ކެންސަރުގެ ފަރުވާއަށާ ޓެސްޓްތައް ހެދުމަށް ބޭރަށްދާ މީހުންގެ އަދަދު 2000އިން މަތީގައި

ރާއްޖޭގައި ކެންސަރު ބައްޔަށް ފަރުވާ ހޯދާ މީހުން އަހަރުން އަހަރަށް އިތުރު ވަމުންދާކަމަށާ މިދިޔަ އަހަރު އެކަނިވެސް ކެންސަރަށް ފަރުވާ ހޯދައި، ބައްޔާ ގުޅޭ ޓެސްޓްތައް ހެދުމަށް 2000 އަށްވުރެ ގިނަ މީހުން ބޭރަށް ދިޔަކަމަށް ސިއްޙަތާ ބެހޭ ވަޒީރު ޤީލާ ޢަލީ ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން ގީލާ ވިދާޅުވީ އާސަންދަ މެދުވެރިކޮށް ރާއްޖެއިން ބޭރަށް ފަރުވާ ހޯދަން އެންމެ ގިނައިން ފޮނުވަނީ ކެންސަރާ ގުޅުން ހުރި ކަންކަމުގައި ކަމަށެވެ.

..2023 ވަނަ އަހަރު 1،638 މީހުން ވަނީ ކެންސަރުގެ ފަރުވާއަށް ރާއްޖޭން ބޭރަށް ފޮނުވިފައި. އަދި 2024 ވަނަ އަހަރު މި އަދަދު ވަނީ 1،996 އަށް އިތުރުވެފައި. އަދި 2025 ވަނަ އަހަރު މި އަދަދު ވަނީ 2،000 އަށް ވުރެ މައްޗަށް އަރައިފައި،

ވަޒީރު ގީލާ އަލީ

މިނިސްޓަރު ވިދާޅުވި ގޮތުގައި އޭގެ ތެރޭގައި މުޅިން އަލަށް ފޮނުވި މީހުންނާއި ބަލީގެ ބާވަތުން ތަކުރާރުކޮށް ފޮނުވި މީހުންގެ އިތުރުން ކައިރި ގައުމުތަކުގައި ދިރިއުޅޭ ދިވެހީން ވެސް ހިމެނޭ ކަމަށެވެ.

ޤީލާ އިތުރަށް ވިދާޅުވީ، ކެންސަރު ބައްޔަކީ ނުރައްކާތެރި ބައްޔެއް ނަމަވެސް، އެ ބަލީގެ ކުރީކޮޅުގައި ދެނެގަނެވިއްޖެނަމަ، ފުރާނައަށް ނުރައްކާވުމުގެ ކުރީން ފަރުވާ ކުރެވޭ ކަމަށެވެ. އެގޮތުން މި ސަރުކާރުން ކުރި އެންމެ މުހިންމު އެއް ކަމަކީ ކެންސަރު ބަލި ދެނެގަތުމުގެ ޚިދުމަތް މާލެއާއި އަތޮޅުތެރެއަށް ފުޅާކުރުންކަން ވަޒީރު ފާހަގަކުރެއްވިއެވެ.

އެކަމަށްޓަކައި މާލެއާއި ފަސް ރީޖަނަލް ހޮސްޕިޓަލެއްގެ އިތުރުން ބައެއް ސިޓީ ތަކުގެ ހޮޕިޓަލުންވެސް ކެންސަރަށް ސްކްރީން ކުރުމުގެ ޚިދުމަތް ދޭން ފަށާފައިވާ ކަމަށާ، މިހާތަނަށް 700 އަށްވުރެ ގިނަ މީހުން އެ ޚިދުމަތް ހޯދާފައިވާ ކަމަށް ވަޒީރު ވިދާޅުވިއެވެ. ސަރުކާރުގެ އަމާޒަކީ ހުރިހާ އަތޮޅު ހޮސްޕިޓަލެއްގައިވެސް ކެންސަރަށް ސްކްރީން ކުރުމުގެ ޚިދުމަތް ދިނުން ކަމަށް ޤީލާ ވިދާޅުވިއެވެ.

ުމީގެ އިތުރުން ޤީލާ ވިދާޅުވީ، ކެންސަރުގެ ފަރުވާއަށް ރާއްޖެއިން ބޭރަށް ގިނަ އަދަދެއްގެ މީހުން ފޮނުވި ނަމަވެސް ގިނަ މީހުން ކީމޯ ތެރަޕީ ހަދަނީ ރާއްޖޭގައި ކަމަށެވެ. އެގޮތުން މިދިޔަ އަހަރު ކީމޯ ތެރަޕީގެ ފަރުވާ ރާއްޖެއިން ބޭރުން ހޯދާފައި ވަނީ އެންމެ 39 މީހުން ކަމަށް ވިދާޅުވިއެވެ.

”ކީމޯ ތެރަޕީގެ ޚިދުމަތް ގާއިމްވެފައިވާ އައިޖީއެމްއެޗް އަދި ހުޅުމާލޭ ހޮސްޕިޓަލުގައި ނުވަ އެނދު މިކަމަށް ޚާއްސަ ކުރެވިފައިވާއިރު، ހުޅުމާލޭ ހޮސްޕިޓަލުން އެކަނި ވެސް 2025 ވަނައަހަރު 655 މީހުން މި ޚިދުމަތް ހޯދި“ ގީލާ ފާހަގަކުރެއްވިއެވެ.

‏ޤީލާ ވިދާޅުވީ، ސަރުކާރުގެ ދުރު ރާސްތާ އަމާޒަކީ ރާއްޖޭގައި ކެންސަރ ހޮސްޕިޓަލެއް ގާއިމުކޮށް ޕެޓް ސްކޭން ފަދަ ޚިދުމަތްތައް ފުޅާކުރުން ކަމަށެވެ.