ތިން މުބާރާތެއް ކުރިއަށްދާނެ ކަމަށް އޭނާ ވިދާޅުވިއެވެ.

އޭގެ ތެރޭގައި މުޅި އދ. އަތޮޅަށް ހުޅުވާލައިގެން ފަސް އުމުރުފުރާއަކަށް ބަހާލައިގެން ބާއްވާ ޤުރުއާން މުބާރާތް ހިމެނެއެވެ. މި މުބާރާތަށް ފޮނުވި ކިޔެވުންތަކަށް ފަނޑިޔާރުން އިންސާފުކުރުމަށްފަހު ފައިނަލް ރައުންޑަށް 30 ބައިވެރިން ހޮވާފައިވާއިރު، ފައިނަލް ބުރުގެ ކިޔެވުންތައް އޮންނާނީ ހުކުރު ދުވަހު މަހިބަދޫގައެވެ.

ދެވަނަ މުބާރާތަކީ މަހިބަދޫ ރައްޔިތުންގެ ތެރެއިން އުމުރުން 30 އަހަރުން މަތީގެ މީހުންނަށް ޚާއްސަކޮށްގެން ބާއްވާ މުބާރާތެކެވެ.

މި މުބާރާތްތަކުން ވަނަތަކަށް ހޮވޭ ފަރާތްތަކަށް އަގުހުރި ފައިސާގެ އިނާމުތަކެއް ވަނީ ކަނޑައަޅާފައެވެ. އެގޮތުން:

މުޅި މުބާރާތުން 1 ވަނަ: 25,000 ރުފިޔާ

މުޅި މުބާރާތުން 2 ވަނަ: 15,000 ރުފިޔާ

މުޅި މުބާރާތުން 3 ވަނަ: 10,000 ރުފިޔާ

މަހިބަދޫގައި މިހާރު ކުރިއަށްދާ މި ކޭމްޕްގައި ރާއްޖޭގެ ފުންނާބުއުސް މަޝްހޫރު އެތައް ޤާރީންނެއް ދަނީ ބައިވެރިވަމުންނެވެ.

އޭގެ ތެރޭގައި އަލްޤާރީ މުޙައްމަދު ތައުފީޤް ޢަލީ، އަލްޤާރީ އިބްރާހިމް ޝިފާއު، އަލްޤާރީ އަޙްމަދު ތައުފީޤް، އަލްޤާރީ ޢަބްދުލްވާޙިދު، އަލްޤާރީ އިބްރާހިމް ރަމްޒީ، އަލްޤާރީ އަޙްމަދު ލާޝީން، އަލްޤާރީ މުޙައްމަދު ޝިނާން މުނީރު، އަލްޤާރީ މުޙައްމަދު ވަޙީދު، އަލްޤާރީ އަޙްމަދު ރިޔާޒް، އަލްޤާރީ މުޙައްމަދު ނަޢީމް އަޙްމަދު ފިކުރީ އަދި އަލްޤާރީ އާދަމް ނަސީރު ޢަލީ ހިމެނިވަޑައިގަންނަވައެވެ.