އެމްޑީޕީ ބޭނުންވަނީ، މަޖިލިސް މެޖޯރިޓީ ހޯދައިގެން ގައުމު އަނެއްކާވެސް ކުރިން އޮތް އަނދަވަޅަށް ވައްޓާލަން: މުހައްމަދު

އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ، އެމްޑީޕީން ރާވަމުން ދަނީ ދޮގު ވާހަކަތައް ފަތުރައިގެން، މަޖލިސް މެޖޯރިޓީ ހޯދައިގެން ގައުމު އަނެއްކާވެސް ކުރިން އޮތް އަނދަވަޅަށް ވައްޓާލުމަށް ކަމަށް ކުރިއަށްއޮތް ރައްޔިތުންގެ މަޖިލީހުގައި ވެރިކަންކުރާ ޕީއެންސީގެ ޓިކެޓްގައި ވިލިމާލޭ ދާއިރާއަށް ވާދަކުރައްވާ މުހައްމަދު އިސްމާޢީލް ވިދާޅުވެއްޖެއެވެ.

މުހައްމަދު އިސްމާއީލް މިހެން ވިދާޅުވެފައި ވަނީ، އޭނާ ރޭ އެކްސްގައި ކުރެއްވި ޕޯސްޓެއްގައެވެ.

އެގޮތުން މުހައްމަދު އިސްމާއީލް ވިދާޅުވީ، ކުރީގެ ރައީސް އަދި އެމްޑީޕިގެ އެޑްވައިޒަރ އިބްރާހިމް މުހައްމަދު ޞާލިހު ވެރިކަން ނިންމަވާލެއްވީ، މި ގައުމުގައި 40 އަހަރު ދުވަހު ނުކުރާ ވަރަށް ފައިސާ ޗާޕުކޮށް، ގައުމު ދަރަނިވެރި ކޮށްލައްވާފައި ކަމަށެވެ.

އަދި އެވަރަށް ފައިސާ ޗާޕްކުރައްވަމުން ދިޔައިރުވެސް، ދިވެހި ރައްޔިތުންގެ ކުންފުނިތަކަށް ނުދައްކާ އެތައް ބިލިއަން ރުފިޔާއެއް އޮތްކަން އޭނާ ފާހަގަކުރެއްވިއެވެ.

މިއާއެކު މުހައްމަދު ވިދާޅުވީ، ރާއްޖެ ކުރިން އޮތް އަދަވަޅުން އަރައި ގަންނަމުން، އެކި ފަރާތްތަކަށް ދައްކަވަންޖެހޭ ދަރަނިތައް ގަވައިދުން ދައްކަވަމުން، ރައީސް ޑރ މުހައްމަދު މުޢިއްޒު، ގެންދަވަނީ ތަރައްގީގެ މަޝްރޫއުތައްވެސް ކުރިއަށް ގެންދަވަމުން ކަމަށެވެ. އަދި އެ މަޝްރޫއު ތަކަކީ ރާއްޖޭގެ އިގްތިޞާދަށް އިތުރު ދިރުމެއް ގެނެސްދެއްވާނެ މަޝްރޫއު ތަކެއްކަންވެސް އޭނަ ފާހަގަކުރެއްވިއެވެ.

ނަމަވެސް މިއަދު އެމްޑީޕީން ރާވަމުން އެދަނީ ދޮގު ވާހަކަތައް ފަތުރައިގެން ، މަޖލިސް މެޖޯރިޓީ ހޯދައިގެން ގައުމު އަނެއްކާވެސް ކުރިން އޮތް އަނދަވަޅަށް ވައްޓާލަން. އެކަން އެހެންވާން ފުރުސަތު ދީގެން ނުވާނެ

މުހައްމަދު އިސްމާޢީލް

މުހައްމަދު އިސްމާއީލް މިހެން ވިދާޅުވެފައިވާއިރު، ނިމިދިޔަ ސަރުކާރުގައި ރާއްޖޭގެ އެތެރޭގެ ދަރަނިއެކަނިވެސް 9000 މިލިއަނަށް އަރާ ކަމަށް ރައީސް މުއިއްޒު ވަނީ ވިދާޅުވެފައެވެ. އަދި މި ސަރުކާރު އައިސް އެ ދަރަނިތައް ދައްކަވަމުންދާ ކަމަށްާ އެކަން ކުރައްވަނީ ފައިސާ ޗާޕު ނުކޮށް ކަން އެމަނިކުފާނު ވަނީ ފާހަގަކުރައްވާފައެވެ.