ރައީސް ޑރ.މުއިއްޒު ވިދާޅުވީ މީދޫގެ ބަނދަރުގެ މަސައްކަތް ކުރިޔަށްގެންދާނީ ރައްޔިތުން އެދޭގޮތަށްކަމަށް!
ރ.މީދޫގެ ބަނދަރުގެ މަސައްކަތް ރަށުގެ ރައްޔިތުން އެދޭގޮތަށް ކުރިއަށްގެންދަވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދެއްވައިފިއެވެ.
މި ޔަގީންކަން ރައީސް ޑރ.މުއިއްޒު ދެއްވާފައިމިވަނީ މިހާރު އެމަނިކުފާނު އަތޮޅު ތެރެއަށް ކުރައްވާ ދަތުރުފުޅުގެ ތެރެއިން ރ.މީދޫ ގެ ރަށުގެ ކައުންސިލާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީ އާއި އެކު ބޭއްވި ބައްދަލުވުމުގެ ތެރެއިންނެވެ.
މި ބައްދަލުވުމުގައި މީދޫ ކައުންސިލުން ފާހަގަ ކުރި ކަންކަމުގެ ތެރޭގައި، މީދޫގެ ބަނދަރު ސައިޒުބޮޑުކޮށް ބަނދަރަށް ގެންނަންވާ ބަދަލުތައް ގެނައުން ހިމެނެއެވެ.
މީގެ އިތުރުންވެސް އެރަށަށް ހޮސްޕިޓަލެއްގެ މުހިންމުކަމާއި ރަށުގެ ބޯހިޔާވަހިމުގެ ދަތިކަމުގެ މައްސަލަ އާއި ގިރާ ސަރަޙައްދު ހިމާޔަތްކުރުމުގެ އިތުރުންވެސް، ރަށުން ބިންހިއްކެއް އޮތް މިންވަރެއްގެ ބިން ހިއްކުމަށް ވެސް މީދޫ ކައުންސިލުން ވަނީ ރައީސް ޑރ.މުއިއްޒުގެ އަރިހުން އެދިފައެވެ.
މީދޫ ކައުންސިލުން ވަނީ މި ކަންކަމުގެ އިތުރުންވެސް، ރަށުގައި މިހާރު ނުހެދި ހުރި މަގުތައް ހެދުމުގެ މުހިންމުކަން ވެސް ފާހަގަކޮށްފައެވެ. އަދި އިންޑޯ ކުޅިވަރުތައް ކުޅޭނެތަނެއްގެ އިތުރުން އިސްލާމީ މަރުކަޒެއް އަދި ޑޮލަރ އޭޓީއެމްއެއްގެ މުހިންމުކަމަށް ވެސް ރަށުގެ ކައުންސިލުން ވަނީ ބުނެފައެވެ.
ރައީސް ޑރ.މުއިއްޒު ވަނީ މި ބައްދަލުވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ކައުންސިލުން ފާހަގަކުރެއްވި ކަންކަމުގެ އެންމެފަހުގެ މަޢުލޫމާތު ހިއްސާކުރައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
