ފޮއްދޫ ބަނދަރުގެ ޢަމަލީ މަސައްކަތް ރަސްމީކޮށް ފަށައިފި

ނ. ފޮއްދޫ ބަނދަރު ހެދުމުގެ ޢަމަލީ މަސައްކަތް ރަސްމީކޮށް ފަށައިފިއެވެ.

މި މަޝްރޫޢުގެ ބިންގާ އަޅުއްވައި ދެއްވީ އިމާރާތްކުރުމާއި ބިނާރާ ބެހޭ ވަޒީރު ޑރ.އަބްދުالله މުއްޠަލިބެވެ.

ފޮއްދޫގެ ބަނދަރު ތަރައްޤީކުރުމުގެ މަސައްކަތް ސަރުކާރުން ހަވާލުކޮށްފައިވަނީ އެމްޓީސީސީއާ އެވެ.

މަޝްރޫޢުގެ ދަށުން 30,648 ކިއުބިކް މީޓަރުގެ ސަރަޙައްދެއްގެ އައު ހާބަރ ބޭސިން ފުންކުރުމާއި، 3,990 ކިއުބިކް މީޓަރުގެ ސަރަޙައްދެއްގެ ނެރު ފުންކުރުމާއި، 145 މީޓަރުގެ ބޭރުތޮއްޓެއް ލުމާއި، 165 މީޓަރުގެ ރިވެޓްމެންޓް ޖެހުމާއި، 130 މީޓަރުގެ އެއްގަމު ތޮށި ލުމާއި، 125 މީޓަރު ދިގު 6 މީޓަރު ފުޅާ ޖެޓީއެއް ހެދުމާއި، 600 އަކަމީޓަރުގެ ޕޭވްމަންޓް ހެދުމަށްވަނީ ހަމަޖެހިފައެވެ.

މީގެ އިތުރުން ނެރު ބައްތި އާއި ބަނދަރު ބައްތި ހަރުކުރުމުގެ މަސައްކަތް ކުރުމަށްވެސްވަނީ ހަމަޖެހިފައެވެ.ފޮއްދޫ ބަނދަރު ހެދުމުގެ މަޝްރޫޢަކީ 49.77 މިލިއަން ރުފިޔާގެ މަޝްރޫޢެކެވެ.

އާބާދީގައި 504 މީހުން ދިރިއުޅޭ ފޮއްދޫގައި ރަނގަޅު ފެންވަރުގެ ބަނދަރެއް އޮތުމުގެ ހުވަފެން ރައްޔިތުން ދެކޭތާ 40 އަހަރުވެފައިވާ ކަމަށް ރަށު ކައުންސިލުން ފާހަގަކުރާއިރު، ބަނދަރު ނެތް އެ ރަށުގައި ލަފާފުރުމަށް ބޭނުންކުރަނީ ޖެޓީ އެވެ. މޫސުން ގޯސްވާ ދުވަސްތަކުގައި، ލަފާފުރުމުގެ ތެރެއިން ހިތާމަވެރި ހާދިސާ ތަކާއި އުޅަނދުފަހަރަށް ބޮޑެތި ގެއްލުން ވެފައިވާކަން ރަށު ކައުންސިލުން ފާހަގަކޮށްފައިވެއެވެ.